Вы тут

Хто паставiць кропку ў спрэчцы вакол пакупкі за адну базавую?


Прадпрымальнiк i iнвалiд 3-й групы вырашыў набыць будынак для свайго прадпрыемства. Купiў яго на аўкцыёне за адну базавую велiчыню. I збiраўся адразу ж пачаць вытворчасць. Аднак высветлiлася, што гэта немагчыма: у прыватнасцi, у памяшканнях адсутнiчае электраправодка, зрэзаны батарэi i ацяпляльны кацёл. Перамовы з былым уласнiкам, якi адказваў за захаванасць маёмасцi, плёну не прынеслi. Больш за тое, ранейшы ўласнiк цяпер звярнуўся ў суд i патрабуе вярнуць будынак, бо ў яго — свая праўда.


Запатрабаваная прадукцыя

Той самы будынак Старагуткоўскай бiблiятэкi-клуба.

— Наша кампанiя — навукова-вытворчая ўкараняльная арганiзацыя «Бяспечнае жыццё» — з'яўляецца распрацоўшчыкам унiкальных вырабаў, запатэнтаваных на тэрыторыi Беларусi i Расii, — расказвае яе дырэктар Дзмiтрый Захарэвiч. — Я iнвалiд, перанёс iнфаркт мiякарда i клiнiчную смерць. I мы ствараем рабочыя месцы для людзей з iнвалiднасцю — iмкнёмся, каб iх было да 100 %. Гэта маё жыццёвае крэда. Прымаем iнвалiдаў па праграме адаптацыi.

Прадукцыя прадпрыемства сацыяльна-значная. Гэта матрацы з напаўняльнiкам, якi не гарыць, для бальнiц, дамоў-iнтэрнатаў, дзiцячых лагераў, падушкi ў iнвалiдныя крэслы, шматразовыя падгузнiкi, шматразовыя жаночыя пракладкi, у тым лiку i ўралагiчныя.

Па словах Дзмiтрыя Захарэвiча, атрымаць памяшканне ў арэнду для прадпрыемства, дзе працуюць iнвалiды, складана. Згодна з Указам Прэзiдэнта № 150 «Аб некаторых пытаннях арэнды i бязвыплатнага карыстання маёмасцю» прадпрыемствам, дзе працуе больш за палову iнвалiдаў, iльгацiруецца арэндная плата, у прыватнасцi, да iх прымяняецца панiжальны каэфiцыент.

— У рэальнасцi арандаваць памяшканне амаль немагчыма, бо калi даведваюцца, што будзе працаваць такое прадпрыемства, адразу адмаўляюць. Тлумачаць тым, што падаткi давядзецца заплацiць большыя, чым атрымаюць ад арэнднай платы. Але ж калi будынак прастойвае, ён усё роўна патрабуе эксплуатацыйных расходаў, i падаткi яны таксама плацяць, — аргументуе субяседнiк.

Камень спатыкнення

У вераснi мiнулага года Дзмiтрый Захарэвiч набыў на аўкцыёне за адну базавую велiчыню будынак. Гэта былая бiблiятэка-клуб у вёсцы Стары Гуткоў Слуцкага раёна.

— Мы звярнулiся ў Слуцкi райвыканкам па прамых тэлефонных лiнiях. Аддзел эканомiкi даслаў мне прапановы, скiнуў фотаздымкi. Мяне ўсё задаволiла. А паколькi праз два-тры днi меў адбыцца аўкцыён, будынак я не паспяваў паглядзець.

Такiм чынам, кампанiя «Бяспечнае жыццё» Дзмiтрыя Захарэвiча набыла асобна стаячы аднапавярховы будынак Старагуткоўскай бiблiятэкi-клуба 1962 года — пабудовы з дзвюма прыбудовамi агульнай плошчай 237,8 кв. м — без папярэдняга агляду.

— Мы выканалi ўсе ўмовы аўкцыёну, цалкам прайшлi працэдуру. Заключылi дамову куплi-продажу. Будынак быў у распараджэннi аддзела iдэалагiчнай работы, культуры i па справах моладзi Слуцкага райвыканкама. Калi паехаў глядзець будынак, ён аказаўся папросту разрабаваны! Зрэзаны батарэi i ацяпляльны кацёл, знiшчана ўся электраправодка. Тым часам у тэхпашпарце значыцца кацельня, а гэта сiстэма ацяплення. Яе наяўнасць нават не павiнна агаворвацца аўкцыённымi дакументамi. Гэта недзялiмае цэлае.

Але адмаўляцца ад набытку Дзмiтрый Захарэвiч не стаў. Са слоў прадпрымальнiка, дагавор куплi-продажу быў зарэгiстраваны 17 кастрычнiка, поўная аплата зроблена 4 лістапада. На працягу 10 дзён з моманту аплаты яму павiнны былi перадаць будынак — тэхпашпарт i ключы па акце прыёмкi-перадачы.

— У дагаворы пазначана, што я набыў яшчэ i прыбiральню (надворную пабудову), дарожку i агароджу. Калi я прыехаў на месца, прыбiральнi не аказалася, дарожка — не ў той колькасцi, што ў дагаворы, агароджа часткова разабраная. Я патрабаваў указаць у акце прыёмкi дарожку, прыбiральню i агароджу, а таксама каб былi ўказаны адзiнкi вымярэння. Склалi яшчэ адзiн акт, але дарожка павiнна вымярацца ў метрах квадратных, а не ў штуках, агароджа — у метрах квадратных. У вынiку акт мне дагэтуль так i не прадставiлi.

Акт прыёмкi-перадачы i стаў каменем спатыкнення, ён дагэтуль так i не падпiсаны. Так цi iнакш, каб пачаць фiнансава-гаспадарчую дзейнасць, Дзмiтрый Захарэвiч зарэгiстраваў у Старым Гуткове юрыдычны адрас свайго прадпрыемства. I паралельна звярнуўся ў праваахоўныя органы, каб высветлiць, куды ж знiкла частка маёмасцi.

— У ходзе праведзенага 17.12.2019 агляду ўстаноўлена, што ў гаражным боксе ў гарадскiм парку Слуцка, а гэта як мiнiмум за 30 кiламетраў ад майго будынка, захоўваецца чыгунны кацёл. Праведзеным аглядам дакладна iдэнтыфiкаваць кацёл не ўяўляецца магчымым з прычыны адсутнасцi на iм тлумачальных надпiсаў, — зачытвае адказ з УБЭЗ суразмоўца. — Аказваецца, кацёл узялi для захоўвання. I яго, дарэчы, мне дагэтуль не вярнулi. З тлумачэння былога загадчыка матэрыяльна-тэхнiчнага забеспячэння Слуцкай раённай бiблiятэкi вынiкае, што на момант закрыцця будынка ў 2014 годзе з яго вывезлi ўсю маёмасць.

Па фактах крадзяжу радыятараў i электраправодкi РАУС правёў праверку, па вынiках якой вынесена пастанова аб адмове ва ўзбуджэннi крымiнальнай справы, бо кошт маёмасцi не перавысiў 10 базавых велiчынь. Такi адказ прадпрымальнiка не задаволiў.

— У будынку парушана ўся сiстэма ацяплення. I для таго, каб яе цяпер аднавiць, патрэбны дзясятак тысяч долараў, бо гэта ж прамысловае прадпрыемства, — канстатуе Дзмiтрый Захарэвiч.

Не знайшоўшы паразумення з пакупнiком, былы ўласнiк будынка — а гэта аддзел iдэалагiчнай работы, культуры i па справах моладзi Слуцкага райвыканкама — падаў у суд iскавую заяву, каб у аднабаковым парадку скасаваць дагавор куплi-продажу.

— Калi здзелка будзе скасавана, прадпрыемства не зможа працаваць. А мы ўжо гатовы — пачнём за пару дзён. Я гатовы абсталяваць рабочыя месцы i вырабляць прадукцыю, — сцвярджае прадпрымальнiк. — З'явяцца сродкi, i паступова можна будзе рабiць нейкi рамонт, аднаўляць будынак. Грошы пачнуць паступаць у бюджэт. Але пакуль мне не перадалi нi ключы, нi тэхнiчны пашпарт, а прапануюць падпiсаць беставарны акт прыёмкi-перадачы. Хацелася б вырашыць пытанне мiрна, а не закрываць прадпрыемства. Але былы ўласнiк заняў прынцыповую пазiцыю: скасаваць здзелку любой цаной.

«Пытанне вырашаецца ў судовым парадку»

Па каментарый «Звязда» звярнулася ў аддзел iдэалагiчнай работы, культуры i па справах моладзi Слуцкага райвыканкама. Вось што нам адказаў начальнiк аддзела Мiхаiл Варабей:

— Будынак Старагуткоўскай бiблiятэкi-клуба не выкарыстоўваецца з 2014 года. На працягу 2015—2019 гадоў ён неаднаразова выстаўляўся на продаж з аўкцыёну камiтэтам «Мiнскаблмаёмасць». На падставе вынiкаў аўкцыёну ад 24 верасня 2019 года з ТАА «НВУА «Бяспечнае жыццё» быў заключаны дагавор куплi-продажу № 1 ад 03.10.2019 г. Цана продажу вызначана па вынiках таргоў i склала 26,78 рубля.

Прадметам дагавора з'яўляецца будынак Старагуткоўскай бiблiятэкi-клуба з дзвюма прыбудовамi, дарожкай i агароджай, агульнай плошчай 237,8 кв. м, 1962 года пабудовы, аднапавярховы, асобнастаячы, размешчаны па адрасе: Мiнская вобласць, Слуцкi раён, Вясейскi сельсавет, вёска Стары Гуткоў, вул. Цэнтральная, 32.

Дагавор куплi-продажу зарэгiстраваны пакупнiком 17.10.2019 г. Поўная аплата цаны продажу аб'екта ажыццёўлена 04.11.2019 г.

У адпаведнасцi з умовамi дагавора на працягу 10 рабочых дзён пасля прадастаўлення пакупнiком плацежных дакументаў аб поўнай аплаце цаны продажу аб'екта прадавец абавязуецца перадаць аб'ект пакупнiку, а пакупнiк абавязуецца прыняць аб'ект ва ўласнасць у адпаведнасцi з актам прыёму-перадачы.

Акты прыёму-перадачы асноўных сродкаў прадастаўлены Таварыству з абмежаванай адказнасцю «Бяспечнае жыццё» i ў цяперашнi момант таварыствам не падпiсаны.

Дагавор арэнды зямельнага ўчастка № 54/19 ад 03.09.2019 г. таварыствам «НВУА «Бяспечнае жыццё» не зарэгiстраваны.

Па стане на 24.03.2020 г. будынак Старагуткоўскай бiблiятэкi-клуба знаходзiцца ва ўласнасцi Слуцкага раёна i належыць на праве аператыўнага кiравання аддзелу iдэалагiчнай работы, культуры i па справах моладзi Слуцкага райвыканкама.

На гэты момант пытанне аб скасаваннi дагавора вырашаецца ў судовым парадку.

Алена КРАВЕЦ

Загаловак у газеце: Будынак разладу

Выбар рэдакцыі

Грамадства

Псiхолаг тлумачыць, чаму паўза пасля заканчэння школы — не трагедыя

Псiхолаг тлумачыць, чаму паўза пасля заканчэння школы — не трагедыя

Педагогi, як i бацькi, павiнны быць уважлiвыя да любой праявы адоранасцi.

Эканоміка

Як вылечыць эканомiку ад каранакрызiсу?

Як вылечыць эканомiку ад каранакрызiсу?

Нягледзячы на тое што сучасны свет перажываў досыць шмат эканамiчных крызiсаў, той, што разгортваецца ў 2020 годзе, — унiкальны. 

Грамадства

Маладая актрыса Iрына Якавец: Нецiкавых роляў не iснуе

Маладая актрыса Iрына Якавец: Нецiкавых роляў не iснуе

Першым спектаклем, у якiм я ўзяла ўдзел, быў «Вясёлы Роджэр».

Грамадства

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Андрэй Худык: Неабходная мабілізацыя ўсіх узроўняў улады, грамадства і бізнесу для сумесных дзеянняў па ахове прыроды

Ад таго, наколькі беражліва людзі ставяцца да прыроды, залежыць якасць іх жыцця, здароўе і нават дабрабыт.