70 млрд долараў у інфраструктуру

Інвестуе кампанія Tencent у бліжэйшую пяцігодку.

Кітайскі тэхнагігант Tencent абвясціў аб планах на працягу бліжэйшых пяці гадоў інвеставаць 500 млрд. юаняў (каля 70,1 млрд долараў) у развіццё інфраструктуры новага тыпу па ўсёй краіне, перадае «Жэньмінь жыбаа» анлайн».

Гэтыя грашовыя сродкі ў асноўным будуць укладзены ў воблачныя вылічэнні, штучны інтэлект, блокчэйн, суперкамп’ютэрны цэнтр, квантавыя вылічэнні і цэнтр апрацоўкі дадзеных, заявіў першы намеснік гендырэктара Tencent Тан Даашэн. Паводле яго слоў, каб стымуляваць інавацыйную дзейнасць у сферы прамысловых тэхналогій, кампанія таксама ўзмоцніць развіццё прамысловай інтэрнэт-базы, інавацыйнага цэнтра і індустрыяльных паркаў.

Разам з гэтым, дадзенае прадпрыемства, якое базуецца ў горадзе Шэньчжэнь на поўдні Кітая, будзе ў поўным аб’ёме выкарыстоўваць рэсурсы вядучых экспертаў і лабараторый, супрацоўнічаць з вядучымі ўніверсітэтамі ў краіне і за мяжой для стварэння даследчых платформаў, нарошчвання прамысловых даследаванняў і навучання кадраў.

Тан Даашэн заклікаў да сумесных намаганняў анлайн- і традыцыйных прадпрыемстваў, урадавых ведамстваў, навукова-даследчых устаноў, некамерцыйных арганізацый і карыстальнікаў для стварэння супольнасці лічбавага экаасяродзя, каб вывесці прамысловы інтэрнэт-сектар на шлях хуткага развіцця.

Згодна са штогадовым дакладам аб рабоце ўрада, Кітай паабяцаў актывізаваць намаганні для прасоўвання будаўніцтва інфраструктуры новага тыпу, у тым ліку інфармацыйных сетак наступнага пакалення і прымянення тэхналогій 5G.

Фота: chinainternetwatch.com