Вы тут

І для настрою, і для выхавання


Мы ўжо неаднаразова пісалі пра тое, як не сумна жывуць жыхары аграгарадка Семукачы Магілёўскага раёна. Старшыня сельсавета Тамара Укружская заўсёды падтрымлівае крэатыўныя ідэі і дапамагае іх рэалізаваць. Гэтым разам яна з гонарам расказала пра дэпутата сельсавета Людмілу Дзятлікаву, якая мабілізавала моладзь на добрую справу. Нядаўна каля вёскі Вялікія Бялевічы з'явіўся так званы саламяны гарадок з казачнымі героямі. Створаны ён рукамі ўчарашніх выпускнікоў школы, а цяпер студэнтаў, якія прыязджаюць на лета да сваіх бацькоў і бабуль з дзядулямі.


— Ідэя ўзнікла сама сабой падчас нашых сумесных сустрэч на дзіцячай пляцоўцы, — кажа Людміла Дзятлікава. — Там у нас збіраюцца ўсе актыўныя жыхары — дзеці катаюцца на атракцыёнах, а старэйшыя па ўзросце займаюцца на трэнажорах. Я, напрыклад, прыводжу туды сваіх унукаў. Аднойчы гаворка зайшла пра тую прыгажосць, якая сёння ствараецца з саломы наўсцяж дарог. Вось бы і нам такое, сказала я. Мяне падтрымала настаўніца Семукацкага дзіцячага садка-школы Алена Мудрагелава. Сказана — зроблена.

Дэпутатка патэлефанавала дырэктару мясцовай райаграпрамтэхнікі Станіславу Свістунову з просьбай дапамагчы з «матэрыялам», і той аператыўна даставіў некалькі цюкоў саломы. Народ пачаў фантазіраваць, што з іх зрабіць. Хлопцы пажадалі зманціраваць трактар і машыну, а жанчыны папрасілі стварыць для дзятвы зайчыкаў, пчолак і куранят. Людміла Дзятлікава села за швейную машынку, зрабіла з тканіны і дроту дэталі для саламяных герояў — вочкі, насы, вусікі. Потым яшчэ дзень усё гэта манціравалі.

— Атрымаўся цэлы саламяны гарадок, — радуецца Людміла Леанідаўна. — Цяпер гэта ў нас самае папулярнае месца для фотасесій. Ды і тыя, хто праязджае міма, часта прыпыняюцца і фатаграфуюць нашу прыгажосць. Мы ўжо бачылі тыя фотаздымкі ў сацсетках.

Дарэчы, гэта не адзіная справа, якую тут рэалізуе насельніцтва разам з моладдзю. За апошнія два гады толькі ў Вялікіх Бялевічах з'явіліся дзве пляцоўкі для адпачынку з каруселямі, лаўкамі, горкамі.

— Раней існавалі працоўныя лагеры, школьнікі восенню дапамагалі капаць бульбу, збіралі яблыкі, — кажа Людміла Дзятлікава. — Цяпер яшчэ і гэта практыка ў мінулым. — І мы вырашылі такім чынам выхоўваць у нашай моладзі любоў да працы. Да таго ж
гэта з'ядноўвае людзей, натхняе іх на нейкія іншыя агульныя справы. Падобнае дапамагае рабіць нашу малую радзіму больш прыгожай і ўтульнай. І гэта дае надзею, што моладзь, магчыма, захоча вярнуцца сюды і застацца.

Нэлі ЗІГУЛЯ

Фота з архіва Семукацкага сельсавета

Выбар рэдакцыі

Грамадства

«Чырвоная лінія» для дзвюх жанчын. Ці могуць свякрухі і нявесткі жыць дружна?

«Чырвоная лінія» для дзвюх жанчын. Ці могуць свякрухі і нявесткі жыць дружна?

Адносіны са сваёй маці і свякрухай — гэта дзве зусім розныя гісторыі. 

Грамадства

 Вольга Чамаданава: «Калі здарылася бяда — ідзіце туды, калі можаце дапамагаць — дапамагайце»

Вольга Чамаданава: «Калі здарылася бяда — ідзіце туды, калі можаце дапамагаць — дапамагайце»

Яшчэ нядаўна Вольга Чамаданава лічылася тварам беларускай міліцыі.

Культура

Чаму на захадзе Беларусі «праклятыя салдаты» і сёння ўзгадваюцца з жахам?

Чаму на захадзе Беларусі «праклятыя салдаты» і сёння ўзгадваюцца з жахам?

Тэма антысавецкага падполля падчас ВАВ — складаная тэма ў гісторыі.

Грамадства

Новы каранавірус. Што вядома пра штам «Амікрон»

Новы каранавірус. Што вядома пра штам «Амікрон»

 Яго знайшлі ў краінах Паўднёвай Афрыкі, у прыватнасці, у ПАР і Батсване.