Беларускія спартсмены будуць трэніравацца на радзіме ў сувязі з пераносам Алімпіяды

У сувязі з рашэннем МАК аб пераносе Алімпійскіх гульняў у Токіо беларускія спартсмены мяняюць свае трэніровачныя планы. Аб гэтым БелТА расказаў прэс-сакратар Міністэрства спорту і турызму Уладзімір Несцяровіч.

Паводле яго слоў, у цяперашні час на замежных вучэбна-трэніровачных зборах у розных кутках планеты знаходзяцца каля ста беларускіх атлетаў. Мінспорту прыкладае ўсе намаганні, каб яны ў самыя бліжэйшыя дні вярнуліся на радзіму. Штодня ў органы санітарнага кантролю і Дзяржаўны памежны камітэт накіроўваецца інфармацыя па кожнаму спартсмену і сябру спартыўнай дэлегацыі, якія прыбываюць з-за мяжы. Усе праходзяць праверку на наяўнасць каранавіруса. Прадстаўнікі цэнтраў алімпійскай падрыхтоўкі сустракаюць кожнага і адпраўляюць на каранцінныя мерапрыемствы.

Ужо вызначаныя 4 базы, дзе прадугледжаны санітарна-эпідэмічны рэжым, медыцынская рэабілітацыя і назіранне за спартыўнымі дэлегацыямі. Для ўсіх усталяваны абавязковы каранцін на 14 дзён. Выезды за мяжу на вучэбна-трэніровачныя зборы і спаборніцтвы часова забароненыя, сказаў Уладзімір Несцяровіч. Ён таксама падкрэсліў, што ў Беларусі для спартсменаў створаны ўсе неабходныя ўмовы для якаснага трэніровачнага працэсу, таму праблем з падрыхтоўкай да спаборніцтваў няма, спартыўная інфраструктура дазваляе прадстаўнікам ўсіх відаў праводзіць паўнавартасныя заняткі.

У цяперашні час 72 беларускія атлеты, якія прадстаўляюць 15 відаў спорту, выканалі кваліфікацыйныя патрабаванні і нарматывы, якія даюць права выступіць на Алімпіядзе ў Токіо. Пакуль адборачныя турніры да Гульняў прыпыненыя ў сувязі з распаўсюджваннем COVID-19, а пасля іх аднаўлення беларусы маюць намер заваяваць яшчэ некалькі дзясяткаў алімпійскіх квот, адзначыў прэс-сакратар Мінспорту.

Як паведамлялася, ХХХII летнія Алімпійскія гульні, якія павінны былі прайсці ў японскай сталіцы з 24 ліпеня па 9 жніўня 2020 года, былі перанесены на год з-за пандэміі каранавіруса. Новыя тэрміны правядзення Алімпіяды будуць названы пазней.