Вы тут

Беларусь гатова арганізаваць зборку электробусаў у Калінінградскай вобласці


Аляксандр Лукашэнка правёў сустрэчу з губернатарам Калінінградскай вобласці Расіі.


І беларусы, і калінінградцы імкнуцца да ўзаемавыгаднага, плённага супрацоўніцтва. Аб гэтым красамоўна сведчыць новы візіт расіян. Вітаючы дэлегацыю, Прэзідэнт назваў калініградцаў «нашымі».

«Чаму „нашы“ калінінградцы? Я і Ельцыну, і новаму Прэзідэнту Уладзіміру Уладзіміравічу Пуціну часта кажу, калі абмяркоўваем нейкія праблемы: Калінінград — гэта наша вобласць, мы за яе адказвалі і адказваем перш за ўсё, а не Расія. Пуцін кажа: я не супраць. У гэтым вялікая гісторыя — яшчэ ў савецкія часы, калі была адзіная краіна, шмат было гутарак на высокім узроўні аб тым, каб далучыць Калінінградскую вобласць да Беларусі... Гэта засталося, таму я часта кажу не толькі „наша“ Калінінградская вобласць, але і „наша“ Расія. Можа, хтосьці ў Расіі крыўдзіцца, але і я, і многія беларусы менавіта з такой пазіцыі падыходзяць да расіян», — падкрэсліў Прэзідэнт.

Для Беларусі Калінінградская вобласць — не толькі важны і перспектыўны гандлёва-эканамічны партнёр, гэта адзін з самых блізкіх геаграфічна і гістарычна рэгіёнаў Расіі. Губернатар вобласці Антон Аліханаў упершыню наведаў Мінск два гады таму. Тая сустрэча надала новы імпульс двухбаковаму ўзаемадзеянню. А сёння беларускі лідар выказаў спадзяванне, што новы візіт дазволіць яшчэ лепш пазнаць нашу краіну і яе магчымасці.

«Патэнцыйных кропак росту ў нас дастаткова. Добры прыклад выніковасці вашых інвестыцый у беларускую эканоміку — запуск кампаніяй „Садружнасць“ маслаэкстракцыйнага заводу ў Смаргоні. Ён вельмі паспяхова працуе. Яго прадукцыя дазволіла істотна павялічыць аб’ём тавараабароту», — задаволены Прэзідэнт.

Яшчэ адзін прыклад эфектыўнага ўзаемадзеяння — Асіповіцкі завод аўтамабільных агрэгатаў, які рэалізуе праект па ўдзелу ў праграме лакалізацыі на прадпрыемстве «Аўтатор Холдынг».

Антон Аліханаў.

Разам з тым Аляксандр Лукашэнка разлічвае на больш цесную кааперацыю беларускіх і расійскіх машынабудаўнікоў. Напрацовак у гэтай галіне дастаткова: мінскія аўтобусы з поспехам эксплуатуюцца ў Калінінградскай вобласці, ёсць магчымасць пашырыць парк пасажырскай тэхнікі за кошт сучаснага экалагічнага транспарту — электробусаў «Белкамунмаш». Беларускі бок гатовы арганізаваць сумесную зборку гэтай тэхнікі ў Калінінградскай вобласці.

Адна з традыцыйных сфер, дзе наладжана паспяховае супрацоўніцтва, — будаўніцтва. Самы паказальны вынік сумеснай працы — пабудова да чэмпіянату свету па футболе ў 2018 годзе стадыёна ў Калінінградзе. Гараджане і госці ацанілі па заслугах і прафесіяналізм беларускіх спецыялістаў, і якасць нашых сучасных будматэрыялаў.

Сёння ў Калінінградскай вобласці рэалізуецца шэраг буйных інфраструктурных праектаў — будаўніцтва марскога порту, калійнага камбінату, музейнага комплексу, Прыморскага кальца. Беларусь гатова ўдзельнічаць у гэтых будоўлях, у тым ліку праз пастаўку грузавых, дарожных, камунальных і будаўнічых машын.

У заходнім рэгіёне Расіі дынамічна развіваецца сельская гаспадарка. Беларусь валодае досведам і тэхналогіямі ў жывёлагадоўлі, вырошчванні збожжавых і агароднінных культур, будаўніцтве малочнатаварных і збожжасушыльных комплексаў, якія гатовая прапанаваць калінінградскім аграрыям.

Ёсць і рэзервы для павелічэння паставак у рэгіён якаснага беларускага харчавання.

Пашыраць маштабы супрацоўніцтва

Першы візіт Аляксандра Лукашэнкі ў Калінінград адбыўся ў кастрычніку 1999 года. За два дзесяцігоддзі зроблена шмат. Летась па аб’ёме двухбаковага гандлю мы наблізіліся да рэкорднай меткі — 360 мільёнаў долараў.

«Самы час ставіць больш амбіцыйныя задачы. Перш за ўсё ў прамысловай сферы і па лініі вытворчай кааперацыі. Галоўнае, што да гэтага імкнуцца і Беларусь, і Калінінградская вобласць. Больш за тое, ёсць канкрэтныя праекты, якія дазваляюць значна пашырыць маштабы супрацоўніцтва», — заклікаў Аляксандр Лукашэнка і дадаў, што беларускі бок заўсёды дакладна, якасна і аператыўна выконвае ўсе дамоўленасці.

У сваю чаргу Антон Аліханаў падзякаваў Прэзідэнту Беларусі за асабістую сустрэчу і шчырую гасціннасць беларускай зямлі.

Губернатар згадзіўся, што двухбаковае супрацоўніцтва мае трывалую гістарычную аснову. Актыўная праца ідзе з Гродзенскай, Гомельскай, Брэсцкай, Мінскай абласцямі, а Брэст з’яўляецца пабрацімам Калінінграда.

Антон Аліханаў паведаміў, што ў прамысловым ўзаемадзеянні Беларусі і Калінінградчыны рэалізуецца праграма лакалізацыі, у тым ліку па аўтамабілях «Хёндэ», «Кіа». З трэцяга кварталу сёлета новыя сучасныя аўтамабілі выпускаюцца з удзелам беларускіх тэхналогій на беларускі, расійскі рынкі і на рынак ЕАЭС.

Велізарная праца па будаўніцтву новай інфраструктуры ў Калінінградскай вобласці (аэрапорт, узлётна-пасадачная паласа, стадыён, гасцініцы і гэтак далей) рэалізавана беларусамі па беларускіх тэхналогіях і з беларускіх матэрыялаў. Упэўніўшыся ў якасці і дакладнасці беларускага боку, сёлета калінінградцы на 50 з лішкам працэнтаў больш закупляюць беларускіх будматэрыялаў.

Варвара МАРОЗАВА

Фота БелТА

Выбар рэдакцыі

Грамадства

Як арганізаваць правільны догляд за валасамі гарачай парой

Як арганізаваць правільны догляд за валасамі гарачай парой

У 90 % выпадкаў людзі не ведаюць, як правільна мыць галаву.

Калейдаскоп

Усходні гараскоп на наступны тыдзень

Усходні гараскоп на наступны тыдзень

У Блізнятаў ёсць шанц кардынальна змяніць жыццё.