На гэты раз яны мелі магчымасць задаць свае пытанні наўпрост губернатару — Леаніду Зайцу. Праблемы традыцыйна датычыліся жыллёва-камунальнай, будаўнічай, дарожнай і іншых сфер дзейнасці. Некаторыя праблемы грамадзян пачалі вырашацца адразу ж пасля іх сігналу. Як у выпадку з расіянкай Таццянай Леанідаўнай, якая жыве ў Мсціславе. Дапамога неабходна яе брату, які перанёс два інсульты і зараз мае патрэбу ў медыцынскай дапамозе. Ён згубіў дакумент, які пацвярджае від на жыхарства ў Беларусі, і яго адмовіліся прымаць у мясцовай бальніцы. Пасля званка на прамую лінію на заяўлены адрас была накіравана хуткая дапамога. Медыкі павінны даць заключэнне, а калі спатрэбіцца, шпіталізаваць пацыента.
Трэць званкоў на прамую лінію паступіла ад магіляўчан і яшчэ тры ад жыхароў Магілёўскага раёна. Па два разы патэлефанавалі з Бабруйска, Круглянскага, Мсціслаўскага і Асіповіцкага раёнаў, а таксама з Бялыніцкага, Бабруйскага, Быхаўскага, Кіраўскага, Клімавіцкага, Краснапольскага, Крычаўскага, Хоцімскага, Чавускага і Шклоўскага раёнаў.
Трывожны сігнал паступіў з вёскі Мосін Хоцімскага раёна, дзе ў гаспадыні захварэлі свінні, тры з якіх прапалі. На месца тэрмінова выехалі спецыялісты раённай ветслужбы.
У сціслыя тэрміны даручана ліквідаваць праблемы па новабудоўлі на вуліцы Бярозаўскай у Магілёве, якая была здадзена ў эксплуатацыю. Шматдзетная маці Алеся Конанава паскардзілася, што ў яе новым жыллі шмат будаўнічых недапрацовак. Да ліку кароткатэрміновых па вырашэнні аднесена і пытанне па ачыстцы меліярацыйнага канала ў завулку Зарэчны ў Магілёве, на стан якога наракала магіляўчанка Ірына Аляксееўна.
З Мсціслава патэлефанавала жанчына і паведаміла, што ў горадзе цэлы год не працуе лазня. Губернатар паабяцаў ёй, што чакаць засталося зусім нядоўга — аб'ект адкрыецца ўжо да 7 лістапада.
З вёскі Нікалаеўка-3 прасігналізавалі наконт дрэнных дарог. Старшыня аблвыканкама даў даручэнне комплексна абследаваць стан дарог у Магілёўскім раёне і сфарміраваць адпаведную праграму па іх рамонце на наступны год. На кантролі пытанне і аб аднаўленні дарогі да могілак у раёне вёскі Грыбаны Магілёўскага раёна. Адтуль паскардзіліся, што яе ўзаралі.
Пад разгляд трапіла таксама скарга з Асіповіцкага раёна наконт працаўладкавання ў мясцовую аграгаспадарку. Бабруйчанін, які пераехаў туды працаваць, абурыўся, што зарплата, якую ён атрымаў, зусім не такая, як абяцалі першапачаткова.
Прававую ацэнку павінна атрымаць і сітуацыя з непаўналетнім з Бабруйска, які прыняў удзел у несанкцыянаваным мітынгу. На прамую лінію патэлефанавала яго занепакоеная маці.
У адрас кіраўніка вобласці прагучала таксама некалькі падзяк. Жыхар Чавускага раёна падзякаваў за вырашэнне пытання па рэканструкцыі ліній электраперадачы ў пасёлку Ялавое, а жыхарка Бабруйскага раёна выказала ўдзячнасць за дапамогу ў абгароджванні зямельнага ўчастка.
Старшыня аблвыканкама Леанід Заяц, падсумоўваючы вынікі прамой лініі, падкрэсліў, што зваротам грамадзян павінна і надалей надавацца асаблівая ўвага. Без гэтага даверу ад насельніцтва да ўлады не будзе. Усе пытанні, якія паступілі на прамую лінію, узяты на кантроль. Па кожным з іх будуць прынятыя меры і дадзены тлумачэнні заяўнікам.
Усяго з пачатку года на прамыя лініі паступіла 813 зваротаў — на 84 болей, чым за аналагічны перыяд летась. З іх 285 вырашаны станоўча, 170 заяўнікам дадзены тлумачэнні ў пісьмовым выглядзе, яшчэ 83 звароты знаходзяцца на працяглым кантролі і 84 у стадыі разгляду. Рашэнне адмовіць у задавальненні патрабаванняў прынята па 133 заяўніках.
Нэлі ЗІГУЛЯ
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.
