Вы тут

У Віцебскім раёне ствараецца сістэма мабiльнай рэабiлiтацыйнай дапамогi


У састарэлых людзей на поўначы краiны, якiя падчас пандэмii найбольш рызыкуюць заразiцца, з'явiлася магчымасць лiшнi раз не турбаваць медыкаў. Наш карэспандэнт на свае вочы ўбачыў, як у Вiцебскiм раёне ўкараняецца новая iнiцыятыва стварэння мабiльнай рэабiлiтацыйнай дапамогi.


Да аграгарадка Кiраўская, дзе праводзiцца эксперымент, ад абласнога цэнтра зусiм недалёка. Тут жыве каля 1040 чалавек. Цiкава, што тутэйшыя жыхары — ужо не адно пакаленне — жартоўна называюць свой вельмi ўтульны гарадок Кубай.

Лiтаральна хвiлiн дзесяць ад кальцавой трамвая — i вы ўжо ў пасёлку з усiмi выгодамi. У мясцовым садку, пабудаваным яшчэ ў савецкiя часы, ёсць свой басейн. Ёсць у Кiраўскай i школа, праваслаўная царква, крамы, ФАП.

Аддзяленне сацыяльнай рэабiлiтацыi для грамадзян пажылога ўзросту i iнвалiдаў тэрытарыяльнага цэнтра сацыяльнага абслугоўвання насельнiцтва Вiцебскага раёна адкрылася тут мiнулай восенню, калi святкавалi «Дажынкi». Загадчыца Алена Варашэнь з гонарам падкрэслiвае, што менавiта ў iх установе з'явiўся першы ў раёне сенсорны пакой для пажылых. Сярод iншага тут ёсць i труба для вiзуальнай стымуляцыi зроку. Глядзець на вiдовiшча, калi яна працуе, можна доўга: i нервы супакойвае, i прыгожа, i зрок паляпшаецца натуральна... А яшчэ можна прыняць «сухi душ», навучыцца займацца самамасажам i не толькi.

Цяпер прадстаўнiкi ведамства сацыяльнай дапамогi засвойваюць новую практыку работы з састарэлымi.

— У няпростай эпiдэмiялагiчнай сiтуацыi тэрытарыяльны цэнтр сацыяльнага абслугоўвання насельнiцтва Вiцебскага раёна i кафедра медыцынскай рэабiлiтацыi i фiзiчнай культуры Вiцебскага дзяржаўнага ордэна Дружбы народаў медыцынскага ўнiверсiтэта пачалi рэалiзоўваць праект. Ён мае назву «Рука дапамогi», — тлумачыць Алена Варашэнь.

З першых дзён напружанай абстаноўкi тут арганiзавалi ў анлайн-рэжыме кансультацыi са спецыялiстамi ўнiверсiтэта: герыятрам, кардыёлагам, тэрапеўтам, баратэрапеўтам, неўролагам, рэабiлiтолагам. Былi вызначаны днi i час кансультацый для спецыялiстаў тэрытарыяльнага цэнтра i пажылых людзей. Таксама праводзiлiся заняткi-кансультацыi па фiзiчнай актыўнасцi з выкарыстаннем скайпу. Вяскоўцы маюць магчымасць задаць пытанне на любую цiкавую iм тэму аб стане свайго здароўя.

— Падчас аналiзу агучаных людзьмi пытанняў выявiлi праблему ў жыхаркi аграгарадка. У яе няма магчымасцi пракантраляваць узровень цукру ў крывi самастойна — у перыяд самаiзаляцыi, не наведваючы палiклiнiку. Адрэагавалi на сiтуацыю хутка. На працягу працоўнага дня быў набыты глюкометр, i паслуга аказана спецыялiстам дома з захаваннем усiх мер бяспекi. У далейшым плануецца аказваць дадзеную паслугу на пастаяннай аснове i дома ў грамадзян, — дадае спецыялiст па сацыяльнай рабоце Аляксандр Варашэнь.

«Рука дапамогi» ўдзельнiчае ў самым вялiкiм конкурсе сацыяльных праектаў у Беларусi — Social Weekend. Каардынатар праекта — цэнтр сацыяльнага абслугоўвання насельнiцтва Вiцебскага раёна. Паводле слоў кiраўнiка ўстановы Кацярыны Лазоўскай, паслугi рэабiлiтацыi па месцы жыхарства ў пажылых грамадзян маюць вялiкае значэнне для паляпшэння якасцi аказання паслуг насельнiцтву. Праект ужо выйшаў у чвэрцьфiнал. Але, як запэўнiла Кацярына Лазоўская, нават калi не перамогуць, паслугi аказваць працягнуць.

Аляксандр ПУКШАНСКI

Фота аўтара

Выбар рэдакцыі

Эканоміка

У сталіцы актыўна скупляюць кватэры. Ці надоўга гэта?

У сталіцы актыўна скупляюць кватэры. Ці надоўга гэта?

Пасля значнага вясновага «хапуна», на майскія святы рынак злёгку астыў.

Грамадства

«Як ты можаш такое казаць, мама?!» Спрачацца з пажылымі сваякамі трэба правільна

«Як ты можаш такое казаць, мама?!» Спрачацца з пажылымі сваякамі трэба правільна

Псіхіка пажылых людзей часцей за ўсё не здольная да «апгрэйду».