Вы тут

Што чакае сёлетняй зімой спажыўцоў жыллёвых паслуг


Сёлета тэрмін пачатку ацяпляльнага сезону ў краіне цалкам залежыць ад рашэння мясцовых органаў улады. Камунальнікам толькі паведамяць пра падключэнне. Спецыялісты ЖКГ тым часам сочаць за нарыхтоўкай паліва на зіму і станам абсталявання, а таксама аплатай камунальных паслуг, за пратэрміноўку якой нават на адзін дзень можна адразу стварыць выканаўчы надпіс. А праз два месяцы адлучыць кватэру ад усіх выгод: газа-, цеплазабеспячэння, святла і нават каналізацыі. Як краіна рыхтуецца да зімы, на прэс-канферэнцыі ў БелТА расказалі айчынныя камунальнікі і энергетыкі.


Пашпарты гатоўнасці

Да 30 верасня ўсе цеплакрыніцы краіны, якія абслугоўвае Мінжылкамгас, атрымаюць пашпарты гатоўнасці да работы ў асенне-зімовы перыяд. Адпаведныя дакументы маюць ужо 98,9 % такіх аб'ектаў. Ёсць пашпарты гатоўнасці і ў амаль 83 % аб'ектаў жылфонду Беларусі, для якіх гэта бадай што асноўны паказчык гатоўнасці да ацяпляльнага сезону. Пры гэтым сталіца, Гомельская, Брэсцкая і Гродзенская вобласці «пашпартызаваны» на 100 %. У Мінскай вобласці без пашпартоў пакуль 33 аб'екты, у Магілёўскай — сем, у Віцебскай — чатыры.

— Сёння фактычна ўсе мерапрыемствы, якія прадугледжаны для атрымання пашпартоў гатоўнасці, выкананы. У прыватнасці, прафрамонт сістэм ацяплення цеплавузлоў, гідраўлічныя іспыты сістэм ацяплення і іх апрэсоўка выкананы на 100 %, — падзяліўся лічбамі Генадзь АКСЦІЛОВІЧ, начальнік аддзела па рабоце са зваротамі грамадзян і СМІ Міністэрства ЖКГ. — Засталося дарамантаваць нязначную частку даху (выканана ўжо 97,6 %) і сценавых панэляў (зроблена 99,2 %), а таксама праверыць прыборы ўліку цеплавой энергіі (96,8 % з іх ужо прайшлі гэтую працэдуру).

У сталічнай вобласці пашпарты гатоўнасці атрымалі 73 % спажыўцоў энергіі і 80,3 % цеплакрыніц. Спецыялісты працуюць і ў выхадныя дні, так што да 30 верасня пашпарты атрымаюць усе, удакладніла Таццяна МУЗОК, начальнік аддзела энергетыкі і паліва ўпраўлення жыллёва-камунальнай гаспадаркі, энергетыкі і паліва Мінаблвыканкама.

Каб своечасова зарэгістраваць пашпарты гатоўнасці, без выхадных працуе і персанал філіялаў Дзяржэнергагазанагляду, сцвярджае Аляксандр АЗЯРЭЦ, генеральны дырэктар установы «Дзяржаўны энергетычны і газавы нагляд»:

— Зарэгістраваны 25 013 пашпартоў гатоўнасці спажыўцоў цеплаэнергіі (87,1 %) з 28 731, якія неабходна аформіць, а таксама 9426 пашпартоў гатоўнасці цеплакрыніц (89,1 %) з неабходных 10 579. Гатовыя 423 пашпарты гатоўнасці спажыўцоў цеплаэнергіі (95,9 %) і 256 пашпартоў гатоўнасці цеплакрыніц (97,3 %) арганізацый Мінэнерга.

Да 25 верасня будуць мець пашпарты гатоўнасці і ўсе цеплакрыніцы арганізацыі «Белтапгаз». Пакуль іх атрымалі 98 % аб'ектаў.

Аварыйныя брыгады і перасовачныя кацельныя

Рыхтуючыся да зімы, камунальнікі сфарміравалі 752 аварыйна-аднаўленчыя брыгады. Падрыхтавалі да працы 15 перасовачных модульных кацельных і правялі планавыя трэніроўкі па іх разгортванні ва ўмовах, максімальна набліжаных да тых, якія могуць скласціся падчас надзвычайных сітуацый на кацельных і цепласетках. Напагатове таксама 570 аўтаматычных перасовачных крыніц электразабеспячэння, расказала Святлана ЦІМОШКІНА, намеснік начальніка ўпраўлення камунальнай гаспадаркі і энергетыкі Міністэрства ЖКГ:

— У цэлым аб'екты гатовыя да работы ў асенне-зімовы перыяд. Ад гадавога задання па замене цепласетак выканана 74 %. Поўнасцю нарыхтаваны запасы драўнянага паліва. Для ўтрымання вулічна-дарожнай сеткі гатовыя 3903 адзінкі снегаўборачнай тэхнікі, нарыхтавана 241 тысяча тон пясчана-саляной сумесі. Кожны тыдзень кантралююцца аб'екты ЖКГ па 12 асноўных паказчыках і штомесяц — па 89 іншых паказчыках, якія гарантуюць надзейнае, безаварыйнае і бесперабойнае цепла- і водазабеспячэнне жылога фонду, а таксама забеспячэнне функцыянавання ўсёй інфраструктуры гарадскіх і сельскіх пунктаў краіны падчас ацяпляльнага перыяду.

У штатным рэжыме рыхтуецца да зімы і Міншчына. 86 % аб'ектаў цеплавой гаспадаркі вобласці і 99,8 % — водаправодна-каналізацыйнай гатовыя да зімы. Жыллёвы фонд падрыхтаваны на 99,7 %, расказала Таццяна Музок:

— Поўнасцю створаны запасы паліўнага мазуту. Нарыхтавана 83 % драўнянай шчапы, 75 % торфабрыкету. Да першага кастрычніка ўсё будзе выканана на 100 %.

Сёлета на айчынных тарфяніках здабыта 1691 тысяча тон торфу, а работнікі Белпалівагазу гатовыя цалкам забяспечыць патрэбы прамысловасці і насельніцтва ў гэтым паліве, падзяліўся Дзмітрый ШАЎЛОЎСКІ, першы намеснік генеральнага дырэктара ДВА «Белпалівагаз», і нагадаў насельніцтву, што «ацяпляльны перыяд неўзабаве пачынаецца, і час рабіць заяўкі і набываць неабходнае паліва».

Паўгода, два месяцы ці адзін дзень?

Адмова ад аплаты жыллёва-камунальных паслуг — дэструктыўная перш за ўсё для саміх спажыўцоў, упэўнены Генадзь Аксціловіч, які пракаментаваў заклікі не аплачваць «камуналку», што з'явіліся ў інтэрнэце:

— Аплачваючы жыллёва-камунальныя паслугі, вы аплачваеце паслугі прадпрыемства ЖКГ, якое вам іх аказала ў бягучым месяцы. Адпаведна, у наступным месяцы вы не можаце разлічваць, што ў пад'ездзе своечасова заменяць лямпачку, прыбяруць ці ў час прыедзе аварыйная служба. Заканадаўчыя нормы таксама досыць жорсткія і пачынаюцца фактычна з першага ж дня неаплаты. Гэта, па-першае, пеня (0,3 % ад сумы запазычанасці) за кожны дзень пратэрміноўкі. Па-другое, арганізацыі ЖКГ маюць магчымасць афармлення выканаўчага надпісу. Ён афармляецца фактычна ў безумоўным парадку на падставе звестак арганізацый ЖКГ. Потым ён будзе перададзены судовым выканаўцам, якія ў сваю чаргу маюць комплекс мер, каб спагнаць запазычанасць. Сярод такіх мер — пазбаўленне права кіравання аўто, забарона выезду за мяжу, могуць нават скласці вопіс маёмасці і нерухомасці.

Ужо з двух месяцаў пратэрміноўкі камунальнікі маюць права адключыць неплацельшчыкам ваду, газ, свет, цяпло і нават каналізацыю. А праз паўгода справа можа дайсці да высялення з кватэры ці адчужэння нерухомасці, калі яна прыватная.

— Прафілактычную работу з неплацельшчыкамі, вядома, ніхто не адмяняў, і трэба глядзець па сітуацыі, перш чым жорстка караць. Калі ў ЖЭС адзін-два такіх, можа, у людзей складаная жыццёвая сітуацыя. А калі масава не заплацяць — справа іншая, і меры рэагавання будуць больш жорсткія, — удакладніў спецыяліст.

Для дзяцей — плюс дзесяць, для астатніх — ад васьмі і ніжэй

Адпаведна сёлетняй пастанове Саўміна № 286 аб зацвярджэнні правілаў падрыхтоўкі арганізацый да ацяпляльнага сезону, яго правядзенні і завяршэнні, рашэнне аб тэрмінах пачатку і завяршэння ацяпляльнага сезону прымаецца абласнымі, раённымі, выканкамамі на падставе звестак аб сярэднесутачнай тэмпературы на вуліцы па абласцях. Узгаднення Мінжылкамгаса для гэтага, пачынаючы з цяперашняга сезону, не патрабуецца, расказала Святлана Цімошкіна:

— Цяпер мясцовыя ўлады самі вырашаюць, калі пачынаць сезон, самі падключаюць і паведамляюць пра гэта нам, а не ўзгадняюць тэрміны з Мінжылкамгасам.

Перш за ўсё падключаюцца дзіцячыя дашкольныя, школьныя і медыцынскія ўстановы, калі сярэдняя тэмпература на двары на працягу пяці дзён плюс 10 і ніжэйшая. Другое ў чарзе па цяпло жыллё, якое атрымлівае ацяпленне, калі тэмпература на вуліцы пяць дзён апускаецца ў сярэднім да васьмі градусаў і ніжэй. Апошнімі батарэі ўключаюць у адміністрацыйных і грамадскіх будынках, офісах.

Ірына СІДАРОК, фота аўтара

Загаловак у газеце: Не заплаціш — замерзнеш

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.