Беларуска возьме ўдзел у конкурсе “Міс Свету”, які пройдзе 14 снежня

Трэцякурсніца Інстытута бізнесу БДУ Анастасія Лаўрынчук прадставіць Беларусь у фінале конкурсу “Міс Свету”. Шоу адбудзецца 14 снежня ў Лондане.

Усяго ў фінале прэстыжнага конкурсу прымуць удзел 90 дзяўчат з розных краін. Карону новай “Міс Свету” перадасць тытулаваная ў 2018 годзе мексіканка Ванэса Понсэ дэ Леон.

Конкурс “Міс свету” ўпершыню быў праведзены ў 1951 годзе ў Лондане і заставаўся яго “сталіцай” да 1988 года ўключна. З 1989 года спаборніцтва праводзіцца ў розных краінах і на розных кантынентах з перыядычным вяртаннем у брытанскую сталіцу.

Чакаецца, што фінал конкурсу будзе паказаны ў 150 краінах.

Трансляцыя сусветнага шоу адбудзецца 14 снежня на тэлеканале АНТ у 23.20.

Падтрымаць беларускую прыгажуню можна праз афіцыйнае галасаванне конкурсу. Для гэтага неабходна:

1. зайсці на афіцыйны сайт конкурсу і прайсці рэгістрацыю з дапамогай акаўнта Facebook / Google / Instagram;
2. зайсці ва ўкладку Contestants;
3. знайсці Anastasiya Laurynchuk - Belarus;
4. перайсці ў профіль і націснуць Vote;

З аднаго акаўнта можна пакінуць толькі адзін голас.

Сяргей РАСОЛЬКА