Прагляд фiльма — адзiн з унiверсальных варыянтаў адпачыць i карысна правесцi час цi ў адзiноце, цi ў добрай кампанii. На наступным тыднi ў эфiры тэлеканалаў гледачам прапаноўваюць кiнастужкi розных жанраў i тэматыкi.
Тэлеканал «Беларусь 3» у суботу 1 жнiўня пакажа дзiцячы героiка-прыгоднiцкi фiльм «Мiколка-паравоз» рэжысёра Льва Голуба («Дзяўчынка шукае тату», «Паланез Агiнскага»). Яго знялi ў 1956 годзе на студыi «Беларусьфiльм» па матывах аднайменнай аповесцi Мiхася Лынькова. Рэжысёру было важна захаваць iнтанацыi твора i яго душэўнасць, таму вельмi вялiкая ўвага ўдзялялася кожнай дэталi, пачынаючы ад месца здымак (выбар выпаў на Гродна) i заканчваючы падборам акцёраў. Напрыклад, галоўнага героя на экране ўвасобiў юны артыст Вова Гуськоў, якi потым зняўся яшчэ ў некалькiх фiльмах, але ў вынiку з акцёрскай прафесiяй у яго не склалася i хлопец стаў iнжынерам. Карцiна апавядае пра лёс Мiколкi — сына машынiста з вузлавой чыгуначнай станцыi. Ён разам з дарослымi ў гады грамадзянскай вайны змагаўся супраць белагвардзейцаў i iнтэрвентаў. Калi станцыю захапiлi немцы, Мiколка разам з бацькам сышоў у лес да партызан, каб працягваць барацьбу. Даведаўшыся пра наблiжэнне Чырвонай Армii, немцы збiралiся вывезцi нарабаваную маёмасць i зброю, i, каб перашкодзiць гэтаму, партызаны атакавалi станцыю, а па дапамогу адправiлi паравоз. Але машынiста забiлi i замянiць яго давялося Мiколку... Калi канцоўку твора вы падзабылi, уключыце тэлевiзар у наступную суботу (сеанс пачнецца ў 21.05).
2 жнiўня ў эфiры дакументальны фiльм Яўгена Сяцько «УНОВИС». Кiнастужка раскажа пра феномен мастацкага жыцця Вiцебска ў пачатку 1920-х гадоў. У той перыяд Казiмiр Малевiч, якi выкладаў у народным мастацкiм вучылiшчы, заснаваў творчае аб'яднанне УНОВИС — «Cцвярджальнiкi новага мастацтва»... Такiм чынам Беларусь стала радзiмай супрэматызму — аднаго з авангардных творчых кiрункаў, якi не знiк з палiтры сусветнага мастацтва i да сённяшняга дня мае сваiх паслядоўнiкаў. Феномен УНОВИСа i асобу яго легендарнага заснавальнiка Казiмiра Малевiча аўтары фiльма раскрываюць шматгранна, глыбока i эмацыянальна.
Тэлеканал «Культура» 1 жнiўня запрашае на прагляд мастацкага фiльма Вiталя Дудзiна «Развiтальныя гастролi» (1992, Расiя, Беларусь). У цэнтры сюжэту — вандроўка чатырох актрыс правiнцыйнага тэатра, якiя едуць на гастролi. Аб'ядноўвае iх не толькi работа, але яшчэ i каханне да аднаго мужчыны. Праўда, для некага тыя пачуццi — даўно мiнулая гiсторыя, а для кагосьцi цяперашнi час. I, здавалася б, проста жанчыны едуць i размаўляюць пра сваё, але ў дыялогах так шмат жыццёвага, што iм верыш, суперажываеш i часам настальгiчна згадваеш уласныя гiсторыi. Людмiла Гурчанка, Нiна Усатава, Вольга Астравумава i Святлана Рабава — зорны ансамбль актрыс раскрывае вобразы галоўных гераiнь. Дарэчы, першапачаткова на месцы Гурчанка павiнна была быць Элiна Быстрыцкая, але пасля тыдня здымак актрыса з'ехала (у фiльме яе можна ўбачыць толькi ў эпiзодзе). Паколькi на тое, каб зняць кiнастужку, адводзiўся ўсяго месяц, то на пляцоўцы працавалi толькi тры гераiнi, а Людмiла Гурчанка потым здымалася адна, але дзякуючы яе таленту i майстэрству рэжысёра ўсё пададзена так, быццам i ўсе астатнiя жанчыны побач... Глядзiце i самi пераканайцеся, якая магiя магчымая ў кiно, у суботнiм эфiры ў 10.40 з паўторам позна ўвечары.
Алена ДРАПКО
Фота: kino-teatr.ru
Спачатку былі... словы.
8 снежня споўнілася 32 гады з дня ўтварэння Садружнасці Незалежных Дзяржаў.
Фактар еўразійскай бяспекі і яе неад’емны элемент.
«Галоўная задача „Беларусь 5“ — паказваць беларускаму гледачу беларускі спорт».
