Вы тут

Пад знакам АГРА


Міжнародны форум “Белагра—2020” у чарговы раз адбудзецца ў Мінску. А ўлічваючы складаную эпідэміялагічную абстаноўку ў свеце некаторыя з запланаваных мерапрыемстваў форуму пройдуць у рэжыме відэаканферэнцый, анлайн­-прэзентацый.


Фота belarus-tractor.com

Да форуму, што мае ўжо слаўныя традыцыі, ёсць вялікі інтарэс у вучоных-аграрыяў, спецыялістаў і кіраўнікоў прадпрыемстваў, што выпускаюць і пастаўляюць для сельскай гаспадаркі машыны й абсталяванне. Міжнародная выстава разгорнецца ў Футбольным манежы (што па праспекце Пераможцаў, 22/2), пройдзе з 29 верасня па 4 кастрычніка. З кожным годам спіс яе ўдзельнікаў папаўняецца прадстаўнікамі новых краін. Летась, напрыклад, аграрная выстава сабрала ў Мінску 560 кампаній з 29 краін. Экспазіцыі прэзентавалі вытворцы з Беларусі, Аўстрыі, Балгарыі, Вялікабрытаніі, Венгрыі ды іншых еўрапейскіх краін. Былі выстаўлены сельгасмашыны й прадукцыя вытворцаў з Германіі, Даніі, Ізраіля, Індыі, Італіі, Канады, Кітая ды іншых краін. І на сёлетняй выставе таксама чакаюць нямала ўдзельнікаў з замежжа.

Новаўвядзеннем “Белагра—2020” стане 7-ы міжнародны спецыялізаваны салон “Біягаз—2020”. Наведнікі даведаюцца, як адладжаны цяпер перадавыя тэхналогіі збору, транспарціроўкі, захоўвання сыравіны й выпрацоўкі біягазу, як ідзе бражэнне біямасы ў ёмістасцях. І нават тое, як навучыліся выкарыстоўваць адходы вытворчасці ды пра розныя механізмы, прыборы, што прымяняюцца ў працэсах.

Спецыяльную экспазіцыю дасягненняў беларускіх аграрыяў штогод арганізуе Міністэрства сельскай гаспадаркі й харчавання. Апошнія распрацоўкі прадэманструюць навукова-практычныя цэнтры Нацыянальнай акадэміі навук па механізацыі сельскай гаспадаркі, земляробстве, бульбаводстве, агародніцтве й харчаванні. А НПЦ НАН Беларусі па жывёлагадоўлі ды “Белплемжываб’яднанне” ладзяць спецыяльную экспазіцыю дасягненняў айчыннай жывёлагадоўлі й птушкаводства.

І яшчэ цікавая навіна: Мінскі трактарны завод выставіць на пляцоўцы ля Футбольнага манежа больш за 15 мадэляў трактароў — і гэта будуць апошнія распрацоўкі прадпрыемства. Сярод іх і многім знаёмы трактар BELARUS-82.3 у абноўленым выглядзе: з новым дызайнам, вялікай колькасцю ўдасканаленняў у тэхнічным плане. Як вядома, калёсныя трактары “Беларусь” такога класа могуць выкарыстоўвацца не толькі для падрыхтоўкі глебы пад пасевы, але і ў лясной, камунальнай гаспадарках, на будаўніцтве і ў прамысловасці. Беларускія трактары да таго ж прыстасаваныя для працы ў любых кліматычных умовах. Да іх можна дастасоўваць розныя прылады, механізмы, у тым ліку й замежных вытворцаў.

Наймагутны трактар у лінейцы МТЗ BELARUS-4522, які прызначаны для выканання энергаёмістых сельгасработ у цягавым і цягава-прывадным рэжымах, таксама набыў новы дызайн. Яго выставяць на пляцоўцы інавацыйнай прадукцыі Мінпрама. І перад МТЗ будуць выстаўленыя не толькі трактары, але й навясное абсталяванне вытворчасці беларускіх прадпрыемстваў.

У часе выставы запланавана вялікая колькасць семінараў, сустрэч з вучонымі, распрацоўшчыкамі тэхнікі. Удзел у ёй дапаможа знайсці новых партнёраў, даведацца пра новыя тэндэнцыі ў развіцці аграрнай галіны, прадставіць сваю прадукцыю, абмяняцца досведам.

Ганна Лагун

Выбар рэдакцыі

Грамадства

Эканомім на касметыцы. Як мінімізаваць выдаткі на прыгажосць і маладосць

Эканомім на касметыцы. Як мінімізаваць выдаткі на прыгажосць і маладосць

Како Шанэль сцвярджала, што чым горшыя справы ў жанчыны, тым лепш яна павінна выглядаць.

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.