Абмежаванні на наведванне лясоў дзейнічаюць у трох раёнах Беларусі

Абмежаванні на наведванне лясоў дзейнічаюць у трох раёнах Беларусі, піша БЕЛТА са спасылкай на Міністэрства лясной гаспадаркі.

Абмежаванні ўведзены ў Акцябрскім раёне Гомельскай вобласці, а таксама ў Стаўбцоўскім і Салігорскім раёнах Мінскай.

Рашэнні аб увядзенні і зняцці забароны на наведванне лясоў прымаюць мясцовыя органы ўлады па хадайніцтве лесагаспадарчых устаноў або раённых аддзелаў па надзвычайных сітуацыях. Абмежавальныя меры ўводзяцца ў выпадку высокага класа пажарнай небяспекі. Галоўная мэта забароны на наведванне лясоў — забеспячэнне бяспекі грамадзян, захаванасці іх маёмасці, а таксама ляснога фонду.

На сайце Міністэрства лясной гаспадаркі размешчана інтэрактыўная карта, з дапамогай якой можна аператыўна адсачыць, у якіх рэгіёнах часова забаронена наведваць лясы. Парушэнне патрабаванняў пажарнай бяспекі ў лясах і на тарфяніках або забароны на іх наведванне без нанясення ўрону прыводзіць, згодна з арт. 15.29 КоАП, да папярэджання або накладання штрафу да 25 базавых велічынь (1 БВ — Br27).

Прэв’ю: dw.com