Вы тут

Беларусі і Татарстану трэба шукаць новыя пункты росту тавараабароту


Узаемны тавараабарот Беларусі з самым значным партнёрам у Прыволжскай федэральнай акрузе па выніках 2018 года наблізіўся да аднаго мільярда трохстот мільёнаў долараў (агульная лічба гандлю з усёй Расіяй у мінулым годзе склала больш за 35 мільярдаў). Такія значныя сумы ў гандлі з гэтай рэспублікай Расіі ствараюць сумесныя праекты ў нафтагазавай сферы і машынабудаванні. Як зберагчы такі вопыт і павялічыць патэнцыял супрацоўніцтва, абмяркоўвалі Прэзідэнт Рэспублікі Татарстан Рустам Мініханаў і Аляксандр Лукашэнка.


«Каб захаваць і прымножыць гэты годны вынік, нам трэба шукаць новыя пункты росту. Галоўным вектарам узаемадзеяння ў гэтым кірунку бачыцца павелічэнне аб’ёмаў інавацыйнага і інвестыцыйнага супрацоўніцтва. Ведаю, што вы робіце ў сваёй працы асноўны акцэнт на ўкараненне ў практыку перадавых тэхналогій і навуковых дасягненняў. Мы прытрымліваемся тых жа крытэрыяў», — заўважыў на перамовах кіраўнік Беларусі.

На гэтых прынцыпах развіваецца кааперацыйны праект «МАЗа», «МТЗ», «Амкадора», «БелАЗа» з татарстанскім холдынгам «РарыТЭК» па стварэнні газаматорнай тэхнікі. За апошнія два гады сабрана амаль 200 аўтобусаў на газе. У 2020 годзе будзе выраблена яшчэ столькі ж адзінак падобнай тэхнікі.

Але гэта не ўсе высокатэхналагічныя перспектыўныя праекты Беларусі з Татарстанам. Сумесна з Мінскім маторным заводам прасоўваецца работа па вытворчасці чатырох- і шасціцыліндровых газавых рухавікоў для трактароў МТЗ і машын «Амкадор». У перспектыве плануецца пераход на гэты від паліва самазвалаў «БелАЗ».

«Гэтыя прыклады пацвярджаюць, што мы абралі шлях не канкурэнцыі, а партнёрства. Развіваецца самадастатковае ўзаемадзеянне — ствараюцца новыя працоўныя месцы, прадастаўляюцца роўныя магчымасці для прадпрыемстваў Беларусі і Татарстана. Распаўсюджванне гэтага паказальнага вопыту на іншыя рэгіёны Расіі забяспечыла б большую аддачу ад эканамічнага дыялогу», — адзначыў Прэзідэнт Беларусі.

На перамовах бакі вызначылі задачу на будучыню — дасягнуць гадавога ўзроўню тавараабароту ў два мільярды долараў. Прывесці да росту двухбаковага гандлю можа паглыбленне кааперацыі ў машынабудаванні, рэалізацыя новых праектаў у галіне інавацый. Прэзідэнт звярнуў увагу, што пры жаданні магчыма пазбегнуць і адмноўнага сальда для Беларусі ў гандлі, якое ўзнікае з-за пакупкі нафты.

Падзякаваў Прэзідэнт і за разумнае, партнёрскае стаўленне да «МАЗа», нягледзячы на існаванне заводу «КамАЗ»: «Вы не лабіруеце, так, ведаеце, у тупую КамАЗ, бачучы, што дзесьці МАЗ пераўзыходзіць яго. А дзесьці, можа, КамАЗ не выпускае такую прадукцыю. Асабліва з газаматорнага паліва».

Беларусь гатова наладзіць супрацоўніцтва з ІТ-паркам Татарстана

Кіраўнік беларускай дзяржавы падкрэсліў, што краіна мае сур’ёзныя магчымасці ў галіне нана- і біятэхналогій, а беларускі Парк высокіх тэхналогій з’яўляецца адным з найбуйнейшых кластараў у Цэнтральнай і Усходняй Еўропе ў галіне распрацоўкі камп’ютарных прадуктаў.

«Мы гатовы наладзіць цеснае ўзаемадзеянне ў гэтай сферы з казанскім ІТ-паркам і іншымі навукова-вытворчымі цэнтрамі Татарстана», — запэўніў лідар Беларусі.

Аляксандр Лукашэнка абмеркаваў з Прэзідэнтам Татарстана Рустамам Мініханавым пытанні па нафце

Ключавым кірункам супрацоўніцтва Беларусі і гэтага рэгіёну Расіі застаецца нафтахімічны сектар, на долю якога прыпадае палова тавараабароту. «Добра, што вы сёння прыехалі. Мы якраз вядзём з Расіяй дыялог па выбудоўванні супрацоўніцтва ў галіне нафты. Я думаю, што сённяшняя размова (а мы аб гэтым пагаворым) будзе вельмі важнай не толькі ў інфармацыйным плане, але і ў сувязі з работай у гэтым сектары», — канстатаваў Аляксандр Лукашэнка.

Беларусь прапаноўвае пабудаваць у Татарстане смеццеперапрацоўчы завод

Перспектывамі для больш шырокага ўзаемадзеяння валодае і сфера экалагічнай бяспекі. У 2019 годзе Расія ўключыла ў парадак дня актуальнае ва ўсім свеце пытанне перапрацоўкі адходаў і другаснай сыравіны. «У гэтай сферы мы гатовы з вамі супрацоўніцаць аж да будаўніцтва смеццеперапрацоўчых заводаў „пад ключ“, калі вас гэта зацікавіць. У нас аналагічнае прадпрыемства функцыянуе ў Брэсце. Вы ці вашы спецыялісты могуць яго паглядзець», — сказаў Аляксандр Лукашэнка.

У Беларусі і Татарстана ёсць вялікія магчымасці і перспектывы для прасоўвання сумесных рэгіянальных праектаў, кантактаў медыцынскіх і адукацыйных устаноў, моладзевых арганізацый. Прэзідэнт падзякаваў татарскім гасцям за стварэнне камфортных умоў для беларускай каманды ў Казані, дзе праходзіў чэмпіянат свету па прафесійным майстэрстве «Worldskills-2О19». Дзякуючы ў тым ліку і цёпламу прыёму гаспадароў беларусы паказалі добрыя вынікі ў катэгорыях «Тэхналогіі праектавання ў будаўніцтве» і «Прамысловы дызайн».


У тэму

Татарстан гатовы да сумеснай работы з Беларуссю па здабычы нафты.

Гэтая ідэя для захавання беларускай школы здабычы нафты гучала на ранейшых перамовах. «Аляксандр Рыгоравіч планаваў атрымаць магчымасць узяць радовішча, і мы разам з партнёрамі планавалі работаць. Гэта ідэя не сышла, яна засталася. Ён яе сёння таксама агучыў, і мы гатовы да гэтай работы», — паведаміў журналістам Рустам Мініханаў.

Падчас візіта ў Беларусь Рустам Мініханаў правёў сустрэчу ў мінскай мячэці з актывам татарскай суполкі, наведаў прадпрыемства «БелАЗ», дзе сам змог апрабаваць самазвал за рулём. Пасля сустрэчы ў Палацы Незалежнасці Прэзідэнт Татарстана правёў перамовы па нафтахіміі з прэм’ер-міністрам Беларусі.

Марыя ДАДАЛКА

Фота БЕЛТА

 

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.