Пачаўся зімова-вясенні прызыў у праект «Настаўнік для Беларусі»

Праграма «Настаўнік для Беларусі» аб’явіла старт новаму набору ініцыятыўных педагогаў на наступны навучальны год.

Размова ідзе пра сумесны праект БПС-Ашчадбанка і Міністэрства адукацыі, мэта якога — прыцягнуць у школы ў невялікіх гарадах і населеных пунктах крэатыўных і неабыякавых настаўнікаў, якія хочуць і могуць прыўнесці ў сваю прафесію новыя цікавыя ідэі, умеюць спраўляцца з цяжкасцямі, захоўваючы аптымізм, імкнуцца да самаразвіцця, гатовыя да змен (у тым ліку і да пераезду на новае месца) і вераць у свае сілы.

Жорсткіх абмежаванняў для ўдзелу ў праграме не існуе: гэта могуць быць як новаспечаныя выпускнікі педагагічных спецыяльнасцяў, так і вопытныя настаўнікі ці нават сям’я педагогаў. Ключавой з’яўляецца наяўнасць профільнай педагагічнай адукацыі або кваліфікацыя педагога.

Праграма адкрывае перад педагогамі ўнікальныя магчымасці для асабістага і прафесійнага росту праз удзел у Летнім інтэнсіве і падтрымліваючыя метадычныя мерапрыемствы. Кожны з іх становіцца часткай прагрэсіўнай настаўніцкай супольнасці.

Немалаважнай з’яўляецца і матэрыяльная падтрымка. Акрамя заработнай платы, удзельнікі праграмы атрымліваюць таксама стыпендыю за дадатковую нагрузку па рэалізацыі праектаў плюс кожны з іх будзе забяспечаны для зручнасці работы ноўтбукам.

Удзельнік сам выбірае і прапрацоўвае праект, які ён будзе рэалізоўваць. Гэта можа быць любая ініцыятыва — ад стварэння дэндрапарку на прылеглай да школы тэрыторыі да адкрыцця на яе базе курсаў па праграмаванні для дзяцей і дарослых. Абавязковая ўмова — ініцыятыва павінна арыентавацца на развіццё мясцовай супольнасці. Маштабны праект можа рэалізоўвацца некалькімі ўдзельнікамі.

Летась для ўдзелу у праграме «Настаўнік для Беларусі» былі абраныя дзевяць настаўнікаў, якія на два гады адправіліся працаваць у школы ў Кобрынскім (аграгарадок Павіцце), Бярэзінскім (Паплаўскі дзіцячы сад—сярэдняя школа), Чэрвеньскім (Лядзенскі дзіцячы сад — сярэдняя школа) раёнах, у гімназію ў Дзяржынску і Негарэльскую сярэднюю школу №1.

— Як вы думаеце, што прасцей: знайсці апантаных настаўнікаў ці школы, гатовыя іх прыняць? — разважае адзін з каардынатараў праграмы Алена МЕЛЬЧАНКА. — Для школ удзел у праекце можа стаць выдатнай інфармацыйнай нагодай, каб прыцягнуць да сябе ўвагу, і дадатковым імпульсам для развіцця ўстановы. Але сумясціць інтарэсы школ і профіль адабраных у выніку конкурсу педагогаў — задачка няпростая. Летась для ўдзелу ў праекце падало заяўкі каля 20 школ. Іх геаграфія ахоплівала ўсе рэгіёны Беларусі. У самым вострым дэфіцыце былі настаўнікі матэматыкі. Таксама прасілі даслаць да іх фізікаў, настаўнікаў інфарматыкі, геаграфіі, фізічнай культуры, беларускай, рускай і нават кітайскай мовы.

Першы крок для ўдзелу ў праграме — запаўненне анкеты на сайце tеасh4.bу. Прыём анкет першай хвалі заканчваецца 10 лютага, другой — 4 мая. Пасля разгляду анкеты пры ўмове яе адпаведнасці крытэрыям удзелу ў Праграме з суіскальнікам звяжацца прадстаўнік каманды «Настаўнік для Беларусі» для правядзення дыстанцыйнага інтэрв’ю. Пры паспяховым яго праходжанні педагог атрымлівае запрашэнне на ўдзел у вочным туры адбору ў Мінску. Для таго каб найбольш аб’ектыўна падысці да выбару будучых удзельнікаў «Настаўніка для Беларусі», камандай праекта з прыцягненнем спецыялістаў па падборы персаналу была распрацавана «Мадэль кампетэнцый», якая грунтуецца на місіі і каштоўнасцях праекта і акумулюе ў сабе вопыт аналагічных праграм па ўсім свеце.

— Мы настроены вельмі аптымістычна, — падкрэслівае Алена Мельчанка. — Спадзяёмся, што другі набор будзе ўдвая большы за папярэдні. Чакаем людзей нераўнадушных, з актыўнай жыццёвай пазіцыяй, разуменнем уласных магчымасцяў, здольных захапіць сваёй ідэяй і павесці за сабой. І мы вельмі чакаем, што геаграфія школ — удзельніц праекта таксама ў наступным навучальным годзе пашырыцца...

Надзея НІКАЛАЕВА

Фота дадзена каардынатарамі праграмы «Настаўнік для Беларусі».