Вы тут

Большасць маладых людзей далучаецца да алкаголю ў 13—16-гадовым узросце


Пра падлеткавы алкагалізм сталі шырока дыскутаваць толькі апошнім часам, калі падлетак з бутэлькай піва стаў ледзь не абавязковай часткай гарадскога пейзажу. За апошнія восем гадоў больш чым утрая павялічылася колькасць непаўналетніх, якія знаходзяцца на ўліку ў сувязі са злоўжываннем спіртным.


Фота Анатоля Клешчука.

Як расказала ўрач-педыятр падлеткавага кабінета 3-й гарадской дзіцячай клінічнай паліклінікі Зоя Паляк, згодна са статыстыкай, большасць маладых людзей далучаецца да алкаголю ў 13—16-гадовым узросце. Толькі 15 % падлеткаў вядуць цвярозы спосаб жыцця, 43 % ужываюць алкагольныя напоі эпізадычна, у малых дозах, 31 % — эпізадычна, але вышэй за дапушчальную норму, а 11 % — сістэматычна і ў вялікай колькасці.

Алкагалізм, які фарміруецца ў падлеткавым і юнацкім узростах, называюць раннім. Арганізм падлетка прыкладна ў 10 разоў больш адчувальны да алкаголю, чым у дарослага, таму і алкагольная залежнасць у дарослага фарміруецца на працягу 3-5 гадоў, а ў падлеткаў — у 1,5-2 разы хутчэй.

— У маладым арганізме алкагалізм хутчэй праходзіць усе стадыі фарміравання. У дарослага перыяд знешняга дабрабыту працягваецца некалькі гадоў, у падлеткаў — некалькі месяцаў, — расказвае Зоя Паляк. — Такое злаякаснае цячэнне вядзе да хуткага разбурэння асобы, развіцця запойнага п'янства, для падлеткаў робіцца нормай піць з любой нагоды, пры гэтым у стане лёгкага ап'янення яны адчуваюць сябе няўпэўнена.

Урач тлумачыць, што лячыць такіх дзяцей цяжка і малаэфектыўна. Падлетка выводзяць з вострага стану, знімаюць «ломку», але яго амаль немагчыма пераарыентаваць асабова. Бо сістэма жыццёвых каштоўнасцяў, куды не ўключаны наркотыкі і алкаголь, ствараецца не тыднямі і не месяцамі.

— Многія задаюць пытанне: што рабіць? Забараніць выпіваць? Забаранілі, а што далей? Хто можа ўтрымаць ад спіртнога? Прычыны, якія прымусілі дзіця пакаштаваць алкаголь, розныя — цікаўнасць, самазацвярджэнне, складанасці ў кантактаванні з равеснікамі, сыход ад праблем. У цэлым для падлеткавага ўзросту характэрна эксперыментаваць, — разважае ўрач. — А як вядома, забаронены плод салодкі. Таму і атрымліваецца, што дзеці нібыта і ведаюць пра шкоду алкаголю і наркотыкаў, але ім цікава паспрабаваць на сабе. Адзін, паспрабаваўшы, спыніцца, а іншы пачне злоўжываць.

Шмат залежыць ад стаўлення да алкаголю ў сям'і. Калі сямейныя святочныя застоллі цягнуцца некалькі дзён з вялікай колькасцю спіртнога, то дзецям складана растлумачыць, чаму піць дрэнна і шкодна. Даказана, што сам алкагалізм генетычна не перадаецца, а перадаецца толькі схільнасць да яго. Таму ў якасці прафілактыкі неабходны хоць простыя веды пра тую небяспеку, якую ён тоіць.

Можа быць і іншы варыянт: у цалкам прыстойнай сям'і бацькі ўсе сілы аддаюць рабоце, а дзіця застаецца без увагі. Таму адно з правіл для такіх бацькоў — пастарацца максімальна загрузіць яго вольны час. Гурткі, секцыі, музычная ці мастацкая школа — усё падыдзе. Важна толькі, каб выбраны занятак падлетку быў даспадобы. І вельмі важна з дзецьмі размаўляць, вучыцца з імі разам добраму настрою без допінгу. Як ні дзіўна, у наш час гаджэтаў і розных забаў дзецям часта не хапае душэўнага цяпла блізкіх людзей.

Алена КРАВЕЦ

Загаловак у газеце: Пакуль не позна

Выбар рэдакцыі

Эканоміка

У Мінску прадаецца больш за 10 тысяч кватэр

У Мінску прадаецца больш за 10 тысяч кватэр

На другасным рынку жыллё працягвае таннець (у глабальным плане без перапынкаў) ужо з верасня мінулага года.

Грамадства

Падмануць Альцгеймера. Як захаваць ясны розум да глыбокай старасці?

Падмануць Альцгеймера. Як захаваць ясны розум да глыбокай старасці?

Няўжо гэтую цяжкую хваробу так лёгка абвесці вакол пальца?

Калейдаскоп

Разбіраем модныя мастхэвы надыходзячага сезона: чым папоўніць гардэроб?

Разбіраем модныя мастхэвы надыходзячага сезона: чым папоўніць гардэроб?

Мода вясны — 2021 прапануе некалькі глабальных кірункаў: мінімалізм, унісекс і 1990-я.