Вы тут

У рэжым анлайн. Беларускія фільмы на інтэрнэт-пляцоўках


Сёння, калі ў свеце складаная эпідэміялагічная сітуацыя, многія сэрвісы ідуць карыстальнікам насустрач і прадастаўляюць свабодны доступ да вялікай колькасці інфармацыі і забаў. Некаторыя беларускія фільмы таксама з’яўляюцца анлайн, а таму прапануем вам падборку карцін, якія варта паглядзець.


Кадр з фільма «Балота Ельня»

Рэжысёрку Дар’ю Жук у нашай краіне ўжо мала хто не ведае. Некаторыя маладыя беларускія рэжысёры лічаць, што Дар’я намінацыяй свайго фільма «Хрусталь» на Оскар расчыніла акно ў Еўропу на сусветныя кінафестывалі. Калі «Хрусталь» для вас — ужо пройдзены этап, звярніце ўвагу на дыпломную кароткаметражную работу Дар’і «Сапраўдная амерыканка» (у інтэрнэце шукайце «The Real American»).

Фільм «Заўтра» — незалежная безбюджэтная карціна Юліі Шатун, высока ацэненая і прызнаная беларускай кінасуполкай. У гэтым фільме кожны зможа знайсці нешта знаёмае, з жыцця, і абыякавым пасля прагляду не застанецца.

«Summa» — прыгожая і па форме, і  па змесце гісторыя пра сяброўства пажылога польскага мастака Анджэя Струмілы і маладой беларускай мастачкі Марыі. Такім фільмам мы абавязаны майстру беларускай дакументалістыкі Андрэю Куцілу. На жаль, 9 красавіка герой фільма — мастак Анджэй Струміла — памёр. У памяць пра яго праваўладальнікі прынялі рашэнне выкласці фільм Summa ў адкрыты доступ.

Калі хочацца яшчэ дакументальнага кіно, то, думаем, наступны фільм вас таксама зацікавіць. 9 красавіка адбылася анлайн-прэм’ера прыгожага дакументальнага фільма «Балота Ельня», які быў створаны музычным YouТubeпраектам KURS:RA сумесна з камандай KROK FILMS. Дзіўнае месца Беларусі — балота Ельня — налічвае 9 тысяч гадоў. Яно займае 200 кв. км і служыць домам для 130 відаў птушак. Усё гэта гучыць уражліва, а выглядае яшчэ больш неверагодна.

Не можам не параіць жыццесцвярджальную дакументальную гісторыю віцебскай каманды невідушчых футбалістаў і іх трэнера. Рэжысёр Вольга Абрамчык пры падтрымцы тэлеканала «Настоящее время» зняла фільм «Трэнер. Гульня ў цемры» пра людзей, якія, старанна працуючы над сабой, перамагаюць абставіны і страхі, асвойваюць навык, знаходзячы ўпэўненасць у сабе, а затым пацвярджаюць статус чэмпіёнаў Беларусі па міні-футболе катэгорыі B1 (футбол у цемры). А ва ўсім гэтым ім дапамагае іх трэнер і сябар Алег Кірылаў.

Наступны фільм — з катэгорыі «Не для ўсіх». Не кожны глядач ацэніць шумную VHS-плёнку, праходкі, знятыя адным дублем і працягласцю пяць хвілін. Фільм «Сашына пекла» Мікіты Лаўрэцкага ўжо паказвалі на фестывалях у Гётэборгу, «Лістапад», ММКФ.

Кароткаметражны фільм Улады Сяньковай «From A Great Height» — змрочнае кіно ў халодных тонах на такую ж змрочную тэму: непрыманне і непрыняцце бежанцаў, людзей у складанай жыццёвай сітуацыі нікому не патрэбных.

Кадр з фільма «Заўтра»

Напрыканцы распавядзём пра фільм рэжысёра Максіма Шведа, які можна аднесці да катэгорыі «Падумаць». Фільм «І шчасце» — пра хлопчыка з аўтызмам. Думаем, пасля прагляду карціны кожны сам задасць сабе патрэбныя пытанні і  пастараецца на іх сумленна адказаць. Можа, з такіх размоў з сабой і пачынаюцца змены.

Максім Швед лічыць, што цяпер — час глядзець беларускае кіно, таму што яно блізкімі нам вобразамі можа расказаць гісторыі, якія дапамогуць даць адказы на злабадзённыя пытанні. Падтрымліваем Максіма і спадзяёмся, што вы ўжо шукаеце ў сетцы ўпадабаны беларускі фільм.

Наталля ВАВІЛОНСКАЯ

Выбар рэдакцыі

Грамадства

Крэпасць духу. 10 натхняльных храмаў Гродзеншчыны

Крэпасць духу. 10 натхняльных храмаў Гродзеншчыны

Гэта культурнае багацце прыцягвае ў краіну масу падарожнікаў. 

Грамадства

Як правільна аднаўляцца пасля COVID-19?

Як правільна аднаўляцца пасля COVID-19?

Нават у лёгкай форме перанесеная каранавірусная інфекцыя не праходзіць для арганізма бясследна.

Калейдаскоп

Усходні гараскоп на наступны тыдзень

Усходні гараскоп на наступны тыдзень

СТРАЛЕЦ. Ад таго, як сплануеце тыдзень, залежыць, ці паспееце завяршыць важныя справы. 

Грамадства

Як навучыць дзіця рацыянальна карыстацца грашыма? Парады псіхолага

Як навучыць дзіця рацыянальна карыстацца грашыма? Парады псіхолага

Дзіцяці абавязкова трэба ведаць: Што такое грошы? Навошта яны патрэбны?