Вы тут

Уладзімір Пракапцоў: Грамадскае жыццё заўсёды сувымяраецца з сацыяльнымі памкненнямі грамадства


На пытанні карэспандэнта «Звязды» генеральны дырэктар Нацыянальнага мастацкага музея Беларусі Уладзімір Пракапцоў адказаў у пярэдадзень XXVІІ Дня беларускага пісьменства ў Бялынічах.


— Уладзімір Іванавіч, нядаўна ў прэс-цэнтры БелТА праходзіла традыцыйная «Экспертная серада». Гаварылі пра выклікі, якія грамадска-палітычная сітуацыя ставіць перад інтэлігенцыяй краіны...

— І я хацеў бы паўдзельнічаць у размове на гэтую тэму. Шкада, што не змог. А ўвогуле, як мне падаецца, пытанне патрэбна ставіць крыху іначай. Варта сёння дыскутаваць, разважаць пра тое, дзе месца нацыянальнай інтэлігенцыі. У стваральных дзеях ці ў акцёрскай барацьбе на вуліцах. Не, я нават не Купалаўскі тэатр маю на ўвазе і ўсё тое, што вакол яго адбываецца. Я проста думаю пра тое, што кожны крок, кожнае рашэнне тых людзей, хто адносіць сябе асабліва да творчай інтэлігенцыі, павінны быць разважлівыя, разумныя. Разбуральныя памкненні — гэта часам выглядае стыльна, смела... Так, для некага смела, можа быць, нават прыгожа, калі ўлічваць мастацкі пункт гледжання. Але што будзе пасля разбурэння і развалу?! Канешне ж, усім зразумелая рытарычнасць гэтага пытання.

— Якой вы бачыце ролю творцаў, мастакоў у шырокім плане — слова, сцэны, мастакоў як майстроў пэндзля, у грамадскім жыцці?

— Грамадскае жыццё, як і палітычнае, заўсёды сувымяраецца з сацыяльнымі памкненнямі грамадства. І адукацыя, культура займаюць сёння не апошнюю ролю ў нашай рэчаіснасці. Пагадзіцеся, і адукацыя, і культура, асветніцкая праца, навуковая работа — усе гэтыя складнікі патрабуюць уніклівай, паўсядзённай карпатлівай працы. Мітынгоўшчына тут не праходзіць. Так, кожны творца — гэта чалавек-адзінка. І, зразумела ж, варта ўлічваць яго індывідуалісцкі характар. Але ў агульнай задачы ўплываў мастацтва, культуры на грамадства нам патрэбна і агульнае разуменне мэт, нам патрэбны адзінства, кансалідацыя ў будаўніцтве суверэннай і незалежнай Беларусі.

Вось нядаўна падзеяй у нашым Нацыянальным музеі сталася выстаўка «Чырвоны код». Колер у розных работах — жывапісе, скульптуры, графіцы — зрабіўся сімвалам, які аб'ядноўвае. І гэты колер, гэтыя работы — з розных часін, розных дзесяцігоддзяў.

— Музей і вы асабіста, Уладзімір Іванавіч, надзвычай шмат робіце для захавання гістарычнай спадчыны ў галіне выяўленчага мастацтва...

— Не буду асобна спыняцца, колькі намі было зроблена па захаванні, кансервацыі Мірскага замка. Гэта частка жыцця, калі хочаце, Нацыянальнага мастацкага... Крыху звярну ўвагу на выдавецкія, кніжныя праекты, звязаныя з прапагандай гісторыі выяўленчага мастацтва Беларусі. Мы ўдзячны, што з музеем у добрых стасунках Міністэрства інфармацыі Рэспублікі Беларусь, кніжныя выдавецтвы краіны. І «Беларусь», і «Беларуская Энцыклапедыя імя Петруся Броўкі», і «Мастацкая літаратура» — з усімі гэтымі выдавецтвамі мы вельмі шмат выпусцілі розных выданняў, якія, несумненна, уплываюць на мастацкае выхаванне грамадства, якія разам уяўляюць сабою гісторыка-мастацкую бібліятэку. Дзяржава істотна паспрыяла нараджэнню гэтых кніг, а людзі творчыя, апантаныя, і выдавецкія работнікі, і нашы музейшчыкі, без лішняга шуму, без пустой валтузні, зрабілі тое, што ўжо сёння можна лічыць з'явай на дзесяцігоддзі. З дапамогай гэтых альбомаў, кніг па-новаму, болей шырока можна прачытаць лёсы В. Бялыніцкага-Бірулі, Ф. Рушчыца, іншых мастакоў, зразумець, асэнсаваць іх адносіны з грамадствам і ўладай.

— Зараз нейкая цішыня ў дачыненні да тэмы Музейнага квартала...

— Гэта ўнікальны праект. І цішыня зараз толькі інфармацыйная. Работы, далейшае праектаванне — усё працягваецца. Я асабіста ўдзячны Прэзідэнту нашай краіны Аляксандру Рыгоравічу Лукашэнку за пастаянную ўвагу да гэтай тэмы. Спадзяюся, што Музейны квартал будзе сапраўдным упрыгожваннем сталіцы Беларусі, будзе прыцягваць у Мінск яшчэ болей турыстаў з далёкага і блізкага замежжа.

— Пандэмія істотна паўплывала на новыя праекты выставачнага характару ў Нацыянальным мастацкім музеі?

— COVІD-19 на ўсё, несумненна, паўплываў. Але гэта яшчэ і выпрабаванне для культурна-асветніцкіх устаноў. Нам даводзіцца яшчэ болей генерыраваць ідэй, прыдумваць прывабных творчых праектаў. І шмат што атрымліваецца. Музей з дня ў дзень запрашае на новыя сустрэчы. Запрашаем у музей і чытачоў «Звязды»!..

Гутарыў Мікола БЕРЛЕЖ

Фота Яўгена ПЯСЕЦКАГА

Выбар рэдакцыі

Грамадства

Як кадравыя агенцтвы падманваюць даверлівых грамадзян

Як кадравыя агенцтвы падманваюць даверлівых грамадзян

Калі ў кадравым агенцтве вам прапануюць заплаціць грошы і гарантуюць стапрацэнтнае працаўладкаванне, смела разварочвайцеся і сыходзьце: перад вамі, напэўна, ашуканцы.

Грамадства

Прыродныя антыбіётыкі: Лекі, якія дапамагаюць перамагчы інфекцыю і ўмацоўваюць ахоўныя ўласцівасці арганізма

Прыродныя антыбіётыкі: Лекі, якія дапамагаюць перамагчы інфекцыю і ўмацоўваюць ахоўныя ўласцівасці арганізма

У адрозненне ад «хімічных антыбіётыкаў», прыродныя лекі не толькі дапамагаюць перамагчы інфекцыю, але і ўмацоўваюць ахоўныя ўласцівасці арганізма.

Калейдаскоп

Усходні гараскоп на наступны тыдзень

Усходні гараскоп на наступны тыдзень

СКАРПІЁН. На гэтым тыдні традыцыйны падыход да вырашэння праблем не заўсёды будзе ўдалы.

Грамадства

Як дзейнічалі партызаны ва Усакінскім лесе на Клічаўшчыне

Як дзейнічалі партызаны ва Усакінскім лесе на Клічаўшчыне

Піша сын аднаго з партызан Генадзь Сахрай.