Каранавiрус вельмi паўплываў на наша звычайнае жыццё, звычкi i ўнёс пэўныя карэкцiроўкi ў работу самых розных структур. Мы ж даведалiся, як змянiўся рэгламент прыборкi ў сталiчным грамадскiм транспарце i пад'ездах жылых дамоў.
Прыборка i дэзынфекцыя салонаў аўтобусаў, тралейбусаў i трамваяў праводзiцца з 22 гадзiн вечара да 5 гадзiн ранiцы — калi транспарт вяртаецца ў паркi «Мiнсктранса» пасля заканчэння змены. У гэты час працiраюць сядзеннi, поручнi, вокны i дзверы, пластыкавыя элементы абiўкi салона, свяцiльнi, прыбiраюць бруд, робяць вiльготную прыборку падлогi i дэзынфекцыю. Акрамя гэтага, дэзынфекцыю транспарту праводзяць на станцыях у абедзенны перапынак i ў час перазменкi кiроўцаў (з 8.30 да 11.00 i з 18.30 да 21.30).
У Мiнскiм метрапалiтэне прыбiраюць тэрыторыю, прылеглую да ўваходаў на станцыi, пераходы i вестыбюлi, платформы, маршавыя лесвiцы i калiдоры, службова-вытворчыя, бытавыя i падсобныя памяшканнi. Пры гэтым перыядычная прыборка ажыццяўляецца па меры неабходнасцi, бягучая — з 8.00 да 20.00, а асноўная (начная) — з 20.00 да 8.00.
Больш за тое, у метрапалiтэне адзначаюць, што ў сувязi з пагрозай распаўсюджання каранавiруса прадпрыемства разам з намеснiкам галоўнага дзяржаўнага ўрача Мiнска распрацавала новы рэгламент прыборкi i дэзынфекцыi на станцыях i ў рухомым саставе метрапалiтэна.
Напрыклад, санiтарная прыборка i дэзынфекцыя вагонаў метро, кабiны машынiста праводзiцца кожны раз, калi цягнiк заязджае ў дэпо на тэхнiчнае абслугоўванне цi кароткачасовы адстой. Перад гэтым ажыццяўляецца знешняя мыйка саставаў. На станцыях жа мыюць i дэзынфiцыруюць дзвярныя ручкi, касавыя зоны, турнiкеты, поручнi i балюстрады эскалатараў, лаўкi, лесвiцы i кабiны лiфтоў — усе тыя месцы, да якiх можа дакрануцца пасажыр.
Акрамя таго, на падлозе каля кас абазначаны месцы, дзе павiнен знаходзiцца пасажыр у той момант, калi iншы пасажыр набывае праязныя дакументы ў касiра. У вестыбюлях усiх станцый устаноўлены бескантактныя сэнсарныя дазатары з антысептыкам, а ў рабочыя днi з 9.00 да 10.00 метрапалiтэн скарацiў iнтэрвалы руху цягнiкоў да дзвюх хвiлiн, каб не было вялiкага натоўпу пасажыраў.
Новыя рэгламенты прыборкi з'явiлiся i на прадпрыемстве «Гаррамаўтадар» i ў яго структурных падраздзяленнях. Сродкi дэзынфекцыi выкарыстоўваюць на прыпынках грамадскага транспарту, імі праціраюць лаўкі, парэнчы лесвiц, праводзяць вiльготную прыборку на лесвiчных сходах падземных пераходаў, у лiфтах i на пад'ёмных платформах. Напрыклад, парэнчы лесвiц на вулiцах працiраюць адзiн раз на суткi, лiфты i пад'ёмныя платформы — два разы. Таксама часцей пачалi рабiць дэзынфекцыю ў грамадскiх прыбiральнях — не меней чым тры разы за суткi.
У сваю чаргу, у Мiнскай гарадской жыллёвай гаспадарцы адзначылi, што супрацоўнiкi ЖЭУ сумесна з санiтарнымi службамi таксама пачалi дэзынфiцыраваць пад'езды жылых дамоў. Цяпер акрамя звычайнай уборкi кожны дзень праводзiцца дэзынфекцыя як самога пад'езда, так i ўваходнай групы — адпаведнымi сродкамi апрацоўваюць дзверы, дамафоны, паштовыя скрынi, парэнчы, лiфты.
Валерыя КIСЛАЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
