У Шчучыне рыхтуецца да здачы 12-кватэрны дом для маладых спецыялістаў

Аб гэтым расказала на сустрэчы з маладымі педагогамі намеснік старшыні Шчучынскага райвыканкама Алена Пасюта. Паляпшэнне жыллёвых умоў вядзецца ў рамках раённай праграмы па рабоце з маладымі спецыялістамі.

У праграме задзейнічаны ўсе намеснікі старшыні райвыканкама. У кожнага з іх — свая галіна. Напрыклад, у Алены Пасюты, якая курыруе сацыяльную сферу, большасць маладых спецыялістаў — гэта педагогі. Таму сустрэчы з імі сталі традыцыйнымі. Сёлета ў раён накіравана 35 маладых настаўнікаў.

Усе вакансіі запоўнены. Але адна справа — запоўніць вакансіі, і іншая — замацаваць маладых спецыялістаў на сваіх рабочых месцах. Таму ў раёне распрацавана спецыяльная праграма. Асаблівая ўвага аддаецца перспектыўным рэзервам кадраў. Не застаюцца па-за ўвагай і бытавыя ўмовы. Увогуле, гэты аспект самы надзённы, таму і вырашаецца ў першую чаргу. Як расказала намеснік старшыні райвыканкама, рыхтуюцца да здачы 12 кватэр. Першачарговым будзе выдзяленне жылля маладым спецыялістам. Зараз вядзецца пошук магчымасці крэдытавання.

— У найбліжэйшы час мы рыхтуем да здачы дом — жыллё камерцыйнага найму. У першую чаргу кватэры атрымаюць маладыя спецыялісты — гэта дзяржаўная палітыка, — падкрэсліла падчас сустрэчы Алена Пасюта. — Дом ужо адрамантаваны, гатовы, ёсць мэбля і бытавая тэхніка. Нам важна, каб іншагароднія, якія накіраваны ў раён, таксама тут засталіся, стварылі сям'ю і пусцілі карані. А бытавыя ўмовы не павінны адцягваць увагу ад прафесійнай дзейнасці.

Дарэчы, падчас сустрэчы з'явіўся і прэтэндэнт на такое жыллё. Цяпер малады педагог пражывае ў інтэрнаце, умовы ў якім яе не задавальняюць. Дзяўчыне паабяцалі, што пытанне будзе вырашацца на пасяджэнні жыллёвай камісіі.

Увага да маладога педагагічнага корпуса невыпадковая. На думку Алены Пасюты, педагога з вялікім стажам, гэта ўнікальная прафесія, а можа нават і місія. Бо настаўнік суправаджае дзіця, дапамагае яму сябе рэалізаваць. Таму важна, каб маладыя спецыялісты адчулі падтрымку і ўвагу да сябе. Першыя крокі заўсёды складана рабіць, тым больш у такой адказнай прафесіі. Маладыя спецыялісты расказалі, што амаль за ўсімі замацаваны старэйшыя педагогі, да якіх можна звярнуцца з любым пытаннем і абмеркаваць любую сітуацыю. Тыя, хто адпрацаваў год, падзяліліся сваімі ўражаннямі. Хтосьці навучыўся знаходзіць кампрамісы з вучнямі, хтосьці — спакойна ўспрымаць крытыку, камусьці ўдалося перамагчы свае страхі... І ніхто пакуль не расчараваўся ў прафесіі.

— Важна, каб маладыя педагогі, і ўвогуле спецыялісты, якія пачынаюць тут свой працоўны шлях, адчулі падтрымку ўлад. Таму мы клапоцімся, каб у першую чаргу было жыллё, і потым — магчымасць прафесійнага і асобаснага росту, — гаворыць Алена Пасюта.

Падчас адкрытага дыялога маладыя спецыялісты змаглі задаць свае пытанні датычна гарадскога ўладкавання. Напрыклад, педагогаў цікавіла, ці будуць у горадзе пляцоўкі для скейтэраў і райдэраў, а таксама варкаўты. У Шчучыне нямала старшакласнікаў, якія хочуць адточваць сваё майстэрства на спецыяльна абсталяваных пляцоўках. Пакуль гэта адбываецца на гарадской плошчы, каля райвыканкама.

— Што датычыцца варкаўтаў, такая пляцоўка ёсць на тэрыторыі першай школы-гімназіі, дзе займаецца больш за тысячу вучняў. Плануем устанавіць такія ж каля другой і трэцяй школ, дзе шмат моладзі, таксама ў аграгарадках яны будуць, — паведаміла намеснік старшыні райвыканкама. — Будзе разгледжана пытанне і па скейт-пляцоўках.

Увогуле мясцовыя ўлады чакаюць ініцыятыў і ад маладых спецыялістаў. У гэтым сэнсе варта звярнуцца да еўрапейскіх праектаў. Дарэчы, цяпер у Шчучыне ідзе рэалізацыя аднаго з такіх — па рэканструкцыі школьнага стадыёна. Такі ж праект можна было б прапанаваць і па былым парку атракцыёнаў, які пустуе. Ініцыятыва маладых магла б вярнуць яго да жыцця, стварыць сапраўдную зону адпачынку для дзяцей і дарослых.

— Кожны можа прыйсці з ініцыятывай. Гэта датычыцца і настаўнікаў працоўнага навучання, якія разам з дзецьмі могуць зрабіць што-небудзь і для горада. Матэрыялам улады гатовы дапамагчы, — запэўніла Алена Пасюта.

Маргарыта УШКЕВІЧ

Фота аўтара