30 верасня, серада

Вы тут

«Беларусь заўсёды ўмела канцэнтравацца на галоўным і важным»


Прадстаўнікі парламента і дзяржаўныя служачыя працягваюць дзяліцца сваімі ўражаннямі ад Паслання Прэзідэнта беларускаму народу і Нацыянальнаму сходу.


Лілія Ананіч, намеснік старшыні Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі, адзначае, што Пасланне лёсавызначальнае для нашага народа, бо сёння мы ўвайшлі ў завяршальную фазу выбарчай кампаніі, і перад кожным грамадзянінам стаіць важны выбар.

«Прэзідэнт эмацыянальна, глыбока, як сын свайго народа, звярнуўся да нас, беларусаў, з вельмі важнымі словамі. Мы шмат зрабілі для нашай краіны за 25 гадоў тварэння ў няпростых эканамічных, геапалітычных умовах, умовах санкцый. Сёння свет знаходзіцца на вельмі глыбокім разломе, і ад таго, які выбар зробяць беларусы (на карысць стабільнасці, далейшага эвалюцыйнага развіцця), мы зможам утрымаць нашу краіну ці паплывём па волі бушуючых хваль», — дадала яна.

Дэпутат падкрэсліла, што Прэзідэнт прапаноўвае рэальную праграму, грунтуючыся на тым, чаго дасягнулі ў эканоміцы і сацыяльнай сферы.

«Я згодна з Прэзідэнтам, што сёння ў розных кутках свету, асабліва на постсавецкай прасторы, на нас глядзяць з надзеяй і пытаннем: ці вытрымаюць беларусы, ці ўстаяць пад націскам сцэнарыяў «каляровых» рэвалюцый, якія «намаляваны» не ў нас, але ўсю іх магутнасць (тэхналагічную, фінансавую) мы ўжо на сабе адчуваем?» — канстатуе яна.

Па словах Ліліі Ананіч, асабіста для яе важна, каб краіна і далей заставалася месцам, дзе ўтульна жыць кожнай сям'і, існуюць справядлівасць, бяспека, высокі запыт на развіццё. Імпануюць ёй і словы кіраўніка краіны, звернутыя да моладзі, і тое, што будзе ўдзяляцца ўвага развіццю рэгіёнаў — кожная частка Беларусі заслугоўвае ўтульнага жыцця.

«Важны заклік і пасыл Прэзідэнта задумацца, што ў кожнага з нас у руках выбар лёсу не толькі сваёй сям'і, дома, але і сваёй Айчыны. Беларусь заўсёды ўмела канцэнтравацца на галоўным і важным. Я ўпэўнена, што беларусы зробяць правільны, лёсавызначальны выбар», — рэзюмавала Лідзія Ананіч.


Леанід Брыч, старшыня Пастаяннай камісіі Палаты прадстаўнікоў па эканамічнай палітыцы, расказаў, што разумее словы, сказаныя Прэзідэнтам наконт росту эканомікі ў будучым, — для гэтага ёсць магчымасці.

«Для таго каб наша эканоміка прырастала, нам неабходна не толькі захаваць экспартаарыентаванасць, але каб рынкі яшчэ і павялічваліся. Прагнозы ўраджаю на гэты год паказваюць, што мы дастаткова сябе забяспечваем харчаваннем і маем магчымасць яго перапрацаваць для дабаўленай вартасці, адправіць на экспарт», — працягвае парламентарый.

У гэтым Леанід Брыч бачыць магчымасць атрымаць дадатковы валавы ўнутраны прадукт.

«Наша камісія датычная да распрацоўкі праграм сацыяльна-эканамічнага развіцця краіны на найбліжэйшыя гады. Зыходзячы з той сітуацыі, якая склалася ва ўмовах пандэміі і сусветнага крызісу, я абсалютна падтрымліваю пазіцыю, што ў нас не ўводзіліся каранцінныя меры. У сувязі з гэтым наша эканоміка не ўпала вельмі моцна, толькі на 1,7 працэнта. У канцы года мы мяркуем выйсці на леташнія параметры», — упэўнены старшыня Пастаяннай камісіі.


Шляхам эвалюцыі

«Пасланне мяне ўразіла, гэта было эмацыянальна насычана. Ведаеце, урачы сутыкаюцца ў размове з пацыентамі і іх сваякамі з тым, што людзі ўспрымаюць рэчы, якія маюць, як нешта зразумелае. Ну падумаеш, бясплатная ахова здароўя, адукацыя, падумаеш, можна спакойна вечарам выйсці на вуліцу — так і павінна быць. Але, паглядзеўшы на свет, ты разумееш, што так не ўсюды. Людзі, шануйце тое, што ёсць. Толькі абапіраючыся дзвюма нагамі на падмурак, можна рухацца ў будучыню. Эвалюцыйны шлях развіцця заўсёды больш эфектыўны і прыносіць менш страт», — упэўнены міністр аховы здароўя Уладзімір КАРАНІК.

Таксама ён падкрэсліў, што медыцыне ў краіне заўсёды ўдзялялася пільная ўвага: пабудавалі шмат новых устаноў, захавалі і развілі санітарную службу, інфекцыйныя стацыянары. Такі падыход да аховы здароўя дазволіў Беларусі выбраць свой шлях у барацьбе з каранавірусам.

«Нам не давялося рабіць страшны выбар: каго ратаваць — людзей або эканоміку. Кожны займаўся сваёй справай. Сапраўды былі нейкія праблемы, гэта ні для кога не сакрэт. На гэтыя праблемы звярнуў увагу і Прэзідэнт. З яго падтрымкай, я думаю, будзем больш аператыўна выпраўляць тое, што выявіла пандэмія, і зробім нашу сістэму аховы здароўя кампактнай, сучаснай, з высокім мабілізацыйным патэнцыялам», — сказаў Уладзімір Каранік.

Без умяшанняў не абыходзілася

У пацвярджэнне тэмы «каляровых» рэвалюцый, якая прагучала ў Пасланні Прэзідэнта беларускаму народу і Нацыянальнаму сходу, дзяржаўны сакратар Савета бяспекі Андрэй Раўкоў адзначыў, што пачынаючы з 1994 года ніводная значная выбарчая кампанія ў Беларусі не абыходзілася без знешняга ўмяшання.

«Найноўшая гісторыя нашай краіны памятае як мінімум шэсць спроб «каляровых» рэвалюцый, — напісаў на сваёй старонцы ў Facebook Андрэй Раўкоў. — Гэтыя спробы робяцца пры дапамозе вонкава непалітызаваных структур і ў цяперашні час. Падобныя працэсы працягваюцца, хоць часам у больш удасканаленых, нярэдка закамуфляваных формах. Адна з іх, так званая трансфармацыя, прадугледжвае кардынальнае дэманціраванне суверэнітэту Беларусі праз змяненне грамадскай свядомасці, каштоўнаснай базы насельніцтва і дыскрэдытацыю органаў дзяржаўнага кіравання. А асноўнымі драйверамі ў гэтым павінны быць вонкава непалітызаваныя структуры, недзяржаўныя СМІ, блогасфера і сацыяльныя сеткі. Вядома, сучаснае жыццё немагчымае без гэтых атрыбутаў, аднак іх выкарыстанне менавіта для масавага прамывання мазгоў ператварылася ў вырашальны фактар канфліктаў і сацыяльных узрушэнняў XXІ стагоддзя. Выражуся вобразна — нас ужо рыхтуюць да аперацыі, але наркоз яшчэ не надышоў. Нельга на гэта паддавацца».

Марыя ДАДАЛКА і паводле БелТА

Выбар рэдакцыі

Грамадства

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Зараз такой фабрыкі няма, але ёсць людзі, якія могуць згадаць гісторыю яе існавання.

Грамадства

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі. 

Грамадства

Злачыннае «паляванне». Як абаранiць сябе ад «аматараў чужой маёмасцi»?

Злачыннае «паляванне». Як абаранiць сябе ад «аматараў чужой маёмасцi»?

Валоданне нейкiмi рэчамi азначае i тое, што на iх могуць паквапiцца староннiя. Няма рознiцы, што гэта — мабiльны тэлефон, сумачка цi бензатрымер.