На сесіі Выканаўчага органа Канвенцыі ЕЭК ААН аб трансгранічным забруджванні паветра на вялікія адлегласці абмеркавалі метады барацьбы за чыстае паветра.
Мерапрыемства прайшло на 40-ю гадавіну з даты падпісання Канвенцыі — яна стала першым дагаворам, які юрыдычна абавязвае, накіраваным на забеспячэнне маніторынгу і памяншэнне шкоды здароўю людзей і навакольнага асяроддзя ў выніку трансгранічнага забруджвання паветра.
Парадак дня сесіі быў прысвечаны разгляду пытанняў аб рэалізацыі Канвенцыі ў 2018—2019 гадах, зацвярджэнню плана работы па імплементацыі гэтага міжнароднага дагавора ў наступны двухгадовы перыяд, а таксама пытанняў фарміравання рэгіянальнай пляцоўкі для супрацоўніцтва ў галіне скарачэння забруджвання паветра. Па выніках сесіі была адобрана Дэкларацыя Бакоў Канвенцыі аб барацьбе за чыстае паветра ў перыяд 2020—2030 гадоў і ў наступны перыяд у рэгіёне ЕЭК ААН.
Сумесныя намаганні краін за апошнія 40 гадоў прывялі да значных вынікаў: з 1990 года выкіды шэрагу забруджвальных рэчываў у рэгіёне скараціліся ад 40 да 80 %. З 2000 да 2012 года канцэнтрацыі цвёрдых часціц у Еўрапейскім рэгіёне зменшыліся прыкладна на трэць. Але забруджванне паветра працягвае ствараць сур'ёзныя экалагічныя пагрозы і праблемы для здароўя людзей.
— Дзеючымі нацыянальнымі дакументамі ўстаноўлены мэты па зніжэнні выкідаў ад стацыянарных і мабільных крыніц на 2,7 % да 2020 года ў параўнанні з 2005-м, — расказаў намеснік міністра прыродных рэсурсаў і навакольнага асяроддзя Аляксандр КОРБУТ, які ўзначаліў беларускую дэлегацыю ў Жэневе. — Пры гэтым неабходна ўлічваць, што ў краіне ў гэты перыяд ажыццяўляецца будаўніцтва буйных прамысловых прадпрыемстваў.
Многія мерапрыемствы па зніжэнні выкідаў парніковых газаў, якія сёння праводзіць Беларусь, у тым ліку развіццё аднаўляльнай энергетыкі, электратранспарту, зніжэнне спажывання высокавугляроднага паліва, вядуць да зніжэння і выкідаў забруджвальных рэчываў.
Намеснік міністра адзначыў, што наша краіна разглядае магчымасць ратыфікацыі трох апошніх пратаколаў да Канвенцыі: Аб барацьбе з падкісленнем, эўтрафікацыяй і прыземным азонам (Гётэборгскага пратакола); Па стойкіх арганічных забруджвальніках; Па цяжкіх металах. Цяпер у рамках рэалізацыі праекта міжнароднай тэхнічнай дапамогі, накіраванага на ўдасканаленне сістэмы кіравання якасцю паветра і фінансуемага Еўрапейскім саюзам, праводзіцца ацэнка наступстваў далучэння Беларусі да пратаколаў па цяжкіх металах і стойкіх арганічных забруджвальніках. Работы плануецца завяршыць у 2020 годзе.
Вераніка КОЛАСАВА
Фота прэс-службы Мінпрыроды
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».