Вы тут

Аляксандр Субоцін: Дзяржава робіць стаўку на маладых спецыялістаў


Віцэ-прэм’ер Аляксандр Субоцін прыняў удзел ва ўрачыстай цырымоніі пасвячэння ў студэнты ў Гродзенскім дзяржаўным аграрным універсітэце

Сёлета першакурснікамі сталі больш за паўтысячы юнакоў і дзяўчат, якія будуць вучыцца на сямі факультэтах аграрнага ВНУ. Напрыклад, Аляксей Брукіш з Гродна падтрымаў сваю сямейную дынастыю, яго бацькі і брат таксама выпускнікі аграрнага ВНУ. Усе яны працуюць у сістэме АПК. Сам Аляксей з будучай спецыяльнасцю вызначыўся даўно, ён плануе стаць аграномам-хімікам і абараняць палі ад шкоднікаў, займацца аховай сельскагаспадарчых культур ад хваробаў. Усё гэта дзеля таго, каб атрымліваць высокія ўраджаі.

Вікторыі Альшэўскай з Мастоў паступіць у аграрны параіла яе старэйшая сястра. Маўляў, спецыяльнасць па ахове раслін запатрабавана. І наогул прафесія цікавая, тут можна сябе рэалізаваць і нешта ўдасканаліць.

Напачатку заняткаў для першакурснікаў была падрыхтавана спецыяльная святочная праграма, а кіраўніцтва ўніверсітэта і ганаровыя госці выступілі з віншавальнымі прамовамі. Аляксандр Субоцін уручыў падзякі і граматы ад Міністэрства сельскай гаспадаркі Рэспублікі Беларусь выкладчыкам і студэнтам універсітэта.  Пасля цырымоніі віцэ-прэм’ер даў эксклюзіўнае інтэрв’ю карэспандэнту «Звязды».


Аляксандр Субоцін зазначыў, што маладым спецыялістам важна данесці, што яны — наша будучыня, менавіта на іх дзяржава робіць стаўку.

— Чаму я прыехаў сюды? Людзі, якія тут працуюць, не чужыя, і гэта атмасфера для мяне родная, таму прыехаў і адпачыць душой, і чымсьці дапамагчы напачатку новага навучальнага года, — выказаў свае пачуцці віцэ-прэм’ер.

Ён падкрэсліў, што сёння вельмі важна звярнуць увагу менавіта на аграрную адукацыю. У Беларусі чатыры вышэйшыя ўстановы, якія займаюцца падрыхтоўкай кадраў для аграрна-прамысловага комплекса. І кожная ўстанова па-свойму ўнікальная. Па словах Аляксандра Субоціна, Гродзенскі аграрны ўніверсітэт адметны тым, што мае цесныя сувязі з еўрапейскімі ВНУ і моцныя навуковыя школы. Як вынік — моцная і трывалая сельскагаспадарчая галіна рэгіёна, дзе большасць кіраўнікоў і спецыялістаў — выпускнікі Гродзенскага аграрнага ўніверсітэта. Аграрыі Гродзеншчыны — традыцыйныя рэкардсмены па жніве, тут заўсёды самая высокая ўраджайнасць у краіне, таксама высокія паказчыкі і па жывёлагадоўлі.

— Падчас такіх паездак падымаецца вельмі шмат пытанняў, — зазнчыў Субоцін. — Як у афіцыйным фармаце, так і пры прыватных размовах.  Магчыма трэба дапамагчы што-небудзь з матэрыяльнай базай. Таксама ёсць нагода абмеркаваць  перспектывы вышэйшай адукацыі.

Віцэ-прэм’ер паведаміў, што напрыканцы мінулага тыдня, пры наведванні акадэміі ў Горках, падымалася пытанне аб кодэксе вышэйшай адукацыі.

— Трэба нешта карэкціраваць, бо час мяняецца, краіна мяняецца. І нам  нельга адставаць у гэтым ключавым аспекце менавіта ў вышэйшай адукацыі. Таму важна пачуць думкі на месцах. Немалаважна і аказаць падтрымку вышэйшым навучальным установам, штосьці аператыўна вырашыць. Гэта можа быць дапамога ў закупцы абсталявання альбо акрэдытацыі лабараторыі. І такіх праблем рабочых вельмі шмат, яны і павінны быць, гэта паказчык таго, што калектыў універсітэта працуе, імкнецца штосьці зрабіць. І калі я буду чымсьці карысны, я абавязкова дапамагу, — зазначыў у размове з карэспандэнтам «Звязды» Аляксандр Субоцін.

Маргарыта УШКЕВІЧ

Фота прадастаўлена ГДАУ

Выбар рэдакцыі

Грамадства

Сёння пачаў работу УНС у новым статусе

Сёння пачаў работу УНС у новым статусе

Амаль тысяча дзвесце чалавек сабраліся, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.