Вы тут

Што робяць у Мінскай вобласці, каб замацаваць людзей на зямлі?


Вёска з кожным годам страчвае ўсё больш людзей. Ажывіць сельскую мясцовасць, удыхнуць у яе новае жыццё могуць маладыя кадры. Што робяць у Мінскай вобласці, каб прыцягнуць іх і замацаваць на зямлі?


Падрыхтоўка кадраў для сельскагаспадарчай вытворчасці рэгіёна вядзецца ў Беларускім дзяржаўным аграрным тэхнічным універсітэце, Беларускай дзяржаўнай сельскагаспадарчай акадэміі, Віцебскай дзяржаўнай акадэміі ветэрынарнай медыцыны, Гродзенскім дзяржаўным аграрным універсітэце і чатырох сельскагаспадарчых каледжах, размешчаных на Міншчыне.

Няма жылля — няма кадраў

Каб заахвоціць школьнікаў да паступлення ва ўстановы адукацыі сельскагаспадарчага профілю, у школах кожнага раёна ладзяцца семінары, круглыя сталы з удзелам прадстаўнікоў вышэйшых і сярэдніх спецыяльных устаноў адукацыі, кіраўнікоў і спецыялістаў сельскагаспадарчых арганізацый. Апошнія, а таксама прадстаўнікі аблсельгасхарчу прысутнічаюць на размеркаванні выпускнікоў. З кожным з іх праводзіцца індывідуальная гутарка. З улікам іх пажаданняў адбываецца адбор для далейшага накіравання на работу ў гаспадаркі цэнтральнага рэгіёна.

Як сказалі ў камітэце па сельскай гаспадарцы і харчаванні, сёлета ў сельскагаспадарчыя арганізацыі па размеркаванні накіравана 558 маладых спецыялістаў, у тым ліку 174 выпускнікі з вышэйшай і сярэдняй спецыяльнай адукацыяй, якія навучаліся на ўмовах мэтавай падрыхтоўкі. Чакаецца, што прыбудзе 216 маладых спецыялістаў зоаветэрынарнага, 62 — агранамічнага і 214 — інжынернага профілю. На месцах разумеюць, што моладзь цікавяць не толькі належныя ўмовы працы, але і жыллёвыя. Таму ў першую чаргу імкнуцца забяспечыць ім дах над галавой. У прыватнасці, летась 43 спецыялістам былі выдзелены дамы, 38 — кватэры, 166 — інтэрнат, а 289 жывуць з бацькамі.

Вядома, у пачатку прафесійнай кар'еры моладзь падтрымліваюць і матэрыяльна. У прыватнасці, у сельгасарганізацыях усім маладым спецыялістам налічваецца даплата да заработнай платы на працягу двух гадоў работы ў памеры 0,46 базавай стаўкі, устаноўленай урадам для аплаты працы работнікаў бюджэтнай сферы. Спецыялістам, якія працягваюць па заканчэнні двух гадоў з дня прыбыцця на работу працоўныя адносіны з сельскагаспадарчымі арганізацыямі, на працягу наступных трох гадоў з рэспубліканскага бюджэту даецца даплата да іх заработнай платы ў памеры 0,69 базавай стаўкі, якая ўстанаўліваецца Саветам Міністраў для аплаты працы работнікаў бюджэтных і іншых арганізацый, што атрымліваюць субсідыі, работнікі якіх пры-
роўнены па аплаце працы да работнікаў бюджэтных арганізацый. Гэта прадугледжвае Указ Прэзідэнта Рэспублікі Беларусь ад 12 жніўня 2013 года № 353 «Аб некаторых мерах па забеспячэнні арганізацый аграпрамысловага комплексу кадрамі». Са зменамі (у рэд. указаў Прэзідэнта Рэспублікі Беларусь ад 23.03.2016 № 105, ад 18.10.2019 № 386).

— У пагадненні, заключаным паміж камітэтам па сельскай гаспадарцы і харчаванні Мінаблвыканкама, Мінскім абласным камітэтам прафсаюза работнікаў АПК і Мінскім абласным аграпрамысловым саюзам прадугледжаны раздзел «Сацыяльная абарона моладзі». Ён складаецца з дваццаці пунктаў і падпунктаў. З улікам таго, што адной з прычын адтоку кадраў з сельскай мясцовасці з'яўляецца адсутнасць добраўпарадкаванага жылля, пагадненнем прадугледжана выдзяляць жыллё ў першую чаргу маладым спецыялістам, якія прыбылі ў арганізацыі па размеркаванні, а таксама запрошаным. Акрамя таго — даваць маладым сем'ям пры наяўнасці сродкаў з фонду арганізацыі доўгатэрміновыя льготныя або беспрацэнтныя крэдыты на будаўніцтва жылля і набыццё прадметаў працяглага карыстання для хатняга ўжытку, — расказала намеснік старшыні Мінскай абласной арганізацыі прафсаюза работнікаў АПК Аксана Бельская.

Не толькі абавязкі, але і правы

У пастаянную практыку работы прафсаюза ўвайшлі абласныя спаборніцтвы на ўборцы ўраджаю збожжавых і зернебабовых культур. Умовамі спаборніцтва прадугледжаны прызавыя месцы для маладзёжных экіпажаў камбайнераў, а таксама для маладых кіроўцаў, якія ажыццяўляюць перавозку збожжа ад камбайнаў. Навучэнцам, якія атрымліваюць прафесійную адукацыю і знаходзяцца на прафсаюзным абслугоўванні Мінскай абласной прафсаюзнай арганізацыі, устаноўлена 24 стыпендыі на кожны семестр навучальнага года. Ім ва ўрачыстай абстаноўцы ўручаюць пасведчанні стыпендыята, а бацькам дасылаюць лісты падзякі.

Мінскі абласны камітэт прафсаюза работнікаў АПК штогод праводзіць форум маладых спецыялістаў. За гэтыя гады яго ўдзельнікамі сталі каля 600 чалавек. Такія мерапрыемствы даюць магчымасць пазнаёміцца з калегамі, абмеркаваць праблемы, адказаць на пытанні, падзяліцца вопытам. Падчас форуму праводзіцца анкетаванне. Гэта дапамагае даведацца, што ў першую чаргу хвалюе моладзь.

Як высветлілася, асноўнымі прычынамі сыходу маладых спецыялістаў з сельскай гаспадаркі з'яўляюцца нізкі ўзровень заработнай платы, рэжым рабочага дня, адсутнасць паўнацэнных выхадных, фізічная і псіхалагічная напружанасць працы.

Вядома, маладыя спецыялісты павінны ведаць не толькі свае абавязкі, але і правы. Маладзёжным саветам Мінскага абласнога камітэта прафсаюза работнікаў АПК былі распрацаваны і раздадзены метадычныя рэкамендацыі «Правы і гарантыі маладых спецыялістаў». Інфармацыйны матэрыял падрыхтаваны на падставе дзеючых у Рэспубліцы Беларусь нарматыўных прававых актаў.

Формы падтрымкі моладзі розныя. Згодна з калектыўнымі дагаворамі, маладым спецыялістам робіцца аднаразовая выплата ў памеры пяці базавых велічынь пры прызыве работніка — члена прафсаюза на службу ва Узброеныя Сілы Беларусі і па вяртанні на ранейшае месца работы.

У Чэрвеньскім раёне ў дзесяці калектыўных дагаворах арганізацый аграпрамысловага комплексу ёсць нормы аб штомесячных кампенсацыйных выплатах выпускнікам, размеркаваным (накіраваным), пераразмеркаваным на работу па-за пастаянным месцам жыхарства і забяспечаным наймальнікам жылымі памяшканнямі. Выплаты на гэтых падставах робяцца ў адкрытых акцыянерных таварыствах «Раванічы», «Чэрвеньскі райаграсэрвіс», «Валевачы».

На месцах работа з моладдзю ажыццяўляецца праз Саветы маладых спецыялістаў. Менавіта яны вывучаюць пытанні эфектыўнасці і арганізацыі работы з гэтай катэгорыяй грамадзян у арганізацыях і на прадпрыемствах, арганізуюць злёты, творчыя і спартыўныя мерапрыемствы, тэматычныя вечары адпачынку, турыстычныя паходы, штогадовыя сустрэчы з кіраўніцтвам раёна і вобласці.

Што да звальнення маладых спецыялістаў пасля абавязковай адпрацоўкі, то яно, як правіла, назіраецца ў гаспадарках з нізкім узроўнем эканамічнага развіцця. У паспяховых арганізацыях пытанні з замацаваннем выпускнікоў устаноў адукацыі ўзнікаюць рэдка. Больш ахвотна застаюцца маладыя людзі, якія накіроўваюцца па размеркаванні ў родныя мясціны.

Таццяна ЛАЗОЎСКАЯ

Выбар рэдакцыі

Эканоміка

У Мінску прадаецца больш за 10 тысяч кватэр

У Мінску прадаецца больш за 10 тысяч кватэр

На другасным рынку жыллё працягвае таннець (у глабальным плане без перапынкаў) ужо з верасня мінулага года.

Грамадства

Падмануць Альцгеймера. Як захаваць ясны розум да глыбокай старасці?

Падмануць Альцгеймера. Як захаваць ясны розум да глыбокай старасці?

Няўжо гэтую цяжкую хваробу так лёгка абвесці вакол пальца?

Калейдаскоп

Разбіраем модныя мастхэвы надыходзячага сезона: чым папоўніць гардэроб?

Разбіраем модныя мастхэвы надыходзячага сезона: чым папоўніць гардэроб?

Мода вясны — 2021 прапануе некалькі глабальных кірункаў: мінімалізм, унісекс і 1990-я.