Вы тут

Усходні гараскоп на 2020 год


Год Белага Металічнага Пацука па ўсходнім календары пачнецца толькі 25 студзеня 2020 года. Але нездарма гаворыцца: «Уладкаваныя так людзі: жадаюць знаць, што будзе!», таму многія загадзя цікавяцца, у чым і як сустракаць гаспадара года, чым частаваць і што падарыць, каб прыцягнуць удачу. Наступны год — высакосны, што некаторых палохае. Астролаг і нумаролаг Аліна ВОЛКАВА сцвярджае, што шчырым і адказным людзям турбавацца не трэба, і расказвае, да прадстаўнікоў якіх знакаў задыяка год абяцае быць асабліва спрыяльным.

«Гэта год, калі ўсё становіцца на свае месцы, — кажа астролаг, — пацук хоць і хітры, але разумны, не любіць агрэсіі і мае выдатную памяць як на злое, так і на добрае, таму калі не хочаце ў канцы года атрымаць непрыемныя ўзрушэнні, свары і нават разрыў адносін, будзьце шчырыя і больш цярпімыя, сейце тое, што хацелі б пажынаць».


Авен

Ад таго, як вы будзеце ставіцца да жыцця, залежыць многае, а самае галоўнае — ці выйдзеце вы пераможцам з непрадбачаных сітуацый, ці апыняцеся «на шчыце».

Жанчынам-Авенам будзе прасцей знаходзіць паразуменне з навакольнымі да канца вясны, а ўвосень вас можа ахапіць хандра і схільнасць бачыць усё ў чорным колеры. Мужчынам жа варта звярнуць увагу на кар'еру: перашкоды вас не спыняць, а толькі загартуюць, а ўменне аказваць і прымаць дапамогу прынясе прыемны вынік. Авенам наогул варта прыслухоўвацца да патрэб і меркаванняў блізкіх, брацца за праекты, якія маюць значэнне для грамадства. Год Пацука вельмі спрыяльны для пашырэння кола стасункаў, набыцця новых сяброў, карысных знаёмстваў і прыбаўкі ў сям'і. Пад канец года не забудзьцеся прайсці планавы медагляд, каб не прагледзець абвастрэнні хвароб.


Цялец

Як мінімум з сакавіка да кастрычніка ў Цяльцоў будзе атрымлівацца задуманае — але хто сказаў, што не спатрэбіцца прыкладваць намаганняў? Не вядзіцеся на спакусы і сумніўныя прапановы, дзейнічайце дакладна паводле рэцэпта, як геніяльны повар-пацук Рэмі з анімацыйнага фільма «Рататуй». Часам давядзецца адстойваць свае прынцыпы даволі жорстка, аднак вынік будзе таго варты. А вось у асабістых стасунках, наадварот, неабходна будзе навучыцца «чытаць» патрэбы і пачуцці партнёра, тады ўсё астатняе для вас стане лёгкае і простае.

Абавязкова знайдзіце час для адпачынку — блізка ці далёка, не важна, але ў прыемнай кампаніі. Гэта дазволіць аднавіць душэўныя сілы. Што да фізічных, тут усё проста і складана адначасова: здаровы лад жыцця і прафілактыка будуць мець лепшы вынік, чым кансультацыі самых выбітных свяцілаў і дарагія сучасныя лекі.


Блізняты

Памятаеце мышаня Джэры з серыі амерыканскіх мультфільмаў? Вось гэта і будзе ваш найлепшы талісман на 2020-ы, калі адкласці на бок шкоднасць, а пакінуць бурлівую энергію. Вы дастаткова доўга рэфлексавалі і вагаліся, цяпер час не баяцца, дзейнічаць, мяняць — сябе і свет вакол. Практычна ўвесь год поўны магчымасцяў так ці інакш праявіць разнастайныя здольнасці і таленты, нават тыя, пра якія вы самі цьмяна здагадваліся, дасягнуць каротка- і доўгатэрміновых мэт. Але запомніце: дэлегаваць паўнамоцтвы — метад не для вас, самі-самі-самі, ад пачатку да канца.

Перамены датычацца і асабістай сферы — калі, зразумела, вы таго жадаеце. У адзінокіх людзей вялікая імавернасць пазбавіцца гэтага статусу, знайсці палавінку ці блізкага сябра. Бліжэй да зімы парадуйце сябе водпускам, буйной пакупкай, культурнай або аздараўляльнай праграмай.


Рак

Ваша інтуіцыя і раней няблага працавала, а ў наступным годзе выйдзе на новы ўзровень. Прадчуванні дазволяць пазбегнуць многіх памылак, не дапусціць сварак з блізкімі, не ўвязацца ў заведама пройгрышную справу і, наадварот, падтрымаць таго, хто на першы погляд здаецца няўдачнікам, а ў выніку атрымае поспех. Карыстайцеся гэтай сваёй уласцівасцю, каб дапамагчы не толькі сабе, але і іншым — паверце, як сквапнасць, так і бескарыслівасць вернуцца ў трайным памеры.

Пацук падтрымлівае вашу схільнасць да стабільнасці, таму рэзкіх узлётаў у кар'еры альбо выйгрышаў у латарэі чакаць не варта, аднак некалькі важкіх «цаглінак» у пабудову вашага дабрабыту наступны год падкіне. І толькі ў адной сферы — адносінах з дзецьмі — трэба быць асцярожнымі, часцей паўтараць сабе: «Пераначуем — болей пачуем». Вазьміце на ўзбраенне вобраз мудрага пацука Сплінтэра, настаўніка чарапашак-ніндзя, і не спяшайцеся з высновамі і рашэннямі.


Леў

Год будзе досыць цяжкі — прынамсі ў параўнанні з папярэднімі, калі справы вырашаліся хутка і без напружання. Цяпер жа вам могуць прыпомніць старыя крыўды і злоўжыванне службовымі паўнамоцтвамі. Папярэднія памылкі, як, зрэшты, і высакародныя ўчынкі, у наступным годзе вернуцца бумерангам. Што рабіць? Змірыцца і падладзіцца пад абставіны, калі вы не можаце змяніць іх. Аўтарытарны стыль паводзін мусіць адысці на другі план. Ці помніце, што здарылася з пацуком у казцы пра Папялушку? Чараўніца ператварыла яго на пэўны час у кучара, не пытаючы, зразумела, пацучынага меркавання на гэты конт. Нешта падобнае чакае і вас. Калі выпрабаванне пройдзеце з годнасцю, можаце быць упэўненыя, што зорны апякун года заўважыць і ацэніць гэта.

У працаголікаў імаверныя больш частыя хваробы, асабліва прастуды і алергіі. Каб пазбегчы гэтага, прадстаўнікам знака рэкамендуецца часцей бавіць час з сям'ёй і блізкімі, яны — ваша галоўная «батарэйка» і крыніца радасці.


Дзева

Вашы перажыванні, працоўныя подзвігі і сямейныя клопаты будуць нарэшце ацэнены як след. Больш за тое, флёр шанцавання і гармоніі пашырыцца і на вашых блізкіх і сяброў, таму ў наступным годзе людзі пацягнуцца да вас, будуць прасіць дапамогі і не забываць аддзячыць. Але ж, як вы разумееце, нішто не бывае бясплатным, акрамя сыру ў пастцы. У вашым выпадку цаной можа стаць здароўе — часцей рабіце перапынкі, адпачывайце, вандруйце і аднаўляйце сілы (тыя, хто вас добра ведае, не западозраць у лайдацтве, а іншым і даказваць нічога не трэба).

2020 год спрыяльны для самаразвіцця. Курсы англійскай або ўрокі сальсы, каратэ або вышыванне, скандынаўская хада або жывапіс — дазвольце сабе заняцца даўнім хобі ці зусім новай справай. Фінансы будуць прыходзіць і сыходзіць нераўнамерна, таму не рабіце даўгоў, прытрымлівайцеся плана выдаткаў, як вы гэта ўмееце.


Шалі

У першай палове года вас проста-такі будзе хлебам не кармі, а дай нарабіць глупстваў, пайсці на неапраўданую рызыку ці шакіраваць грамадскасць якім-небудзь экстравагантным учынкам. Паспрабуйце абмежавацца малым — змяніце прычоску ці гардэроб, а калі не атрымаецца, то не забывайцеся хоць выбачацца за ўсё незнарок сказанае ці ўчыненае, інакш рызыкуеце нажыць ворагаў.

На рабоце трэба зрабіць самае для вас цяжкае — вызначыцца. Прасоўванне па службе, але выхад з зоны камфорту (частыя камандзіроўкі, фінансавая адказнасць і г. д.) альбо спакойная, нават манатонная праца са значна меншай зарплатай? Змена сферы дзейнасці ці «стабільнасць — прыкмета майстэрства»? Усё залежыць толькі ад вашага жадання. Летам ці ўвосень чакаюцца вялікія выдаткі, якія кампенсуюцца толькі ў канцы года.


Скарпіён

У 2020-м звычка пакідаць за сабой апошняе слова будзе вам моцна перашкаджаць. Не трэба крычаць пра свае ідэі на ўвесь свет і патрабаваць прызнання — спачатку зрабіце, а потым атрымлівайце пахвалу. І лепш, калі работа будзе не на асабістую выгаду, а на грамадскую карысць — напрыклад, як у гіганцкіх пацукоў гамбі, якія ў сябе на радзіме, у Афрыцы, дапамагаюць вайскоўцам у размініраванні.

Тое самае датычыцца сямейнага жыцця: калі вы гатовыя працаваць над сабой і чуць партнёра, блізкіх — шансы дасягнуць ладу ў доме павялічваюцца ў некалькі разоў. Цягам года вам выпадзе некалькі магчымасцяў істотна памяняць жыццё, аднак калі вы не зробіце гэтага да канца трэцяга квартала і працягнеце плыць па цячэнні, давядзецца адкласці яшчэ на некалькі гадоў. З фінансамі праблем не прадбачыцца.


Стралец

Для вас гэта не самы прадукцыйны і пазітыўны год, але дасягнуць пэўных мэт, асабліва калі яны выразна акрэсленыя, а вы гатовыя змагацца з перашкодамі, усё ж атрымаецца. Рэкамендацый тут дзве: абавязкова ўзважвайце ўсе «за» і «супраць», а калі распачынаеце новую справу, даводзьце яе да канца.

Быць дыпламатычным — вось што ў 2020-м спатрэбіцца і прынясе плён. У асобных сітуацыях уменне пайсці на кампраміс стане, без перабольшання, лёсавызначальным. У другім паўгоддзі спатрэбіцца шмат працаваць, адшукваючы новыя крыніцы даходаў і заводзячы новыя сувязі. Калі справіцеся, Белы Пацук падкіне адчувальны бонус — магчыма, новае аўто, квадратныя метры альбо доўгачаканую паездку на мора.


Казярог

Вы не належыце да нахлебнікаў і абібокаў, таму неабходнасць папрацаваць як след наўрад ці вас палохае. Адзіная парада — пастарайцеся пазбягаць канфліктаў з калегамі. Вылучыцца на іх фоне яркай зоркай, канешне, можна, але ці вартая хвіліна славы таго, каб застацца з адкрытай спінай у адказны момант?

Калі ў вашых прыярытэтах — кар'ера, то не чакайце хуткага выніку, зарабляць рэпутацыю давядзецца доўга. Чым больш укладзяце энергіі, тым лягчэй будзе потым збіраць ураджай. Аднак не дазваляйце абяцанай узнагародзе засціць вам вочы, як гэта адбывалася з пацуком Рокі ў мультфільме пра Чыпа і Дэйла, — халодны розум і стратэгія хутчэй прывядуць да поспеху, чым гарачка і імпэт. Пад канец года самотныя Казярогі могуць сустрэць сваю палавінку — не выключана, што вы даўно знаёмыя, але ўбачыце адно аднаго ў іншым ракурсе.


Вадаліў

Год на пазітыве — вось якім абяцае быць 2020-ты. Ваш талісман — бадай, самы знакаміты мыш Мікі Маус, у якога ўсё так ці інакш завяршаецца найлепшым чынам. Старайцеся не жыць мінулым — а некаторыя звычкі і знаёмствы давядзецца пакінуць у ім, каб рушыць наперад. Многае будзе залежаць ад асяродку, у якім вы знаходзіцеся, таму часцей бывайце з прыемнымі вам людзьмі ў тых месцах, дзе адчуваеце сябе спакойна і разняволена, альбо, наадварот, атрымліваеце зарад бадзёрасці і аптымізму.

У асабістых стасунках захоўвайце пазітыўную раўнавагу: часам вы будзеце памыляцца, як і кожны чалавек, часам будзеце мець стапрацэнтную рацыю, але не трэба ціснуць гэтым на блізкіх. Найлепшы спосаб справіцца з цяжкасцямі — паглядзець на іх з гумарам. І толькі фінансы будуць спяваць свае рамансы даволі няўпэўнена, таму кантралюйце выдаткі.


Рыбы

Значную частку года неабходна будзе працаваць над сабой — атрымліваць дадатковую адукацыю, набываць новыя ўменні, развіваць наяўныя здольнасці. Не прапусціце некалькі шанцаў, якія вам падорыць лёс з лютага да лістапада, але каб выбраць, які з іх рэальны, а які падманлівы, спатрэбіцца дапамога сяброў ці сваякоў — балазе мудрыя дарадцы сярод іх знойдуцца.

Увосень, калі будзеце аддаваць зашмат энергіі рабоце, магчымыя праблемы са здароўем, прычым з таго боку, на які вы і падумаць не маглі. Калі адчуеце нейкія трывожныя званочкі ў самаадчуванні, рэагуйце на іх адразу, і праблем удасца пазбегчы. Узімку магчымае папаўненне — як на грашовых рахунках, так і ў сям'і.

Фота Ганны ЗАНКАВІЧ

Выбар рэдакцыі

Грамадства

Захаваць. Нельга знесці

Захаваць. Нельга знесці

Знакі прыпынку нарэшце расстаўлены.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.