Вы тут

Спартыўныя трэнажоры і медыцынскае абсталяванне атрымалі ўстановы Брэстчыны


Спартыўныя трэнажоры для школы, а таксама медыцынскае абсталяванне атрымалі гэтымі днямі ўстановы Брэстчыны ў межах праграмы ўрада Японіі «Карані травы». Агульная сума сродкаў, якія выдзелены для гэтых мэт, — 166 тысяч долараў.


Сярэдняя школа № 2 Століна стала першай беларускай адукацыйнай установай, праект якой перамог у конкурсе пасольства Японіі ў Беларусі. Школа выйграла грант у памеры 8439 долараў для набыцця спартыўных трэнажораў і інвентару. 26 лютага падчас урачыстай цырымоніі Надзвычайны і Паўнамоцны Пасол Японіі ў Рэспубліцы Беларусь Хірокі Такунага перадаў набытае абсталяванне школе і павіншаваў з перамогай дырэктара адукацыйнай установы Алу Лазіцкую.

Праз дзень урачыстая цырымонія прайшла ў дзвюх бальніцах Брэсцкай вобласці. Брэсцкая абласная дзіцячая бальніца атрымала новы артраскоп і гастраскоп. Ад урада Японіі медыцынскай установе было пералічана 79 272 долары на закупку гэтага дыягнастычнага абсталявання.

Свой новы гастраскоп, дзякуючы ўдзелу ў праграме, з'явіўся і ў Іванаўскай цэнтральнай раённай бальніцы. На яго закупку ўстанове аховы здароўя выдзелілі 78 365 долараў. Цяпер такое дыягнастычнае абследаванне, як гастраскапія, для жыхароў Іванаўскага раёна стане больш даступнае.

З 2004 года пасольства Японіі ў Беларусі рэалізуе праграму «Карані травы — грантавая дапамога для праектаў па забеспячэнні бяспекі чалавека». Яе асноўная мэта — дапамагчы людзям, якія пацярпелі ад катастрофы на Чарнобыльскай АЭС і яе наступстваў. За гэты час рэалізавана 52 праекты, і столькі ж устаноў, пераважна медыцынскіх, атрымалі магчымасць закупіць новае абсталяванне.

Агульная сума грантаў, выдадзеных з 2004 да 2020 года, складае больш за чатыры мільёны долараў, а колькасць адзінак закупленага абсталявання перавышае 250.

Алена КРАВЕЦ

Загаловак у газеце: Новае абсталяванне — установам Брэстчыны

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.