Вы тут

Глядзім балівудскі фільм «Гулаба і Сітаба», у якім няма песняў і танцаў


Можна падумаць, любоў да індыйскага кіно ў нас у крыві  у час савецкай маладаступнасці заходніх фільмаў яно было жаданым, да таго ж яскравым акном у навакольны свет, таму з поспехам упячатвалася ў культурны дасуг цэлых пакаленняў. Мая маці дагэтуль памятае тыя сеансы, Зіту з Гітай і Джымі-Джымі, а між тым апроч Балівуда індыйскае кіно мяркуе Талівуд, Калівуд, так званае паралельнае кіно ды іншыя з’явы. Гады прайшлі, а Балівуд дагэтуль застаецца эфектыўнай фабрыкай мрояў, толькі ён ужо не той, і сказаць, маўляў, глядзіце, вось у нас балівудскі фільм без песняў і танцаў, больш не арыгінальна. І ўсё ж глядзіце, вось у нас балівудскі фільм «Гулаба і Сітаба» з Амітабхам Бачанам у галоўнай ролі ды, уявіце, без песняў і танцаў.


amazon.com

Стваральнікі не сталі чакаць магчымасці выпусціць карціну ў кінатэатрах, таму прэм’ера адбылася 12 чэрвеня ў форме лічбавага рэліза на стрымінгавай платформе Amazon Prime Video.

«Гулаба і Сітаба» — сапраўды не тое, што большасць уяўляе сабе пад балівудскім кіно, тут няма тых настырных і няўхільных умяшанняў рока ды працяглых музычных уставак, за кошт якіх фільм расцягваецца да трох гадзін хронаметражу. Але тут даволі ранейшых індыйскага каларыту і непасрэднасці, ёсць нават адзін эфектны пасаж у імя кахання. Нарэшце, галоўную ролю тут выконвае балівудскі «кароль» Амітабх Бачан — герой гарадскіх падваротняў і скрышальных меладрам, праўда, у «Гулаба і Сітаба» яго не пазнаць. Я вылічыла яго па носе (хаця для здымак яго нават яшчэ павялічылі) і своеасаблівай павалоцы вачэй.

Бачан іграе сквапнага старога Мірзу, што гатовы ўдавіцца за лішнюю рупію і марыць аб тым, каб шыкоўны старадаўні асабняк, які яго жонка Фаціма некалі атрымала ў спадчыну і дзе яны цяпер жывуць, стаў толькі яго ўласнасцю. Асабняк між тым пачувае сябе не вельмі — сродкаў на яго ўтрыманне ў сям’і, канешне, няма, таму некалі пышны будынак паволі прыходзіць у заняпад, а яго памяшканні дзеляць паміж сабой шматлікія арандатары, ды і яны плацяць Мірзе няшмат і не заўсёды.

Антаганістам Мірзы становіцца адзін з арандатараў Банкі — малады хлопец, што жыве разам з маці і трыма сёстрамі і даволі дзёрзка — пэўна, вымушана праз беднасць — качае свае правы. А калі становіцца заўважна, што стары нешта прадпрымае ў адносінах да асабняка і гэта пагражае арандатарам і іх выгаднаму становішчу, Банкі пачынае дзейнічаць. Адным словам, розныя інтарэсы сутыкаюцца ў маёнтку, прыцягваюць да гэтай катавасіі чужых, таксама са сваімі разлікамі, людзей, і становяцца асновай для камедыі.

Над гэтай камедыяй, праўда, асабліва не парагочаш: класічны драматургічны прыём, калі некалькі сіл уцягваецца ў барацьбу за макгафін — у гэтым выпадку асабняк, стварае добрую глебу для камічных сітуацый, але смяяцца прыходзіцца над заганамі і мелкімі душонкамі. «Гулаба і Сітаба» — не проста камедыя, а мякка-назідальная прытча, дзе тыповасць галоўнага персанажа і яго падкрэслены парок, які агучваецца і адпраўляецца ў добры шлях у пачатку фільма, не могуць не пакінуць жмінду ля разбітага карыта.

Найвыдатнейшым чынам, амаль давёўшы яго да ўзроўню аднаго з герояў, аўтары ўвасобілі на экране каларыт пацёртага, бязладнага, шумнага індыйскага горада і запыленага старажытнага асабняка, дзе што ні крэсла — можна выстаўляць на продаж за некалькі тысяч долараў. У гэтую прастору прыемна апускацца і па гэтых лакацыях прыемна блукаць вачыма. Здавалася б, заслуга невялікая — бяры ды здымай, але здымкі гэтыя зроблены як асабліва ўважлівыя позіркі ці пачуццёвае пагладжванне фактурных паверхняў, так што захаваная індыйская веліч тут не толькі ўтварае эстэтычны эфект, а ён моцны сам па сабе, але і ператвараецца ў жэст шанавання мінуўшчыны.

Калі свае і чужыя, беднякі і багацеі, прыватныя асобы і прадстаўнікі афіцыйных структур пачынаюць паляваць за маёнткам, прадметам жадання з’яўляецца нават не каштоўны будынак, хоць фармальна гэта так, а згубленая вонкавая і ўнутраная пышнасць. Да таго ж высакародныя матывы дарэчна кантрастуюць з жанрам камедыі, плакатным вобразам Мірзы ды гуллівым музычным матывам, дзякуючы чаму нізкі жанр ураўнаважваецца высокай эстэтыкай.

Пакуль заварушка, што распачалася Мірзой і Банкі, будзе паволі ісці да апагея, вырашыць сітуацыю, канешне, «вышэйшая» сіла, што дагэтуль хавалася ў нязначных эпізодах. Сімвалічна, што маральная перамога над сквапнасцю і тымі нізкімі душонкамі спалучаецца з учынкам у імя кахання, уласна адзіным такога кшталту «рудыментам» палкіх індыйскіх меладрам.

Зрэшты «Гулаба і Сітаба» таксама можна назваць індыйскай меладрамай — фільм сапраўды ўяўляе сабой гісторыю пра любоў, як належыць, вечную і гарачую, толькі гэта любоў Мірзы да асабняка, што праходзіць праз цэлае жыццё героя, займае ўсе яго думкі і вырашае яго лёс. У якасці канцоўкі гэтай «напружанай» драмы аўтары робяць сімпатычны штрых — смешны і сумны адначасова, і ззаду застаецца яркая, забаўная, непасрэдная і вельмі індыйская карціна, нават калі і без песняў і танцаў.

Фільм можна ўбачыць па падпісцы на Amazon Prime Video, пробны тыдзень бясплатны, стужка паказваецца на мове арыгіналу з англійскімі субтытрамі.

Ірэна КАЦЯЛОВІЧ

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.