РНПЦ анкалогіі — 60 гадоў

Сёння РНПЦ анкалогіі і медыцынскай радыялогіі імя М. М. Аляксандрава святкуе сваё 60-годдзе.

У цэнтры працуе дзве тысячы медыкаў. Штодзень да іх звяртаюцца каля тысячы пацыентаў (тут ёсць свая паліклініка). У суткі хірургі-анколагі РНПЦ выконваюць да 70 аперацый. За год у стацыянары РНПЦ праводзіцца да 12 тысяч хірургічных умяшанняў, і каля чатырох тысяч — на амбулаторным этапе. Штогод лячэнне ў цэнтры атрымліваюць каля 30 тысяч пацыентаў, сярод іх — каля 2,5 тысячы замежнікаў. Пераважна ў цэнтр на дыягностыку і лячэнне прыязджаюць грамадзяне Расіі і Украіны, нярэдкія і пацыенты з Каўказскіх рэспублік і краін Прыбалтыкі. Таксама бываюць госці з Вялікабрытаніі, ЗША, Германіі, Італіі. У мінулым годзе замежныя пацыенты заплацілі за лячэнне і абследаванне ў беларускіх анколагаў каля 3,5 мільёна долараў.

— Штогадовы прырост анкалагічнай паталогіі ў краіне — больш за 50 тысяч пацыентаў. У мужчын на першым месцы па лакалізацыі — рак прастаты, у жанчын — рак малочнай залозы. Адна з надзённых праблем — рак тоўстай кішкі, — пералічвае Сяргей ПАЛЯКОЎ, дырэктар РНПЦ анкалогіі і медыцынскай радыялогіі імя М. М. Аляксандрава.

«Мы ганарымся, што захавалі тое ўпарадкаванне анкалагічнай службы, якое існуе цяпер», — дадаў ён. Пяць гадоў на базе РНПЦ працуе Рэспубліканская малекулярна-генетычная лабараторыя канцэрагенезу, дзе праводзіцца сучасная дыягностыка анкалагічных захворванняў, дзейнічае Рэспубліканскі цэнтр пазітронна-эмісійнай тамаграфіі. Нядаўна адкрыты пансіянат на 118 нумароў для пражывання блізкіх пацыентаў, плануецца адкрыць аддзяленне з палатамі павышанай камфортнасці. Усяго на тэрыторыі РНПЦ 35 карпусоў і будынкаў.

* * *

Прэзідэнт Беларусі Аляксандр Лукашэнка павіншаваў калектыў РНПЦ анкалогіі і медыцынскай радыялогіі з 60-годдзем. Кіраўнік дзяржавы адзначыў, што калектыву ўстановы ўдалося захаваць і прымножыць лепшыя традыцыі, выбудаваць эфектыўную сістэму аказання спецыялізаванай меддапамогі насельніцтву, сфарміраваць уласную навуковую школу і выратаваць дзясяткі тысяч чалавечых жыццяў.

Алена КРАВЕЦ

Фота Яна ХВЕДЧЫНА