Вы тут

«Для бібліятэк зараз галоўная задача — прасоўванне чытання як працэсу»


Папулярызацыя чытання сярод моладзі — тая тэма, якая ўжо не адзін год застаецца актуальнай для ўсіх, ад аўтараў і выдаўцоў да настаўнікаў і бацькоў кожнага новага пакалення. У чарговы раз сваё бачанне сітуацыі і шляхоў яе змянення агучылі ў коле бібліятэкараў і пісьменнікаў.


— Вельмі знакава, што напачатку новага навучальнага года і напярэдадні Дня беларускага пісьменства мы гаворым пра кнігу, пра чытанне на роднай мове, — падкрэсліла першы намеснік Саюза пісьменнікаў Беларусі Алена Стэльмах. — У мяне сёння ёсць магчымасць гаварыць пра кнігу ў тым ліку і з пазіцыі ўласнай творчасці, бо шэраг маіх праектаў убачылі свет у Выдавецкім доме «Звязда». Сёння пісьменнікі вельмі часта ідуць на сустрэчы з дзецьмі і ў бібліятэкі, і ў школы. І гэта вельмі важна не толькі таму, што пісьменнік сам нясе дзецям святло сваіх кніг, але і таму, што так мы больш разумеем дзіцячую псіхалогію, тэмы, якія патрэбныя гэтай аўдыторыі. І нам хочацца, каб кніга ўсё ж такі заставалася адной з галоўных крыніц ведаў і пазнання свету, бо толькі так магчыма выхаваць асобу.

Для беларускіх пісьменнікаў вельмі важна перш за ўсё пісаць на роднай мове, каб нашы дзеці чулі роднае слова, чыталі казкі і іншыя творы па-беларуску. Прысутныя адзначылі: радуе, што сёння ўзрастае імкненне з боку маладых бацькоў самім ведаць родную мову ды вучыць гэтаму сваіх дзяцей. У наш час прасоўванне кніг і папулярызацыя чытання — нялёгкая справа, паколькі дзеці і падлеткі аддаюць найбольш увагі гаджэтам. Тым жа бібліятэкам даводзіцца прыдумваць самыя розныя формы і спосабы ўзаемадзеяння з юнымі чытачамі і іх бацькамі, каб пазнаёміць іх з кніжнымі навінкамі, заахвоціць чытаць і адкрываць для сябе новых аўтараў у беларускай літаратуры.

Як заўважыла намеснік дырэктара Цэнтралізаванай сістэмы дзіцячых бібліятэк г. Мінска Алена Чарняўская, «сёння бібліятэкі не могуць жыць без пісьменнікаў, бо толькі дзякуючы добрым пісьменнікам мы маем добрыя кнігі».

— Хоць ёсць меркаванне, быццам сучасныя дзеці не чытаюць, але насамрэч яны чытаюць. У іх свае героі, свае тэмы і ўласны выбар кніг, якім яны аддаюць перавагу. І для бібліятэк зараз галоўная задача — прасоўванне чытання як працэсу, пашырэнне моды на яго, — падкрэсліла Алена Чарняўская.

Алена ДРАПКО

Прэв'ю: bobruisk.gov.by

Загаловак у газеце: Пашырыць моду на чытанне

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.