20 кастрычніка, аўторак

Вы тут

Якія злачынствы ў Сеціве здзяйсняюць падлеткі?


Велізарныя магчымасці, якія дае інтэрнэт, далёка не заўжды выкарыстоўваюцца выключна ў добрасумленных мэтах. У тым ліку і падлеткамі. Паказчыкі дзіцячай злачыннасці, звязанай з кіберпрасторай, істотна ўзраслі ў адыходзячым годзе.


Намеснік начальніка ўпраўлення па раскрыцці злачынстваў у сферы высокіх тэхналогій МУС Кірыл Вяткін расказаў, што калі летась у дачыненні да падлеткаў было скончана расследаванне 55 крымінальных спраў, то сёлета гэты лік падскочыў ужо да 137. Адказнасць у асноўным надыходзіць па артыкуле 212 Крымінальнага кодэкса — за крадзеж пры дапамозе камп'ютарнай тэхнікі. Адметна, што пачынаецца яна з 14 гадоў.

Але якія менавіта злачынствы ў сеціве здзяйсняюць падлеткі?

— Перш за ўсё — гэта аплата тавараў, работ, паслуг, папаўненне балансаў электронных кашалькоў, уліковых запісаў у анлайн-гульнях з выкарыстаннем знойдзеных банкаўскіх картак, — кажа Кірыл Вяткін. — Разам з тым знойдзенымі карткамі яны могуць расплачвацца і ў афлайне — напрыклад, у звычайнай краме або рэстаране хуткага харчавання. Нярэдка яны ўзломваюць і чужыя акаўнты ў інтэрнэце. Або бяруць чужы тэлефон пазваніць і за лічаныя секунды афармляюць мікрапазыку на суму да 100 рублёў, якую тут жа пераводзяць сабе або на банкаўскую картку, або на баланс тэлефона. І зусім не адзінкавыя выпадкі, калі высвятляецца, што цераз закон пераступіў малы, які яшчэ не дасягнуў узросту крымінальнай адказнасці.

Сумная пальма першынства тут на рахунку аднаго 13-гадовага падлетка. Пры дапамозе шкоднай праграмы яму ўдалося ўзламаць уліковыя запісы на розных серверах. Гэта былі інтэрнэт-крамы і букмекерскія канторы.

Але толькі фінансавымі злачынствамі школьнікі не абмяжоўваюцца. Пра гэта расказаў начальнік аддзела арганізацыі работы інспекцый па справах непаўналетніх упраўлення прафілактыкі галоўнага ўпраўлення аховы правапарадку і прафілактыкі МУС Сяргей Янкоўскі:

— Нярэдкія выпадкі ўмяшання ў прыватнае жыццё, калі пачынаецца так званы «кібербулінг» — пастаянныя знявагі, абразы, цкаванне. Сустракаюцца выпадкі і сексуальных дамаганняў. Тэндэнцыя апошніх гадоў — уцягванне школьнікаў у распаўсюджванне наркотыкаў шляхам прапаноў работы кур'ерам.

Як зазначыў начальнік аддзела па наглядзе за выкананнем заканадаўства аб непаўналетніх і моладзі Генпракуратуры Аляксей Падвойскі, калі ў 2017 годзе ў Беларусі ад злачынстваў у сусветнай павуціне пацярпела 37 непаўналетніх, то летась іх было 98, а за першую палову 2019-га — ужо 81. Прычым дванаццаці з іх яшчэ не споўнілася чатырнаццаць гадоў.

Але як жа не папоўніць шэрагі ахвяр? Сяргей Янкоўскі раіць тактыку ўважлівага назірання, гэта значыць, уступіць у суполку, якую наведвае ваша дзіця, але без патрэбы не ўмешвацца:

— Як варыянт — падпісацца на акаўнт малога. Толькі, канешне, не раскрываючы сваё сапраўднае імя. І паглядзець знутры, што адбываецца на яго старонцы, з кім ён кантачыць. Але калі вы даведаліся пра нейкія нядобрыя рэчы з боку дзіцяці, то не трэба бегчы адразу з рэменем. Неабходна гутарыць акуратна, паспрабаваць зрабіць так, каб дзіця само ўсвядоміла памылковасць сваіх дзеянняў. Калі ж дзейнічаць напралом, то праблема нікуды не дзенецца, а толькі схаваецца. Да пэўнага часу...

Валяр'ян ШКЛЕННІК

Загаловак у газеце: Падлеткавая злачыннасць з прыстаўкай «кібер»

Выбар рэдакцыі

Культура

Франтавiк Мiхаiл Чэпiк эксперыментаваў з аэражывапiсам

Франтавiк Мiхаiл Чэпiк эксперыментаваў з аэражывапiсам

Як хлапчук з беларускай глыбiнкi здолеў паступiць у Маскоўскае мастацкае вучылiшча iмя Калiнiна?

Грамадства

Экс вiцэ-прэм'ер Уладзiмiр Дражын: Галоўнае — не разбурыць, а захаваць i працягнуць работу

Экс вiцэ-прэм'ер Уладзiмiр Дражын: Галоўнае — не разбурыць, а захаваць i працягнуць работу

Аб альтэрнатыве клайпедскаму порту, рэканструкцыi Нясвiжскага палаца i роднай мове падчас сямейных сустрэч.

Грамадства

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Чацвёртая педагагічная неканферэнцыя прайшла ў мінулыя выхадныя з нязменным аншлагам і сабрала больш як тры сотні педагогаў з розных куткоў нашай краіны.