Вы тут

На сцэне Вялікага тэатра Беларусі паказалі балет «Шчаўкунок»


Наўрад ці Эрнст Тэадор Амадэй Гофман, калі пісаў павучальную калядную казку для маленькіх дзяцей свайго сябра, Фрыца і Мары, мог уявіць, што прыдуманая ім гісторыя зробіцца шэдэўрам на ўсе часы. Мяркуйце самі: Пётр Чайкоўскі напісаў музыку да балета «Шчаўкунок» паводле лібрэта Марыуса Пеціпа, а той абапіраўся на пераказ гісторыі Гофмана, зроблены Аляксандрам Дзюма-старэйшым. А колькі за мінулыя стагоддзі да згаданых творцаў далучылася вялікіх музыкаў, харэографаў, мастакоў, артыстаў, пісьменнікаў!


13 кастрычніка 2020 года «Шчаўкунок» з'явіўся на сцэне Вялікага тэатра Беларусі. У гэтым выпадку гаворка ідзе і пра адраджэнне, і пра абнаўленне — таму што Маэстра Валянцін Елізар'еў зрабіў новую рэдакцыю ўласнай пастаноўкі. Сем гадоў у Вялікім не было «Шчаўкунка» — а гэта ж неабходны атрыбут навагодніх свят! Апошні спектакль адбыўся 16 студзеня 2013 года. А першы ў пастаноўцы Валянціна Елізар'ева прэзентаваўся 15 красавіка 1982 года. Прычым харэограф прызнаваўся, што пабачыў сваю задуму... у сне:

— Пасля таго як сцэнограф паказаў мне макет спектакля, у тую ж ноч мне прысніўся ўвесь цалкам першы акт. Я прачнуўся, устаў з ложка і, на шчасце, паспеў яго запісаць.

Дарэчы, калі Валянцін Елізар'еў навучаўся ў Акадэміі рускага балета ў Ленінградзе, выконваў ролю Шчаўкунка-лялькі, так што спектакль гэты яму асабліва дарагі. Да таго ж, Маэстра лічыць, што няма партытуры больш складанай для харэографа, чым партытура «Шчаўкунка» Пятра Чайкоўскага — хоць ёсць тыя, хто ўспрымае яго як музыку для дзяцей.

Што ж, кожны шэдэўр мае не адну глыбіню. І як далёка вы зойдзеце ў спазнаванні — залежыць не толькі ад аўтара, але і ад вашых магчымасцяў.

Над новай рэдакцыяй спектакля працавалі амаль тыя ж творцы, толькі замест дырыжора Аляксандра Анісімава — Вячаслаў Чарнуха-Воліч. Стварыў фантастычнае відовішча той жа мастак Яўген Лысік. Кажуць, што калісьці ён зрабіў макет спектакля з крышталю, які, на жаль, за столькі гадоў быў страчаны. Але крышталёвае, святочнае, загадкавае ззянне спектакля засталося.

Атрымаць партыі ў такім вядомым творы — і радасць, і вялікая адказнасць. Шмат хто з зорак беларускага балета танцаваў у «Шчаўкунку», застаўшыся са сваім выкананнем у гісторыі. У прэм'ерным спектаклі 2020 года партыю Машы выконвала Ірына Яромкіна, Шчаўкунка-Прынца — Алег Яромкін, у ролі Драсельмеера, ён жа Мышыны кароль і Майстар лялек — Юрый Кавалёў. Ролю Шчаўкунка-лялькі, якая ў юнацтве дасталася Валянціну Елізар'еву, выканала Карына Малахоўская. На кожную партыю сёння — чатыры саставы выканаўцаў, бо ў трупе шмат маладых, і ім трэба даць магчымасць выказвання. Цікава і тое, што з артыстамі займалася народная артыстка Людміла Бржазоўская — першая выканаўца ролі Машы.

Пасля пераможнай бойкі са злавесным Мышыным каралём Маша і Шчаўкунок лятуць на цацачных конях на фоне фантастычнай каляднай ёлкі, уверх, да святла... Спраўджванне — гэта мары ці проста снабачанне пакрыўджанай дзяўчынкі? Кожны глядач адкажа па-свойму. Насамрэч у творы схавана шмат сумных, вельмі сур'ёзных падтэкстаў. Успомніць хоць бы хор сняжынак, які ўвасабляе галасы памерлых дзетак-анёлаў. Але і юныя гледачы, і дарослыя выходзяць з залы з абяцаннем шчасця ў душы і адчуваннем свята. А значыць, усё ўдалося.

Людміла ІВАНОВА

Фота Яна ХВЕДЧЫНА

Загаловак у газеце: Прыснёны «Шчаўкунок» набыў новыя фарбы

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.