XVІ Міжнародныя кнігазнаўчыя чытанні ўпершыню пройдуць у анлайн-фармаце

XVІ Міжнародныя кнігазнаўчыя чытанні, прымеркаваныя да 500-годдзя заснавання Жыровіцкага манастыра і бібліятэкі, упершыню пройдуць у анлайн-фармаце. Відэатрансляцыя форуму ў рэжыме рэальнага часу пачнецца сёння, 15 мая, аб 11 гадзіне, а пазней відэазапіс канферэнцыі будзе дасяжны для ўсіх ахвотных.

«Мы не змаглі адмяніць традыцыю штогадовага правядзення гэтай ужо слаўнай навуковай канферэнцыі, і хоць па зразумелых прычынах юбілей у Жыровіцах пакуль не адбудзецца, але хай наша міжнародная канферэнцыя стане своеасаблівым паклонам духоўнаму цэнтру Беларусі», — зазначаюць супрацоўнікі Нацыянальнай бібліятэкі, на заклік якой адгукнуліся навукоўцы як з нашай краіны, так і даследчыкі з Літвы, Польшчы, Расіі, Украіны і Францыі. На інтэрнэт-партале nlb.by было зарэгістравана больш за 100 дакладаў, а каля 60 артыкулаў прадстаўленыя для друку ў выніковым зборніку матэрыялаў канферэнцыі.

— Планавалі перанесці кнігазнаўчыя чытанні на восень, разглядалі розныя варыянты і шмат абмяркоўвалі гэта пытанне з патэнцыйнымі ўдзельнікамі, і аказалася, што наўрад ці ў лістападзе мы здолелі б сабрацца ў тым складзе, які быў заяўлены першапачаткова, — зазначае намеснік дырэктара Нацыянальнай бібліятэкі па навуковай рабоце і выдавецкай дзейнасці Алесь СУША. — Многія замежныя даследчыкі плануюць сваю работу вельмі загадзя, і яны проста не змаглі б прыехаць у іншыя даты. З іншага боку, не хацелася парушаць традыцыю правядзення канферэнцыі штогод у красавіку—маі, і прапускаць такую важную, вартую ўшанавання нагоду, як 500-гадовы юбілей Жыровіцкага манастыра і 550-годдзе цудатворнага абраза Божай Маці Жыровіцкай.

Замест публічнага мерапрыемства арганізатары распрацавалі надзвычай цікавую камбінаваную форму яго правядзення, якая спалучыць віртуальную частку і жывую прысутнасць. Так, каля 15 айчынных навукоўцаў, хто мае такую магчымасць, прыедуць у Нацыянальную бібліятэку, кожны ў дакладна вызначаны час, і агучаць свае даклады перад камерай — у анлайн-трансляцыі, у тым ліку на YouTube-канале. Да таго ж выступоўцам можна будзе задаваць пытанні ў інтэрнэт-каментарыях, і ў рэжыме рэальнага часу навукоўцы з дапамогай мадэратараў канферэнцыі паспрабуюць на іх адказаць. Частка ўдзельнікаў, якія не змогуць фізічна прысутнічаць на канферэнцыі, даслалі свае відэапрывітанні і запісы выступленняў, альбо суправадзілі гатовыя прэзентацыі аўдыякаментарыямі — усе гэтыя запісы будуць інтэграваныя ў агульную канву форуму. У прыватнасці, свае вітанні ўдзельнікам праз відэасувязь перададуць суарганізатары канферэнцыі — міністр культуры Юрый Бондар і прарэктар па навуковай рабоце Мінскай духоўнай семінарыі і духоўнай акадэміі Аляксандр Слесараў.

І, безумоўна, самыя цікавыя даследаванні на тэму гісторыі Жыровіцкага манастыра і бібліятэкі, развіцця кніжнай культуры Беларусі ўвайшлі ў зборнік матэрыялаў XVІ Міжнародных кнігазнаўчых чытанняў, які ўбачыў свет акурат да юбілею ў знак ушанавання адной з галоўных хрысціянскіх святыняў.

Вікторыя ЦЕЛЯШУК

Прэв'ю: chitaem-vmeste.ru