Вы тут

Злачыннае «паляванне». Як абаранiць сябе ад «аматараў чужой маёмасцi»?


Валоданне нейкiмi рэчамi азначае i тое, што на iх могуць паквапiцца староннiя. Няма рознiцы, што гэта — мабiльны тэлефон, сумачка цi бензатрымер. «Спатрэбiцца ўсё, што «дрэнна ляжыць», — гэтае выслоўе выдатна тлумачыць логiку зладзеяў. Таму заўжды трэба захоўваць пiльнасць i не аслабляць увагу. Пра тое, як абаранiць сябе ад «аматараў чужой маёмасцi», распавёў намеснiк начальнiка ўпраўлення прафiлактыкi МУС Сяргей Красуцкi.


Дылема: занесцi або пакiнуць?

— Тэндэнцыя датычна крадзяжоў у нашай краiне станоўчая. Калi летась за першыя восем месяцаў было зафiксавана амаль 20 з паловай тысяч такiх злачынстваў, то сёлета iх колькасць крыху перавысiла 18 тысяч. Але нягледзячы на гэта, праблема па-ранейшаму застаецца вострай, — адзначае Сяргей Красуцкi. — Па-ранейшаму пераважная доля крадзяжоў прыходзiцца на злачынствы, здзейсненыя ў кватэрах i прыватных дамах. Гэта прыкладна кожны трэцi выпадак. Цiкава, але дагэтуль спакушаюцца на мабiльныя тэлефоны. Праўда, яны прыцягваюць увагу зламыснiкаў радзей — калi летась за тыя ж самыя восем месяцаў было 2,5 тысячы такiх крадзяжоў, то цяпер — усяго 1600. А вось што менавiта стала прычынай такога рэзкага падзення лiчбаў — знiжэнне патоку ў кавярнях i начных клубах праз каранавiрус, большая абачлiвасць самiх уладальнiкаў тэлефонаў або сцiханне iнтарэсу з боку злачынцаў — пакуль невядома.
Прычым кватэрныя крадзяжы неабавязкова павiнны нагадваць даволi збiты сюжэт у кiнафiльмах, калi ўначы зламыснiк залазiць у кватэру з лiхтарыкам i абшнарвае яе, пакуль гаспадары спяць або знаходзяцца ў ад'ездзе. Прыкладна ў палове выпадкаў сам пацярпелы запрашае да сябе чалавека, якi пасля вырашае прысвоiць нейкую рэч. Альбо ўвогуле пакiдае кватэру адкрытай. У сваю чаргу, злачынцы нярэдка ходзяць па пад'ездах i тузаюць ручкi дзвярэй, правяраючы iх на трываласць.

Паказальная гiсторыя адбылася ў мiнулым годзе ў сталiцы. Жыхары аднаго з новых жылых комплексаў пачалi скардзiцца, што па паверхах ходзiць дзiўны малады чалавек i асцярожна нацiскае на ручкi дзвярэй. Невядомага не спыняла нават сiстэма вiдэаназiрання. I вось па гарачых слядах яго ў рэшце рэшт затрымалi. Аказалася, што 29-гадовы мiнчанiн, якi ўжо неаднаразова адпраўляўся ў месцы не такiя аддаленыя за крадзяжы, узяўся за старое. А папаўся ён, калi ўвайшоў у адну з кватэр. Пакуль ён вывучаў, што ж такога можна з сабой прыхапiць, гаспадар жылля нечакана прачнуўся, чым i напалохаў зламыснiка. Скрасцi ён не паспеў нiчога.

— У такiх выпадках зладзеi стараюцца знесцi тое, што адначасова з'яўляецца максiмальна лiквiдным i займае мала месца. А таксама — тое, што трапляецца першым пад руку. Гэта грошы, упрыгажэннi, каштоўныя паперы, — заўважае Сяргей Красуцкi. — Радзей гаворка iдзе пра буйную тэхнiку. Але той жа мабiльны тэлефон, пакiнуты каля ўваходу, — добрая прынада. Так знiкалi не раз палiто, сумачкi... Калiсьцi, напрыклад, такiм шляхам кралi дываны цi прадметы мэблi, але часы змянiлiся, i зараз гэтыя рэчы ўжо нiкому не патрэбныя. Дарэчы, дзiцячыя вазкі цi веласiпеды, якiя нярэдка стаяць у тамбурах цi пад лесвiцамi, таксама могуць зацiкавiць зладзеяў. Гэта больш датычыцца старой малапавярховай забудовы, дзе адсутнiчаюць лiфты. Цягнуць дзiцячы вазок па лесвiцы здолее не кожная мацi. Ды i месца ў кватэры той займае. Але ўсё-такi падобныя рэчы лепш забiраць дадому. Цалейшыя будуць.

I лiтаральна на днях стала вядома пра тое, што 25-гадовы жыхар Мiнска за тыдзень скраў дзесяць ровараў, якiя стаялi ў тамбурах жылых дамоў i былi прышпiлены на велазамок. Ён «арудаваў» на тэрыторыi Фрунзенскага i Першамайскага раёнаў Мiнска i папаўся на спробе прысабечыць чарговы веласiпед. Крадзеную маёмасць малады чалавек рэалiзоўваў на адным з рынкаў сталiцы за паўцаны, а атрыманыя грошы выдаткоўваў на ўласныя патрэбы.
На нейкiм этапе мы спрабавалi прымаць пэўныя меры. У некаторых рэгiёнах прапаноўвалi маркiраваць веласiпеды i стваралi базы даных, якiя актуальныя i дагэтуль. Маркiроўка не сцiраецца, не змываецца. I нават калi веласiпед выкрадуць, знайсцi яго будзе лягчэй. Але трэба разумець, што менавiта сам уладальнiк павiнен клапацiцца ў першую чаргу пра тое, каб веласiпед не заставаўся без нагляду i велазамка.

Як скралi 50 тысяч долараў за некалькi хвiлiн

Даўно сышлi ў гiсторыю часы, калi гаспадар аўтамабiля, прыпаркаваўшы яго на ноч у двары, рызыкаваў убачыць ранкам свайго «жалезнага каня» без колаў i на цаглiнах. Але аўтамабiлi па-ранейшаму цiкавяць аматараў чужога дабра. Праўда, цяпер у iншым сэнсе — не столькi сама машына, колькi тое, што ў ёй ляжыць. Аўто часта выкарыстоўваецца ў якасцi своеасаблiвай «базы захоўвання» — ну навошта цягнуць з яго дадому тое, што заўтра зноў спатрэбiцца? А часам неабачлiвасць можа каштаваць вельмi дорага — прычым лiтаральна.

У лютым гэтага года ў Стаўбцоўскае РУУС звярнуўся 40-гадовы мясцовы жыхар. Ён расказаў, што ўначы з яго аўтамабiля BMW X6 былi скрадзены вялiкiя грошы — каля 50 тысяч долараў, што ляжалi ў пакеце. Прычым у салоне знаходзiлася яшчэ i сумка, дзе было каля 20 тысяч долараў. Апошняя ўвагу злачынца не прыцягнула.

Падзеi тады разгортвалiся так. Аўтамабiль быў абсталяваны сiстэмай бесключавога доступу. Гэта значыць, што адкрыць i закрыць цэнтральны замок можна было, наблiзiўшы цi аддалiўшы ключ. I вось, пэўна, прылада не спрацавала, i машына засталася незачыненая. А гэтым i скарыстаўся злачынца, якi тузануў за ручку — i дзверы адчынiлiся. Пакет з валютай ён забраў i не шукаў больш нiчога.

Аператыўнiкi затрымалi злодзея праз суткi. У аўтамабiлi 40-гадовага жыхара Фанiпаля былi знойдзены скрадзеныя грошы, пiсталет, балаклава i металiчная палка. Супраць яго была заведзена крымiнальная справа.

— Крадзяжы з аўтамабiляў мы падзяляем на дзве групы. Першая — гэта калi спрабуюць скрасцi дэталi. Аднак часы дэфiцыту даўно скончылiся, i таму такiя крадзяжы становяцца рэдкiя. Хоць пры гэтым ноўтбукi, барсеткi i iншыя дарагiя рэчы трэба забiраць з сабой. Iх можна выкрасцi з аўтамабiля за некалькi хвiлiн. Таксама будзьце вельмi ўважлiвыя, калi ўзнiкаюць сiтуацыi, у якiх вам трэба выходзiць з аўтамабiля, — раiць Сяргей Красуцкi.

А вось кiшэнныя крадзяжы, што калiсьцi былi бядой грамадскага транспарту i iншых людных месцаў, сышлi ў зону статыстычнай пагрэшнасцi. Сёлета iх зафiксавана ўсяго 230, а ў параўнаннi са студзенем—жнiўнем мiнулага года iх стала менш ажно напалову.

Але памятайце: калi вы дзесьцi «засвяцiлi» буйную суму грошай у кашальку — будзьце гатовыя да таго, што яго ў вас паспрабуюць скрасцi. Самае элементарнае — не трэба класцi кашалёк i мабiльны тэлефон у заднюю кiшэню штаноў. Хоць гэта стыльна, але небяспечна. У натоўпе цi ў грамадскiм транспарце непрыкметна выцягнуць адтуль штосьцi вельмi лёгка.

Забiрайце садовы iнвентар з дач

Зусiм хутка дзецi будуць забiраць сваiх састарэлых бацькоў з вёскi ў горад. Ды i дачны сезон заканчваецца. Што ж трэба зрабiць, каб вясной не аказалася, што каштоўныя рэчы скрадзены? Зноў жа, гэта паўплывае на раскрыццё злачынства, паколькi пройдзе зашмат часу…

— Так, усплёск зваротаў аб прапажы нейкiх хатнiх рэчаў, садовай тэхнiкi, iнструменту назiраецца ўвесну. Таму калi паездкi на дачу заканчваюцца — усё забiрайце з сабой. Калi ж такой магчымасцi няма, то трэба максiмальна абцяжарыць доступ злачынцам i ўсё аднесцi ў памяшканне, дзе няма вокнаў i куды максiмальна складана трапiць. Падобныя крадзяжы звычайна сiтуацыйныя, — падкрэслiвае Сяргей Красуцкi. — Самае банальнае — камусьцi не хапае на выпiўку, убачылi той жа бензатрымер праз акно, разбiлi шкло, трымер прадалi. I, натуральна, калi ёсць магчымасць, варта паставiць сiгналiзацыю.
Трэба памятаць, што людзi сталага веку ў сельскай мясцовасцi заўжды ў групе рызыкi. Нярэдка iх пенсii — гэта адзiная крынiца стабiльнага даходу. Апошнiя прыцягваюць увагу не вельмi добрых людзей. У большасцi выпадкаў да iх прыходзяць махляры, якiя нiбы хочуць прапанаваць дапамогу, нешта купiць цi прадаць, але ў аснове iх дзеянняў ляжыць адна задача — адцягнуць увагу, каб паглядзець, дзе ляжаць зберажэннi. А гэтыя грошы маглi збiрацца не адзiн год, чалавек мог адмаўляць сабе ва ўсiм. Таму не адчыняйце незнаёмым дзверы i не пускайце iх да сябе.

Валяр'ян ШКЛЕННІК

 

Выбар рэдакцыі

Культура

Франтавiк Мiхаiл Чэпiк эксперыментаваў з аэражывапiсам

Франтавiк Мiхаiл Чэпiк эксперыментаваў з аэражывапiсам

Як хлапчук з беларускай глыбiнкi здолеў паступiць у Маскоўскае мастацкае вучылiшча iмя Калiнiна?

Грамадства

Экс вiцэ-прэм'ер Уладзiмiр Дражын: Галоўнае — не разбурыць, а захаваць i працягнуць работу

Экс вiцэ-прэм'ер Уладзiмiр Дражын: Галоўнае — не разбурыць, а захаваць i працягнуць работу

Аб альтэрнатыве клайпедскаму порту, рэканструкцыi Нясвiжскага палаца i роднай мове падчас сямейных сустрэч.

Грамадства

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Заразіцца прафесіяналізмам. Чаму трапіць на неканферэнцыю настаўнікаў EdCamp лічыцца вялікай удачай?

Чацвёртая педагагічная неканферэнцыя прайшла ў мінулыя выхадныя з нязменным аншлагам і сабрала больш як тры сотні педагогаў з розных куткоў нашай краіны.