Вы тут

Кітайскі агурок — незвычайная разнавіднасць звыклай агародніны


Кітайскія агуркі з'явіліся на нашых градках не так даўно. Многія паставіліся да іх з недаверам, доўга прыглядаліся. Але той, хто рызыкнуў пасеяць гэтую цуда-гародніну, стаў яе адданым прыхільнікам.


Кітайскі агурок — незвычайная разнавіднасць звыклай агародніны

Кітайскі агурок — гэта не проста сорт агульнавядомай агародніны, а асобная разнавіднасць. Па сваім знешнім выглядзе кітайскі госць падобны на свайго звычайнага сабрата, але ў той жа час мае яўна выгадныя адметныя прыкметы:

- даўгаплоднасць — у даўжыню адзін агурок можа вырастаць да 50 і нават 90 сантыметраў;

- больш салодкі смак;

- абсалютную адсутнасць горычы лупіны;

- дробнае, мяккаватае насенне, якое не грубее ў працэсе росту плода;

- незвычайны водар, які выклікае асацыяцыю з дыняй або кавуном.

Кітайскія агуркі хуткаспелыя, пладаносяць доўга і шмат, прычым як ва ўмовах цяпліцы, так і ў адкрытым грунце. Першы ўраджай можна здымаць ужо праз 35—40 дзён пасля з'яўлення ўсходаў, а апошнія плады гэтая разнавіднасць прынясе перад самымі замаразкамі.

Акрамя названых асаблівасцяў, кітайскія агуркі маюць і іншыя бясспрэчныя перавагі:

- высокую ўстойлівасць да асноўных агурочных захворванняў;

- непатрабавальнасць да асветленасці;

- багатае плоданашэнне. Асноўная маса кветак на ліяне — жаночыя, прычым сабраныя па некалькі штук у пучкі, завязі бывае шмат. Пры правільным доглядзе ўраджайнасць можа скласці да 30 кілаграмаў з аднаго куста;

- выдатны таварны выгляд. Нават перарослыя агуркі не жоўкнуць, застаюцца пругкімі, не маюць буйнога і цвёрдага насення ўнутры плода.

Плады кітайскіх агуркоў спеюць часцей за ўсё пучкамі па два і больш штук Пры пасадцы ўсяго 3-4 раслін можна забяспечыць патрэбнасць звычайнай сям'і ў гэтай гародніне на працягу ўсяго сезона.

Акрамя вялікай колькасці станоўчых якасцяў, кітайскі агурок мае і некаторыя мінусы:

- захоўваць яго можна вельмі непрацяглы час. Практычна на наступны дзень пасля збору плод пачынае траціць сваю пругкасць, можа стаць мяккі;

- існуе вялікая колькасць салатных сартоў кітайскага агурка і значна меншая — засолачных і ўніверсальных;

- большасць агароднікаў адзначаюць невысокую ўсходжасць насення;

- агурочная плець мае патрэбу ў абавязковай вертыкальнай падвязцы, у адваротным выпадку плады будуць мець выродлівую, крукападобную форму;

- некаторыя сарты маюць калючыя шыпы.

Дасведчаныя агароднікі адзначаюць, што агуркі, шыпы на паверхні якіх афарбаваны ў светлыя адценні, падыходзяць для агароднінных салатаў, а з цёмнымі шыпамі — для засолкі.

Кітайскія агуркі надзвычай разнастайныя: сярод іх сустракаюцца магутныя і тонкія, буйныя і прамыя або мудрагеліста выгнутыя, цёмна-зялёныя і нават малочна-белыя.

Асаблівасці пасадкі і вырошчвання

Вырасціць кітайскія агуркі зусім нескладана, агратэхніка пасадкі і догляду за гэтай разнавіднасцю практычна ідэнтычная патрабаванням да вырошчвання агуркоў традыцыйных сартоў. Добрая асветленасць, пастаянная вільготнасць і досыць урадлівая глеба — вось галоўныя ўмовы атрымання багатага ўраджаю. Пры вырошчванні кітайскіх агуркоў у цяпліцы плоданашэнне найбольш багатае, бо тут яно не залежыць ад рэгіянальных кліматычных асаблівасцяў і капрызаў надвор'я.

Падрыхтоўка глебы

Пры выбары месца пад пасадку кітайскіх агуркоў перавагу аддаюць добра асветленаму ўчастку, на якім у папярэднім сезоне вырошчвалі памідоры, бабовыя, бульбу, моркву або капусту. Непажаданымі папярэднікамі з'яўляюцца баклажаны, кабачкі і патысоны, бо маюць адных і тых жа шкоднікаў. Глебу пад будучыя градкі варта рыхтаваць загадзя, пажадана з восені, бо большасці рэчываў, якія ўносяцца ў якасці ўгнаенняў, патрабуецца 4—5 месяцаў для раскладання да ўзроўню мікраэлементаў.

Падрыхтоўка насення і расады

Вырошчваць кітайскі агурок пажадана праз расаду. Адным з недахопаў гэтай разнавіднасці з'яўляецца невысокая ўсходжасць насення, таму рэкамендуецца праводзіць перадпасяўную падрыхтоўку насеннага матэрыялу. Перад пасевам насенне абеззаражваюць у растворы марганцоўкі: у марлевым мяшочку апускаюць у насычаны ружовы раствор марганцоўкі, вымаюць хвілін праз 15—20 і прамываюць пад струменем вады. Каб павялічыць энергію прарастання, насенне апрацоўваюць стымулятарамі росту. Пасля перадпасяўной падрыхтоўкі насенне рэкамендуецца прарасціць, а затым высадзіць у асобныя ёмістасці, запоўненыя пажыўным грунтам.

Правілы догляду

Асноўныя ўмовы — дастатковы паліў і сістэматычныя падкормкі. Паліваць расліны варта раніцай ці вечарам цёплай вадой з палівачкі з распыляльнікам. Паліў са шланга або з вядра можа агаліць каранёвую сістэму. Тэмпература вады для паліву агуркоў павінна быць не ніжэй тэмпературы паветра.

Кітайскія агуркі — карысная і выгадная культура. Яна здольная парадаваць не толькі сваёй незвычайнасцю, але і выдатным смакам, доўгім плоданашэннем, багатым ураджаем. Калі гэта агародніна яшчэ не заняла належнага месца на вашых градках, звярніце на яго ўвагу. Вынік вас не расчаруе!

А вось такога прыгажуна даўжынёй 83 сантыметры вырасціў наш чытач Сяргей.

Вядучая рубрыкі Ірына Тамковіч. Тэл. 8 (017) 287-18-15

Выбар рэдакцыі

Палітыка

Лукашэнка: Беларусь і Расія сур'ёзна рушылі наперад у пытанні ўзгаднення саюзных праграм

Лукашэнка: Беларусь і Расія сур'ёзна рушылі наперад у пытанні ўзгаднення саюзных праграм

У Маскве адбылася сустрэча і перагаворы кіраўніка нашай краіны з яго калегам Уладзімірам Пуціным.

Грамадства

Еш ананасы, яблыкі жуй! Як падтрымаць імунітэт без аптэчкі?

Еш ананасы, яблыкі жуй! Як падтрымаць імунітэт без аптэчкі?

З авітамінозам у нас прынята змагацца па-старому...

Грамадства

Брагінскія кавуны з прыстаўкай «эка-»

Брагінскія кавуны з прыстаўкай «эка-»

На Гомельшчыне актыўна рэалізоўваюцца праекты па развіцці тэрыторый, пацярпелых у выніку катастрофы на ЧАЭС. 

Грамадства

Дружыннікі выходзяць на дзяжурства... А разам з імі — і карэспандэнт «Звязды»

Дружыннікі выходзяць на дзяжурства... А разам з імі — і карэспандэнт «Звязды»

Кожны замацаваны за сваім участковым, у кожнага свая зона адказнасці.