Вы тут

Што змянілася ў Беларусі 1 кастрычніка?


У традыцыйным штомесячным аглядзе «Звязды» сабралі самыя важныя і цікавыя змены, якія чакаюць беларусаў 1 кастрычніка.


Пачынаецца вакцынацыя ад каранавіруса

У Беларусі 1 кастрычніка пачнецца вакцынацыя добраахвотнікаў ад COVID-19 расійскай вакцынай «Спадарожнік V», першая партыя якой ужо пастаўлена ў нашу краіну.

Расійскі бок таксама прафінансуе клінічнае даследаванне сваёй вакцыны з удзелам 100 беларусаў.

Беларусь стала першай краінай, у якой адбудзецца клінічнае даследаванне «Спадарожніка V» пасля яго рэгістрацыі ў Расіі.

Будуць па-іншаму кампенсаваць камандзіровачныя выдаткі на жыллё

Пастанова ўрада № 550 ад 22 верасня зафіксавала новаўвядзенні па камандзіровачных выдатках. Яны пачынаюць дзейнічаць праз 10 дзён пасля афіцыйнага апублікавання.

Індывідуальныя прадпрымальнікі і арганізацыі (акрамя бюджэтных), якія адпраўляюць сваіх работнікаў у камандзіроўкі па краіне, самастойна прымаюць рашэнне аб кампенсацыі выдаткаў па найме жылога памяшкання. Зрабіць гэта трэба як на падставе пацвярджаючых дакументаў, так і без іх прадстаўлення. Але калі без дакументаў, то ёсць абмежаванні.

Пры адсутнасці пацвярджаючых дакументаў кампенсуюць ад 5% да 20% ад выдаткаванай на пражыванне сумы.

Бюджэтныя арганізацыі выдаткі на арэнду жылля пры камандзiроўках па краіне павінны будуць кампенсаваць на падставе пацвярджаючых дакументаў. Пры іх адсутнасці — у памеры 5%.

Пераглядаецца база не занятых у эканоміцы

У Беларусі плануецца абнавіць базу працаздольных грамадзян, якія не заняты ў эканоміцы. Нагадаем, гэтым асобам з 1 мая 2021 года прыйдзецца аплачваць цяпло і газ у сваіх дамах па поўных тарыфах.

База абнаўляецца штоквартальна — апошні раз у 2020 годзе яе перагледзяць у лістападзе.

Каб не патрапіць у спісы, грамадзяніну неабходна працаўладкавацца і атрымаць дакументы, якія пацвярджаюць яго занятасць.

Працягваецца рэгуляванне цэн на грэчку

У Беларусі з 1 кастрычніка працягнецца дзяржаўнае рэгуляванне цэн на грэцкія крупы. Гранічныя надбаўкі павінны выконваць аптавікі і арганізацыі, якія гандлююць у розніцу.

На фоне распаўсюджвання каранавіруса ў Беларусі гандлёвыя сеткі адзначалі павышаны попыт на грэцкія крупы. Рэгуляванне цэн на гэты прадукт працягнецца да 31 снежня 2020 года.

Некаторыя маркі цыгарэт падаражэюць

Традыцыйна з пачатку месяца вырастуць у цане тытунёвыя вырабы. Гэтым разам рост складзе 5-10 капеек.

Таксама ў продажы з’явяцца новыя маркі цыгарэт. У гродзенскай тытунёвай фабрыкі «Нёман» гэта Pall Mall Nano Amber, а таксама Rothmans Click Purple і Rothmans Click Volt. ТАА «Тытунь-Інвест» пачне выпускаць цыгарэты Monte Carlo Evo Green Impulse.

Аднаўляецца аўтобусныя зносіны з Рыгай

З 1 кастрычніка «Мінсктранс» аднаўляе штодзённыя аўтобусныя рэйсы па маршруце Мінск — Рыга. Аўтобусы будуць ездзіць праз Вільнюс.

Умовы ўезду на тэрыторыю Латвіі тыя ж, што і ў Літву.

Новыя правілы бяспекі ўводзяцца ў аквапарках

З 1 кастрычніка пачнуць дзейнічаць новыя правілы прамысловай бяспекі атракцыёнаў.

У гэтых правілах, якія распрацоўвае МНС, упершыню дэталёва агавораны ўмовы эксплуатацыі водных спускаў, а таксама патрабаванні да іх уладальнікаў і супрацоўнікаў.

Такія спускі ўстаноўлены ў тым ліку ў аквапарках.

У прыватнасці, правілы патрабуюць, каб паверхні апор і слізгацення на водных спусках былі зробленыя з бяспечных матэрыялаў, якія выключаюць расслаенне або дэфармацыю гэтых паверхняў.

Акрамя таго, дзіцячыя водныя спускі павінны размяшчацца так, каб дзеці не маглі пераходзіць па вадзе з сваёй мелкаводнай зоны ў зону, дзе забаўляюцца дарослыя.

Асобныя патрабаванні датычацца стэндаў з інфармацыяй аб водных спусках. Тут абавязкова павінны быць звесткі аб ступені складанасці спуску, глыбіні вады ў зоне фінішу, дазволеных палажэннях для спуску, наяўнасці спецэфектаў, супрацьпаказанні да спуску.

Мяняецца спосаб падачы дакументаў на грамадзянства Літвы ў Беларусі

З 1 кастрычніка 2020 года Пасольствам Літоўскай Рэспублікі ў Рэспубліцы Беларусь не будуць прымацца заявы і дакументы па пытаннях грамадзянства Літоўскай Рэспублікі. Цяпер заявы і копіі дакументаў асобы будуць падаваць у электронным выглядзе праз інфармацыйную сістэму міграцыі Літвы MIGRIS.

Загадзя рэгістравацца на візіт у Пасольства Літоўскай Рэспублікі ў РБ для прад’яўлення арыгіналаў дакументаў будзе патрэбна толькі ў выпадку, калі асоба атрымае станоўчы адказ праз сістэму MIGRIS.

Пачынаецца сезон палявання на капытных

Сезон ружэйнай загоннага палявання на капытных адкрываецца 1 кастрычніка. З пачатку новага месяца паляўнічым дазволена здабываць лася, дзіка, высакароднага і плямістага аленя, лань, муфлона.

Паляваць на гэтых жывёл можна на працягу сутак, у тым ліку з сабакамі і арбалетамі. Але трэба памятаць пра абмежаванні.

Сезон палявання на капытных у Беларусі працягнецца да 31 снежня 2020 года.

Фота pixabay.com

Выбар рэдакцыі

Грамадства

Якую небяспеку нясе экспрэс-дыета?

Якую небяспеку нясе экспрэс-дыета?

 Варта разумець, што дыеты такога тыпу — радыкальны метад, які мае шмат мінусаў.

Культура

Рэстаўрацыя па-беларуску: ратаваць — неабходна

Рэстаўрацыя па-беларуску: ратаваць — неабходна

Гістарычная памяць — тое, што вызначае будучыню... Здаецца, банальная ісціна, якую не трэба нікому даказваць.