Вынікі акцыі «Прыгажуні Міншчыны — багацце краіны» былі падведзены падчас абласнога конкурсу «Міс Міншчыны», які прайшоў у Барысаўскім палацы культуры імя Максіма Горкага.
У выніку папярэдняга адбору ў фінале выступілі 72 самыя прыгожыя, упэўненыя ў сабе дзяўчыны Міншчыны. Па ўмовах конкурсу прэтэндэнткі на карону і галоўны тытул павінны былі мець ад васямнаццаці да дваццаці чатырох гадоў і рост не менш за 174 сантыметры.
Падзеі на сцэне ўстановы культуры развіваліся па класічным сцэнарыі конкурсаў прыгажосці: дэфіле ў кактэйльных і вячэрніх сукенках, купальных касцюмах. Але адной знешняй прывабнасці было недастаткова, неабходна было паказаць свой розум, кемлівасць і інтэлект. І кожная з удзельніц імправізавала на сцэне.
У складзе журы былі прадстаўнікі мадэльнай індустрыі, дзяржаўных органаў, вядомыя артысты, дзеячы культуры, спецыялісты сферы моды і прыгажосці, перад якімі стаяла нялёгкая задача — з лепшых выбраць найлепшых, тых, хто будзе ўдастоены звання «Міс Міншчыны» і прадставіць вобласць на рэспубліканскім конкурсе.
Як прызналася «Міс Беларусь — 2018», дэпутат Палаты прадстаўнікоў Нацыянальнага сходу Марыя Васілевіч, абмеркаванне выступленняў некаторых прэтэндэнтак ішло доўга. Асабіста для яе як члена журы былі важныя не толькі знешнія даныя канкурсантак, але і ўменне трымацца на сцэне, харызматычнасць. У выніку Віялета Герасімчук з Пухавіцкага раёна стала другой «Віцэ-Міс», першай — Аліна Палашчук з Салігорска, «Міс фота» — Ганна Мілеўская з Маладзечна. А прыз глядацкіх сімпатый атрымала Дар'я Фесіна з Чэрвеня! Госці мерапрыемства аддалі за яе голас шляхам СМС-галасавання. Ну, а галоўны тытул «Міс Міншчыны» дастаўся студэнтцы БДУ Вераніцы Кушалевай з Лагойска.
Вераніка з дзяцінства займаецца ў мадэльнай школе. Так што подыум для яе рэч звычайная. Аднак, як прызналася першая прыгажуня Міншчыны, яна вельмі хвалявалася. Мадэль акрамя ўсяго займаецца яшчэ і дызайнам адзення і марыць стварыць сваю калекцыю.
Сапраўды, конкурс стаў інтэлектуальным і феерычным шоу, паказаў, што разам з прывабнай знешнасцю дзяўчаты валодаюць унутранай прыгажосцю, рознабаковымі ведамі і маюць захапленні.
Удзельніц павіншаваў і падзякаваў ім за ўдзел намеснік старшыні Мінаблвыканкама, старшыня журы конкурсу Іван Маркевіч:
— Дзяўчаты сапраўдныя разумніцы. Кожная з гэтых прыгажунь змагла б прадставіць нашу краіну на міжнародных конкурсах. Сёння мы яшчэ раз упэўніліся, што прыгажосць не толькі кіруе светам, яна ратуе свет.
Таццяна ЛАЗОЎСКАЯ
Мерапрыемства праводзілася на добраахвотнай аснове.
Не выявіць ні секунды абыякавасці.
