Паэты, якія злучаюць берагі

У Растоўскай вобласці Расіі падведзены вынікі V Міжнароднага маладзёжнага фестывалю­конкурсу паэзіі й паэтычных перакладаў “Берега дружбы”. Гран­-пры — у Стасі Кацюргіной з Гомеля.

Вестку пра тое (вялікі тэкст каардынатара конкурсу Вольгі Сафонавай) даслаў нам у рэдакцыю Леанід Север. Ён узначальвае суполку “Белорусы Неклиновского района”, уваходзіць у Вышэйшы творчы савет Саюза пісьменнікаў Расіі, сябар Саюза пісьменнікаў Беларусі. Што канкрэтна лучыць гэтага пісьменніка з Беларуссю — пра тое, спадзяемся, ён яшчэ напіша нам пазней. Леанід Юр’евіч пераслаў і фотаздымкі. Мы даведаліся, што гэты творчы форум — расійска-беларускі. Сёлета, праўда, з‑за каранавіруса беларусы ў Таганрог і Няклінаўскі раён Растоўскай вобласці (там праходзілі фестывальныя імпрэзы) прыехаць не змаглі. Аднак уладальніцай гран-пры “Берегов дружбы”-V стала наша зямлячка, вядомая паэтэса Анастасія Кацюргіна з Гомеля. А калі падводзіліся вынікі конкурсу, то ў часе відэаканферэнцыі да імпрэзы далучыўся ў рэжыме анлайн і Уладзімір Гаўрыловіч — старшыня Гомельскага абласнога аддзялення СП Беларусі.

Інтэрнэт падказвае, што Стася Кацюргіна яшчэ ў 2011‑м выдала зборнік “Пад ветразем ранку”, і тады гэта была першая паэтычная кніга студэнткі 2‑га курса філфака Гомельскага дзяржуніверсітэта імя Ф. Скарыны. Вершы Стасі ёсць і на вядомым партале https://stіhі.ru/ у інтэрнэце. Званне лаўрэата І ступені заваявала паэтэса, мастачка-ілюстратар Наталля Алейнікава з Мінска. Сярод лаўрэатаў ІІ прэміі — Аліна Паўлоўская (Гродна) і Надзея Петручук-Філон (Гомель). У ліку лаўрэатаў ІІІ прэміі — Марыя Багданчыкава (Гомель), Вольга Грынь (Светлагорск), Яніна Цімашэня (Гомель).

У аргкамітэт конкурсу паступіла 500 заявак, 235 аўтараў прайшлі першы адборачны тур, выконвалі заданні па перакладах. Урэшце 116 сталі фіналістамі: атрымалі права прыехаць на фестываль. На ім праходзілі фінальныя слуханні, падводзіліся вынікі конкурсу, працавала й адкрытая школа паэтычнага перакладу, якая рэарганізавана сёлета ва Усерасійскую.

Іван Іванаў