Беларускі народ пад кіраўніцтвам Прэзідэнта здольны самастойна забяспечыць палітычную стабільнасць і бяспеку ў сваёй краіне, лічыць старшыня Камітэта па замежных справах, кіраўнік кітайска-беларускай групы дружбы Усекітайскага сходу народных прадстаўнікоў Чжан ЕСУЙ. Аб гэтым ён заявіў падчас сустрэчы з намеснікам старшыні Палаты прадстаўнікоў, кіраўніком рабочай групы Нацыянальнага сходу па супрацоўніцтве з парламентам КНР Валерыем МІЦКЕВІЧАМ у фармаце відэаканферэнцсувязі.
«У Беларусі і Кітая давернае ўсебаковае стратэгічнае супрацоўніцтва. Кітай заўсёды паважаў шлях развіцця, абраны беларускім народам, і намаганні, накіраваныя на абарону незалежнасці, суверэнітэту, бяспекі і развіцця краіны. Мы выступаем супраць спроб знешніх сіл пасеяць разлад і хаос у беларускім грамадстве», — сказаў Чжан Есуй.
Ён даў высокую ацэнку намаганням беларускіх калег па развіцці адносін з Кітаем, прасоўванні супрацоўніцтва паміж парламентамі. Падчас сустрэчы бакі абмеркавалі пытанні далейшага развіцця кітайска-беларускіх адносін па лініі заканадаўчых органаў дзвюх краін, умацавання гандлёва-эканамічнага супрацоўніцтва, узаемнай падтрымкі ў міжнародных справах, сумеснага рэагавання на надзвычайныя сітуацыі.
«Мы высока цэнім падтрымку Кітая, у тым ліку ў пытаннях павагі замежнымі дзяржавамі і міжнароднымі арганізацыямі суверэнітэту, незалежнасці і тэрытарыяльнай цэласнасці Беларусі. Выказваем удзячнасць КНР за канструктыўную пазіцыю адносна сітуацыі ў Беларусі, якая адстойваецца на міжнародных пляцоўках, уключаючы Савет Бяспекі ААН. Мы з цвёрдым аптымізмам глядзім на развіццё беларуска-кітайскіх адносін і ўпэўненыя ў паслядоўнай рэалізацыі ўсіх планаў, — сказаў Валерый Міцкевіч падчас сустрэчы. — Перакананыя, што візіт старшыні КНР Сі Цзіньпіна ў Беларусь надасць дадатковы магутны стымул двухбаковаму супрацоўніцтву. Мы гатовыя да цеснага ўзаемадзеяння з парламентам Кітая ў справе яго падрыхтоўкі і арганізацыі».
Старшыня Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Людміла Макарына-Кібак у размове з журналістамі адзначыла важнасць гуманітарнага супрацоўніцтва Беларусі і Кітая. «Кажуць, сябар пазнаецца ў бядзе. Зусім нядаўна прайшла першая хваля каранавіруснай інфекцыі. Калі мы даведаліся, што ў кітайскага боку ўзніклі праблемы з медыкаментамі, па распараджэнні Прэзідэнта Беларусі першымі ў свеце накіравалі нашым сябрам у КНР самалёты з медыцынскай гуманітарнай дапамогай. Калі СОVІD-19 прыйшоў у Еўропу, Кітай дапамагаў нам з тэст-сістэмамі і іншым медыцынскім абсталяваннем, ахоўнымі сродкамі. Таму лічу, што ўзаемадзеянне групы дружбы вельмі важнае і актуальнае», — падкрэсліла яна.
Наталля ТАЛІВІНСКАЯ
Продаж тавараў праз інтэрнэт у Беларусі актыўна развіваецца.
«Абеліскі параненай зямлі».
АВЕН. На гэтым тыдні фартуна ўсміхаецца вам у многіх справах.
