Вы тут

Хто спявае па-беларуску?


Многія сёння падзяляюць меркаванне, што ў нашай краіне шоў-бізнесу не існуе. Але сітуацыя карэнным чынам змяняецца, калі пачынаеш глыбей цікавіцца гэтай тэмай. Да прыкладу, на тыдні з’явілася прыемная навіна: кліп на хіт “Небяспечна” магілёўскага рок-гурта Nizkiz пераступіў адзнаку ў мільён праглядаў на YouTube! Гурта, які пачынаў з невялічкіх клубаў на 100 чалавек, а цяпер мае салдаўт ледзь не на кожным сваім выступленні! І гэта не адзіны прыклад.

У Міжнародны дзень роднай мовы “Звязда” стварыла адмысловы плэйліст, у які ўвайшлі сучасныя артысты самых розных жанраў: ад мадэрновага хіп-хопа да таямнічай электронікі.


Поп

Фота afisha.tut.by

Выпускаючы свой першы дыск “Адчувай” у 2017-м, поп-гурт Паліны Цімохінай Pauline каментаваў сваю працу так: “Усё гэта гісторыі чалавека тонкага, шчырага, ранімага, які, можа, нават дзесьці заблытаўся, але ў той жа час моцнага, які заўсёды беражліва захоўвае надзею на нешта лепшае”. Альбом з меланхалічным і лірычным настроем з’яўляўся для сваіх стваральнікаў своеасаблівай вехай, сканчэннем пэўнага творчага этапу. Але цяжка было прадказаць, што ў далейшым адбудзецца столькі зменаў: назва, стыль, нават склад! Абноўлены гурт Paulinn летась прадставіў EP “Мадуляцыя”. “Гэтая праца адметная тым, што ўпершыню я выступіла ў якасці аўтара для дуэту, усе аранжыроўкі рабіліся ўласнымі рукамі і з выкарыстаннем новых для нас метадаў і інструментарыя”, — дзялілася ў размове з музычным парталам Tuzin FM Паліна Цімохіна.

 

Хіп-хоп

Gleboki Smak. Рэп па-беларуску? Так! Глеб Хамутоў, стваральнік праекта Gleboki Smak, “стрэліў” у 2011 годзе, калі перамог на фрыстайл-батле Street Awards, а праз два гады выпусціў свой першы трэк. Пасля хлопец на некалькі гадоў знік з інфапрасторы, каб вярнуцца сур’ёзна і надоўга з дэбютным альбомам “Drenny ton”. У інтэрв’ю Глеб казаў, маўляў, за апошні час з’явілася шмат новых асобаў, аднак з беларускамоўным рэпам “усё сумна”. “Але ж ёсць Gleboki Smak! Больш вам ніхто не патрэбны”.

 

Дазволім сабе не пагадзіцца з гэтымі словамі, бо сам Глеб запісаў прыгожы фіт з іншай узыходзячай зоркай беларускамоўнага хіп-хопа — ZRABI. Барбара Гузарэвіч з дзяцінства займалася музыкай: вучылася ў музычнай школе, паступіла ў каледж мастацтваў на эстрадны вакал, які, зрэшты, не скончыла. Творчасцю занялася натхнёная думкай, што беларусы калісьці загавораць па-беларуску.

Фота people.onliner.by

Спявачка імкнецца “падштурхнуць успомніць пра „сваё“ праз нешта сучаснае” і пазбавіцца адчування, “што беларуская мова — гэта толькі Якуб Колас і Янка Купала, што яна засталася дзесьці ў XX стагоддзі. Я хачу разбурыць папулярныя сярод моладзі стэрэатыпы, што наша мова непрыгожая і не стыльная”.

 

Альтэрнатыва

Фота з "твітара" гурта AKUTE.

AKUTE. Магілёўскае трыа па-рознаму апісвае сваю творчасць: “дыска-дэкаданс”, “смерць-рок”… Зрэшты, такія азначэнні толькі выдзяляюць “Акутэ” на беларускай рок-сцэне. Іх разынка — змрочныя аранжыроўкі і мінорна-рамантычная лірыка, натхнёная навуковай фантастыкай XX стагоддзя: Рэем Брэдберы, братамі Стругацкімі, Айзекам Азімавым. Але нязменна на беларускай мове.

У рэпертуары хлопцаў (і дзяўчыны — бубначкі Vicky Fatez) ужо пяць паспяховых альбомаў. Апошні — “V” — прадставілі летась. Гучанне змянілася: падчас запісу музыкі выкарыстоўвалі сінтэзатар. І адзначалі ў інтэрв’ю: гэта рэзультат, да якога яны ішлі ўсю кар’еру, пачынаючы з дэбютнага рэлізу “Дзевачкі і космас”.

Сёння AKUTE — заўсёднікі шматлікіх беларускіх фестываляў.

 

 

:B:N:, альбо “Бяз назвы” — бадай, самы пазітыўны беларускі рок-калектыў. Датай яго заснавання лічыцца 1999 год. У 2002-м гурт перамог на “Басовішчы” і выпусціў свой першы дэма-альбом — “Пра сябе”. За сваю далейшую гісторыю :B:N: стварыў шмат “стадыённых” хітоў, такіх як “Жыве рок-н-рол!”, “Канюшня”, “Вяртанне”, “Табе ўсё мала”, “Паралельны свет”, якія заўсёды гучаць на канцэртах. Апошні ж на гэты момант альбом — “#коджыцця” — пабачыў свет у 2018 годзе. У яго таксама ўвайшлі песні з папярэдняй пласцінкі — “Шукай сваё”.

Цікавы факт: лідар “Бяз назвы” Алесь Лютыч — муж бубначкі AKUTE Vicky Fatez. Музыкі маюць уласны праект Lovestory.

 

Nürnberg. Малады беларускі дуэт працуе ў вельмі папулярным сёння стылі — пост-панку з рэтра-вэйвам 1980-х. Назва паводле нямецкага горада аказалася для хлопцаў прарочай: дэбютная касета (!) пабачыла свет у сталіцы Германіі. Зрэшты, Ян (вакал, бас) і Алег (гітара) працягваюць тварыць у Беларусі, у адрозненне ад звышпапулярнага ў Еўропе і амаль невядомага ў нас гурта “Молчат дома”, які грае ў той жа стылістыцы.

А сёння прапануем паслухаць альбом “Скрывай” 2018 года.

 

“Мутнаевока”. Мінскі гранжавы праект заснаваны Яўгенам Змушкам (вакал, гітара) у 2005-м. За гады дзейнасці каманда паспела выступіць на адной сцэне з вядомымі расійскімі калектывамі Animal ДжаZ і Noize MC, а таксама “разагравала” Палац спорту перад канцэртам фінаў The Rasmus (пазней гэтаксама выступалі AKUTE). Што да рэпертуара — запісаны тры альбомы. Зараз фанаты чакаюць новую пласцінку, з якой ужо выдадзеныя два сінглы: “Лініі” і “Розныя”.

Цікавая адметнасць жывых выступленняў “Мутнаевока”: Яўген Змушка паміж песнямі чытае ўласныя вершы, а выраз “Добрай раніцы, краіна!” — яго фірмовае вітанне.

 

Электроніка

Фота ultra-music.com.

Shuma. Гэты дуэт пераасэнсоўвае старажытныя беларускія спевы, спалучаючы іх з сучаснымі накірункамі электронікі (дып хаўсам, даб тэхна, мінімалам). Прыхільнікі называюць трэкі дуэта “гукавымі знахарамі”, а эксперты адзначаюць узнагародамі: альбом года, найлепшы электронны альбом, найлепшы беларускі альбом…

Shuma добра вядомая ў Беларусі. Гурт выйшаў у фінал нацыянальнага адбору на Еўрабачанне-2018 з песняй “Хмаркі”, а яго лідарка Руся разам з этна-трыа “Троіца” ўдзельнічала ў запісу саўндтрэкаў для гульні World of Tanks. І нават паспела стаць голасам мінскага чыгуначнага вакзала!

Акрамя таго, летась яна стала мамай… і выпусціла аб гэтым альбом. Me, mother — пра розныя станы мацярынства і перажыванні ўзаемаадносін чалавека з маці, ад эйфарыі да агрэсіі. Гучыць мягка і гіпнатычна.

 

Арсеній ЧУПРЫГІН

Выбар рэдакцыі

Культура

Пошук вечнага жыцця

Пошук вечнага жыцця

Шмат разоў, збочыўшы з брэсцкай трасы, праязджаючы ад Міра да Карэліч, царкву на могілках каля вёскі Загор'е выхопліваеш літаральна за лічаныя секунды.

Спорт

Ірына Курачкіна заваявала серабро Алімпійскіх гульняў!

Ірына Курачкіна заваявала серабро Алімпійскіх гульняў!

 У фінале спаборніцтваў па жаночай барацьбе яна ўступіла японцы Рысака Каваі. 

Грамадства

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Па заказе ЗАТ «Другі нацыянальны тэлеканал» — АНТ з 5 па 21 ліпеня Аналітычны цэнтр ЕсооМ з прыцягненнем фонду «Украінская палітыка» правёў

Палітыка

Літоўцы раскручваюць крывавую хвалю гвалту

Літоўцы раскручваюць крывавую хвалю гвалту

З беларуска-літоўскай граніцы працягваюць паступаць весткі, ад якіх проста кроў стыне ў жылах.