Вы тут

Беларускія тэнісісты пачалі выступленне на US Open


У Нью-Ёрку стартаваў турнір серыі «Вялікага шлема» — адкрытага чэмпіянату ЗША па тэнісе, больш вядомага, як US OPEN. Нягледзячы на сусветную пандэмію і ўсеагульную адмену вялікіх спаборніцтваў, напрыклад, такіх, як Уімблдон, арганізатары не пабаяліся і вырашылі правесці легендарны турнір.


За сваю 140-гадовую гісторыю US Open ніколі не прыпыняўся, не пераносіўся. Але сёлета турнір мае свае асаблівасці. Не будзе кваліфікацыйнага раўнда і спаборніцтваў сярод юніёраў. На другі тыдзень тэніснага форуму пройдуць спаборніцтвы сярод спартсменаў на калясках. Яшчэ адно патрабаванне часу — адсутнасць гледачоў на трыбунах.

Першая і другая ракеткі планеты аўстралійка Эшлі Барці і румынка Сімона Халеп, чэмпіёнка 2019 года канадка Б'янка Андрэеску з-за пандэміі не прыедуць на US Open. Увогуле ў жаночай сетцы турніру адсутнічаюць 24 спартсменкі з топ-100 сусветнага рэйтынга. У мужчынскай сетцы на корт не выйдуць 12 тэнісістаў з топ-100, у тым ліку і пераможца мінулага года іспанец Рафаэль Надаль.

У асноўнай сетцы турніру — шэсць беларускіх спартсменаў: Ягор Герасімаў, Арына Сабаленка, Вікторыя Азаранка, Аляксандра Сасновіч. Вера Лапко і Вольга Гаварцова. Свае першыя матчы беларусы правялі на сваю карысць.

Ягор Герасімаў, які займае 72-ю пазіцыю сусветнага рэйтынга, пачаў выступленне на турніры супраць серба Душана Лаёвіча, які размясціўся на 24-й пазіцыі. Адзіны прадстаўнік Беларусі ў мужчынскай сетцы перамог апанента з вынікам 6:1, 4:6, 6:4, 6:4. Гэтая перамога дала яму пуцёўку ў другі раўнд турніру, дзе ён сустрэнецца з аўстралійцам Джорданам Томпсанам, 63-й ракеткай планеты.

Пераможна стартавала Аляксандра Сасновіч (105-я пазіцыя ў рэйтынгу WTA). Яе матч супраць амерыканскай тэнісісткі Франчэскі Ды Ларэнца (128 WTA) скончыўся з вынікам 2:6, 7:6 (3), 6:0 на карысць беларускі. Саперніцай Аляксандры ў матчы другога круга стане Маркета Вандрушава (19 WTA) з Чэхіі. Разам з Вікторыяй Кужмавай са Славакіі Аляксандра Сасновіч правядзе матч у парным разрадзе.

З перамогі пачала для сябе US Open Вера Лапко (351 WTA). У першым матчы яна сустрэлася з прадстаўніцай Швейцарыі Вікторыяй Галубіч (123 WTA). 1:6, 7:6(2), 6:2 — пераможны вынік Веры Лапко. Наступны матч беларуска правядзе супраць Юліі Пуцінцавай (35 WTA) з Казахстана.

Пакуль не правялі свае першыя матчы Арына Сабаленка (11 WTA) і Вікторыя Азаранка (59 WTA). У першым крузе Арына сустрэнецца з францужанкай Асіян Дада (118 WTA), а Вікторыя — з аўстрыйкай Барбарай Хаас. У выніку перамог у сваіх матчах Азаранка і Сабаленка сустрэнуцца па розныя бакі сеткі ў другім крузе.

Скончыцца US Open 13 верасня. І, нягледзячы ні на што, зноў падорыць аматарам спорту захапляльнае відовішча і незабыўныя пазітыўныя эмоцыі.

Валерыя Сцяцко

Загаловак у газеце: Час расчахліць ракеткі

Выбар рэдакцыі

Жыллё

Па якіх крытэрыях дамы ўваходзяць у праграму па капрамонце?

Па якіх крытэрыях дамы ўваходзяць у праграму па капрамонце?

Пра ўсе тонкасці правядзення капітальнага рамонту расказалі спецыялісты.

Рэгіёны

Самы працяглы ўрок гістарычнай праўды і сяброўства

Самы працяглы ўрок гістарычнай праўды і сяброўства

Удзельнікі «Цягніка Памяці» папярэдніх гадоў дзеляцца сваімі ўражаннямі ад праекта.

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.