Вы тут

Магіляўчанка на пенсіі пачала ствараць музыку


Анатоль Вярцінскі неяк прыслаў ёй паштоўку з цёплымі словамі ўдзячнасці за цудоўную мелодыю да яго вершаў. Якаў Навуменка збіраўся ўключыць некалькі яе твораў у свой рэпертуар. На жаль, спявак заўчасна пайшоў з жыцця, і супрацоўніцтва не атрымалася. Але песні на музыку Святланы Жоравай спяваюць вакальна-харавыя калектывы ў розных кутках Беларусі. Нядаўна ў Магілёве быў выдадзены трэці зборнік яе песень. Прычым на вершы выключна беларускіх паэтаў.


У новым зборніку 14 песень з каментарыямі. Еўдакія Лось, Генадзь Бураўкін, Сяргей Панізнік — спрэс гучныя імёны. Іх вершы з вялікім сэнсам, душэўнай пранікнёнасцю, глыбокімі перажываннямі набылі яшчэ большую кранальнасць і лірычнасць, атрымалі прыгожую музычную агранку, заззялі новымі фарбамі. У самадзейнага кампазітара вельмі тонкае адчуванне слова. Яна часам нават уносіць праўкі ў вершы, вядома ж, з дазволу аўтараў, якія пагаджаюцца, што так сапраўды лепш.

У зборніку ёсць дзве песні на словы Анатоля Вярцінскага. «З ім мы наогул пазнаёміліся пры цікавых абставінах, — расказвае суразмоўца. — Я даслала тэкст пра бацьку — скульптара Абрама Жорава ў адно беларускае выданне. У размове з рэдактарам сказала, што ў мяне ёсць песні на словы Вярцінскага. А яны аказаліся сябрамі! І ён даў мне нумар яго тэлефона. Я пазваніла, сказала: «У вас ёсць цудоўны верш пра жанчыну, які называецца «Позірк з космасу», а я зрабіла з яго песню і перайменавала ў «Падары святло». Бо жанчына — самае яркае свяціла на зямлі». Ён даў свой адрас, каб я даслала ноты і тэкст. Праз нейкі час прыйшла прыгожая паштоўка, у якой Вярцінскі напісаў, што яму ўсё спадабалася. Паведаміў, што быў у гасцях у знаёмай музычнай сям'і, дзе самі складаюць і выконваюць песні. Гаспадыня села за фартэпіяна, і... песня ўсім спадабалася. Мы нават станцавалі, прызнаўся паэт».

Талент складаць музыку Святлана Жорава адкрыла ў сабе нечакана нават для самой сябе — прачытала верш Уладзіміра Фірсава «Некрасивых на свете немало встречается», а ён загучаў у галаве як песня. Кажа, села за фартэпіяна і заспявала. «Я запісала яе на магнітафон, праслухала і зразумела, што са мной адбылося нешта важнае», — напісала яна ў прадмове да свайго зборніка. Хоць усё лагічна. Яе бацька рабіў прыгажосць у скульптурах, а дачка — у мелодыях. Мастацтва, яно ж без межаў, можа выліцца ў любую форму. А ў Святланы Жоравай да таго ж яшчэ і моцныя музычныя карані. Яе дзядуля, напрыклад, быў цудоўны скрыпач. Яна і сама скончыла музычную школу. «Каб ствараць музыку, трэба быць і артыстам, і мастаком, і музыкантам», — упэўнена жанчына. І ў яе лёсе ўсё сышлося.

Аранжыроўкі да самых яе першых песень рабіў магілёўскі кампазітар Уладзімір Брайлоўскі, а вядомы беларускі барытон Алег Кавалеўскі нават запісаў некалькі з іх. Але мелодыі нараджаліся вельмі хутка — адна за адной, і трэба было шукаць пастаяннага суаўтара. І ён знайшоўся — у музычнай школе, куды жанчына пайшла па дапамогу. Дырэктар установы для пачатку прапанавала ёй спець і была ўзрушаная. Што-што, пяе Святлана Жорава добра — у свой час актыўна ўдзельнічала ў самадзейнасці, нават скончыла тэатральную студыю ў Магілёве і спявала ў аперэце.

У музычнай школе ёй прапанавалі супрацоўніцтва з выкладчыкам па класе баяна Яўгенам Маланковым. Хутка свет убачыў і першы зборнік для баяна «Бэзавы май». Другі зборнік ствараўся ўжо мэтанакіравана для калектыву магілёўскага Дома настаўніка, а там быў патрэбны фартэпіянны варыянт. У выніку «Падару табе лісце клёна» дапамагалі рабіць некалькі музыкантаў — Наталля Барынава, выкладчыца музычнага вучылішча і Уладзімір Брайлоўскі. Што датычыцца беларускага зборніка, то ён не мог не з'явіцца. Бо па сваёй адукацыі аўтарка — выкладчыца беларускай і рускай мовы і літаратуры. І вельмі захапляецца беларускай паэзіяй.

Самадзейная кампазітарка хутка пачала карыстацца вялікім поспехам, яе песні ўключалі ў рэпертуар вядомыя калектывы. Так было з акадэмічным хорам ветэранаў, якім кіруе выкладчык Беларускай дзяржаўнай акадэміі музыкі Мікалай Хвісюк.

— Хор выконвае маю песню «Дарагая планета Зямля» на верш Петруся Броўкі, — расказвае суразмоўца. — І Мікалай Хвісюк прызнаўся, што гэта адна з іх паспяховых песень. Яна вельмі ўрачыстая, сапраўдная ода зямлі. А пазнаёміліся мы з кіраўніком хора Беларускай дзяржаўнай акадэміі музыкі дзякуючы педагогам магілёўскага музычнага вучылішча, якія расказалі яму пра мяне, калі ён прыязджаў у Магілёў.

Наогул усё сваё жыццё Святлана Жорава мела справу з творчымі людзьмі. Пэўны час працавала загадчыцай дзіцячага сектара ў Доме культуры чыгуначнікаў. Потым вырашыла авалодаць замежнай мовай і дыстанцыйна вучылася чатыры гады на курсах павышэння кваліфікацыі для выкладчыкаў з вышэйшай адукацыяй у Кіеве. А калі з'явіўся ў праграме прадмет «марксісцка-ленінская этыка і эстэтыка», засвоіла і яго — закончыла курсы ў Магілёве і Мінску. Потым выкладала ўсе гэтыя прадметы. Цяпер яна ўжо на пенсіі, але не ўпускае магчымасці заняцца чымсьці новым, каб прыносіць карысць грамадству.

— Цяпер вельмі не хапае песень з прыгожымі тэкстамі, — лічыць яна. — Але ж існуе шмат шыкоўных вершаў вядомых паэтаў. Чаму не звярнуць на іх увагу? Усе тыя песні, якія я стварыла, пастаянна ў рабоце. У Магілёве іх спявае вакальная студыя пры Доме настаўніка. Адна з маіх песень «Сэрцам мы з табой, Магілёў», якая была створана да 750-годдзя горада, увайшла ў пяцёрку найлепшых і адзначана дыпломам. Мае песні ёсць у рэпертуары Шклоўскага дома культуры. Мясцовыя артысты двойчы выязджалі на конкурс ветэранскіх калектываў менавіта з маімі творамі. Іх ведаюць і ў Цэнтры культуры і вольнага часу аграгарадка Александрыя. Нават падарунак мне прывезлі ў падзяку — прыгожае дрэва з бісеру. Якаў Навуменка, які, дарэчы, там працаваў, высока ацаніў мой зборнік песень. Мы былі асабіста знаёмыя, і ён збіраўся на тры мае песні зрабіць аранжыроўкі.

Нэлі ЗІГУЛЯ

Загаловак у газеце: Адчуванне... музыкі

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.