У Інстытуце нацыянальнай бяспекі ўшанавалі памяць легендарных савецкіх разведчыкаў, ураджэнцаў Беларусі Аляксея Бацяна і Юрыя Драздова. Мемарыяльную дошку ўрачыста адкрылі старшыня Камітэта дзяржаўнай бяспекі Беларусі Іван Тэртэль і дырэктар Службы знешняй разведкі Расійскай Федэрацыі Сяргей Нарышкін.
«Сёння ў нас адметная падзея — адкрыццё мемарыяльнай дошкі ў гонар славутых ураджэнцаў беларускай зямлі. Аляксей Бацян і Юрый Драздоў — два чалавекі няпростага лёсу, якія прайшлі Вялікую Айчынную вайну, вырашылі шэраг важных задач у інтарэсах Айчыны. Яны паказвалі прыклад патрыятызму і прафесіяналізму. Важна, што мемарыяльная дошка ў іх гонар адкрываецца ў сценах Інстытута нацыянальнай бяспекі, дзе рыхтуюцца кадры для Камітэта дзяржаўнай бяспекі. Упэўнены, што гэта знамянальная дата застанецца ў гісторыі інстытута і будзе служыць сур'ёзным выхаваўчым аспектам у падрыхтоўцы маладых кадраў», — адзначыў Іван Тэртэль.
«Для мяне і маіх калег вялікі гонар удзельнічаць у адкрыцці памятнай дошкі, прысвечанай легендарным разведчыкам. У год 75-годдзя Перамогі ў Вялікай Айчыннай вайне мы аддаём даніну павагі людзям велізарнай волі і мужнасці, якія прысвяцілі сваё жыццё абароне бяспекі Радзімы. Аляксей Бацян прайшоў вайну ад першага да апошняга дня. Яго жыццё было напоўнена жаданнем дапамагчы людзям, ён сышоў з жыцця зусім нядаўна. Аляксей Мікалаевіч марыў адзначыць 75-годдзе Вялікай Перамогі і 100-годдзе расійскай знешняй разведкі, але, на жаль, яму гэта не ўдалося. Юрый Драздоў узначальваў нелегальную разведку Савецкага Саюза, ён стварыў аператыўна-баявое падраздзяленне «Вымпел». Прафесійныя лёсы Аляксея Бацяна і Юрыя Драздова — падручнікі, па якіх павінны вучыцца маладыя пакаленні, што вырашылі прысвяціць жыццё служэнню Радзіме», — падзяліўся Сяргей Нарышкін.
Значнасць прыкладу Аляксея Бацяна і Юрыя Драздова ў патрыятычным і прафесійным развіцці будучых разведчыкаў адзначыў і Павел Мажэйка, старшыня Беларускай грамадскай арганізацыі ветэранаў КДБ «Гонар». Ён падзякаваў Івану Тэртэлю і Сяргею Нарышкіну за праведзенае мерапрыемства.
Валерыя СЦЯЦКО
Фота Яна ХВЕДЧЫНА
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
