Вы тут

На тым беразе Буга


Беларуская Амбасада ў Польшы ўшанавала памяць воінаў, якія загінулі ў баях за вызваленне Варшавы, правяла цікавыя імпрэзы ў гонар Дня Незалежнасці


Добраўпарадкаванне на Брудноўскіх могілках у Варшаве

Пра шэраг цікавых спраў, акцый Амбасады Беларусі ў Польшчы, што адбыліся за апошні месяц, нам напісаў яе Першы сакратар Яўген Рабцаў. Да таго ж у тэкставым файле й нямала здымкаў: праўда, не ўсе яны з‑за такой перасылкі тэхнічна прыдатныя для газеты. Мы рады, што з боку Амбасады ёсць інтарэс да супрацы з нашым выданнем. І гатовы ў чарговы раз пазнаёміць чытачоў з беларускімі навінамі з‑за Буга.

Заслугоўвае павагі, што супрацоўнікі Амбасады на чале з Амбасадарам Уладзімірам Чушавым 26 чэрвеня паўдзельнічалі ў добраўпарадкаванні тэрыторыі, архітэктурных элементаў на могілках савецкіх воінаў, якія загінулі ў баях за вызваленне Варшавы. Гэта, удакладняе Яўген Рабцаў, было зроблена ў плыні акцыі “Беларусь памятае!”, святкавання 75‑й гадавіны Перамогі й 76‑й гадавіны Вызвалення Беларусі. На здымках бачна, як прадстаўнікі беларускай дыпмісіі падразаюць зялёнае покрыва пры магільных плітах, высаджваюць кветкі, падбельваюць некаторыя дэталі мемарыяла. І ўжо 2 ліпеня, напярэдадні Дня Незалежнасці й 76‑й гадавіны вызвалення Беларусі ад нямецка-фашысцкіх захопнікаў, Уладзімір Чушаў, супрацоўнікі Амбасады ўсклалі вянок на Брудноўскіх могілках польскай сталіцы — да помніка воінам, якія загінулі ў баях за вызваленне Варшавы.

Таксама ў Катавіцах прайшла акцыя з нагоды Дня Незалежнасці, Дня Вызвалення Беларусі, а таксама ў памяць пра 75‑ю гадавіны Перамогі ў Другой сусветнай вайне. Там Ганаровы консул Беларусі ў Катавіцах Марэк Расіньскі й яго жонка ўсклалі кветкі да мемарыяла на могілках салдат Чырвонай Арміі — у гарадскім парку імя Тадэвуша Касцюшкі.

І тым жа днём, 2 ліпеня, святочныя імпрэзы з нагоды Дня Незалежнасці Беларусі й 75‑годдзя Вялікай Перамогі ў Другой сусветнай вайне правялі беларуская Амбасада супольна з Культурным цэнтрам Беларусі ў Польшчы. Тое адбывалася ў Музеі Незалежнасці ў Варшаве. Гэта, нагадаем, адзін з галоўных музеяў Польшчы. Сама імпрэза ўключала ўрачыстае адкрыццё дзвюх выстаў (“Вайна. Халакост. Памяць без тэрміну даўнасці” і “Беларусь: цудоўныя імгненні”), а таксама паказ вядомага кароткаметражнага фільма “Туфлікі”, створанага ў Белвідэацэнтры. Нагадаем, што ў 2013‑м кінагісторыя пра ахвяры Халакосту 30‑х‑40‑х гадоў атрымала ўсе галоўныя прызы фестывалю ў Манака, была ў спісе прэтэндэнтаў на Оскар. Беларускім кінематаграфістам, калі стваралі кранальны й жорскі фільм, дазволілі весці здымкі ў Асвенцыме. Гэта аповед без твараў і слоў. Запомніць персанажаў можна… па нагах. Камера не паднімаецца вышэй за калена. Бо галоўная гераіня дакументальна-мастацкай кінакарціны — пара жаночых чырвоных туфляў. Дарэчы, у яе ёсць прататып: у экспазіцыі канцлагера. Першы кадр фільма зняты ў вітрыне магазіна, фінальны — у брацкай магіле абутку Асвенцыма… Нашы калегі паведамлялі ўжо, што на пробах рэжысёр Канстанцім Фам адглядзеў сотні акцёрскіх ног, да здымак дапусціў самыя пластычныя. Усяго ў фільме зняліся каля 400 туфляў. А ў здымках 20‑мінутнай кінакарціны паўдзельнічалі кінематаграфісты Польшчы, Чэхіі, ЗША, Расіі, Францыі ды Ізраіля.

Выставу “Вайна. Халакост. Памяць без тэрміну даўнасці” прадаставіў Беларускі дзяржмузей гісторыі Вялікай Айчыннай вайны, а выставу “Беларусь: цудоўныя імгненні” — Нацыянальная бібліятэка Беларусі. Адкрываючы імпрэзу, да гасцей звярнуліся Амбасадар Беларусі ў Польшчы Уладзімір Чушаў і дырэктар Музея Незалежнасці ў Варшаве Тадэвуш Скочак. Сярод удзельнікаў імпрэзы былі амбасадары Расійскай Федэрацыі, Дзяржавы Ізраіль, старшыня аб’яднання “Польшча — Усход”, прадстаўнікі шэрагу іншых грамадскіх арганізацый, СМІ, культурных і дзелавых колаў.

Фотавыстава ля Амбасады

А яшчэ ў сувязі з нацыянальным святам Беларусі ў беларускай Амбасадзе ў Польшчы 1 ліпеня адкрылася фотавыстава “Мая Беларусь”. На ёй можна пабачыць аб’екты нацыянальнай гістарычна-культурнай спадчыны. У імпрэзе з польскага боку паўдзельнічалі Віцэ-маршал Сейма Рышард Тэрлецкі, намеснік Міністра замежных спраў Мацей Лянг, намеснік Міністра спорту й дэпутат Сейма Яцэк Осух, старшыня Польска-беларускай парламенцкай групы Мечыслаў Башко, прадстаўнікі МЗС, Міністэрства развіцця, Міністэрства нацыянальнай абароны, дзелавых колаў, у тым ліку Польска-Беларускай гандлёва-прамысловай палаты й беларускіх прадпрыемстваў у Польшчы, беларускай дыяспары.

У ходзе імпрэзы ганаровую грамату Мінадукацыі, падзяку Міністра інфармацыі Беларусі атрымала загадчыца секцыі беларусістыкі Універсітэта Беластока Галіна Тварановіч. Ганаровая грамата Мінкультуры Беларусі ўручана Старшыні беларускага літаб’яднання “Белавежа” Яну Чыквіну. Абодва — вядомыя прадстаўнікі беларускай нацменшасці ў Польшчы.

Іван Ждановіч

Фотаздымкі прадастаўлены Амбасадай Беларусі ў Польшчы

Выбар рэдакцыі

Грамадства

Распачынаецца сезон атракцыёнаў. Хто і як сочыць за іх станам?

Распачынаецца сезон атракцыёнаў. Хто і як сочыць за іх станам?

У Беларусі адпрацавала 65 % атракцыёнаў (160 штук), а многія працуюць і звыш 30 гадоў.

Эканоміка

Як выбраць кватэру на другасным рынку

Як выбраць кватэру на другасным рынку

За апошнія некалькі месяцаў рынак другаснага жылля прыкметна ажывіўся. 

Грамадства

Каб набываць тавар бяспечна, ці Як абараніць правы спажыўца

Каб набываць тавар бяспечна, ці Як абараніць правы спажыўца

У краіне на 11 % знізілася агульная колькасць зваротаў грамадзян, звязаных з парушэннем правоў спажыўцоў. 

Грамадства

У Беларусі даследуюць вакцыну супраць раку

У Беларусі даследуюць вакцыну супраць раку

Працягваецца навуковае даследаванне ДНК-вакцыны супраць раку ў рамках беларуска-амерыканскага праекта.