У Беларусь прыбыла другая партыя гуманітарнай дапамогі з Польшчы

У Беларусь прыбыла другая партыя гуманітарнай дапамогі з Польшчы для барацьбы з эпідэміяй COVID-19, паведамляе БЕЛТА.

На афармленне ў транспартна-лагістычны цэнтр «Мінск-Белмытнясэрвіс-2» прыехалі 40 фур, яшчэ пяць машын разгрузіліся ў Лідзе. Агульная маса грузу склала 300 т.

Палякі перадалі апараты ШВЛ, лекі, некалькі мільёнаў ахоўных і медыцынскіх масак аднаразовага выкарыстання, антысептычная вадкасць, ахоўныя халаты, камбінезоны біялагічнай абароны, медыцынскія шчыткі, ПЦР-тэсты.

Як заявіў напярэдадні дзяржсакратар канцылярыі польскага прэм’ер-міністра Міхал Дворчык, гэта найбуйнейшая партыя гуманітарнай дапамогі ў гісторыі сучаснай Польшчы.

Першая партыя гуманітарнай дапамогі прыбыла ў Беларусь 24 красавіка. Тады прывезлі дэзінфікуючыя сродкі (50 тыс. л), антысептыкі (30 тыс. л) і хірургічныя маскі (100 тыс. штук), неабходныя для барацьбы з COVID-19.

Прэв'ю: БЕЛТА