Андрэй i Надзея Воўк выхоўваюць пяцярых дзяцей. Старэйшаму Яраславу — 11 гадоў, малодшай Дар'i — толькi паўтара года. Усе значныя падзеi тут прывыклi сустракаць разам. Вось i на ўрачыстае мерапрыемства яны прыйшлi амаль у поўным складзе. Свята для шматдзетнай сям'i зладзiлi ў адмiнiстрацыi Кастрычнiцкага раёна Гродна.
Галоўнай гераiняй дня стала Надзея Воўк. Яна была ўдастоена высокай дзяржаўнай узнагароды — ордэна Мацi. Вядома, побач з ёю — любiмая сям'я. Па словах Надзеi, падтрымка мужа i дзяцей у такi момант вельмi неабходна.
Дарэчы, як прызналiся бацькi, устаноўкi на шматдзетную сям'ю ў iх не было. Калi пажанiлiся, хацелi мець хлопчыка i дзяўчынку. Нават iмёны для iх вызначылi — Яраслаў i Дар'я. Так i адбылося, але памiж iмi нарадзiлiся яшчэ Святаслаў, Кiрыл i Марыя.
— Вялiкая сям'я больш згуртаваная i дзецi ў ёй растуць больш адказныя, чым там, дзе адно-два дзiцяцi, — лiчыць Андрэй. — У нашых дзетак ёсць свае абавязкi. Напрыклад, старэйшы сын выгульвае сабаку, другi сын выносiць смецце. Калi нешта пайшло не так, мы не караем дзяцей, у нас няма такога паняцця, як рэмень.
Дзецям тут iмкнуцца знайсцi занятак па здольнасцях i iнтарэсах. Напрыклад, старэйшы Яраслаў усур'ёз займаецца спортам — паказвае добрыя вынiкi ў лёгкай атлетыцы; першакласнiк Святаслаў спрабуе свае сiлы ў футболе; малодшы Кiрыл праяўляе творчыя здольнасцi. Калi падрастуць Марыя i Дар'я, бацькi мяркуюць развiваць i iх таленты. Тут прынята раздзяляць i радасцi, i цяжкасцi памiж усiмi, бо вялiкая сям'я — гэта штодзённая праца. Разам з тым, кажа Надзея, гэта яшчэ i крынiца энергii, радасцi, пазiтыву.
Добры настрой дае i сумесны адпачынак. Звычайна бацькi разам з дзецьмi выязджаюць на прыроду, гатуюць шашлыкi. Часта наведваюць аквапарк, гуляюць у гарадскiм парку. Не застаюцца ўбаку i бабулi — вывозяць дзяцей у тэатр, цырк, на iншыя цiкавыя iмпрэзы. А яшчэ сям'я Воўк распачала сваю традыцыю — сустракаць Новы год у розных сталiцах свету. Яны ўжо пабывалi ў Мiнску i Вiльнюсе. Меркавалi, што сёлета паедуць у Прагу альбо Варшаву, але з-за каранцiну паездку давялося адкласцi.
Каб у сям'i быў дастатак, Андрэй шмат працуе. Ён вадзiцель i галоўны здабытчык. Сям'я атрымала трохпакаёвую кватэру ў новым мiкрараёне Альшанка, але зараз будуе яшчэ i дом: шматдзетным сям'ям участак выдзелiлi ў першую чаргу. Для пабудовы дома скарысталiся сямейным капiталам, але ўкладваюцца i ўласныя сродкi.
— Дом будзе мансарднага тыпу з выхадам на тэрасу, зробiм i гульнявую пляцоўку, каб былi i турнiк, i лесвiца, i арэлi, i горкi, усё, што патрэбна для фiзiчнага развiцця, — удакладняе Андрэй.
Тое, што сям'я вельмi дружная i згуртаваная, можна было вызначыць i падчас урачыстасцi. I муж, i дзецi не адыходзiлi ад Надзеi, у якой на сукенцы блiшчаў ордэн Мацi. Аб тым, што ў сям'i яна галоўная, казаў i старэйшы сын Яраслаў: «Бо мама заўсёды дома i дапамагае мне i малодшым дзецям».
Падчас цырымонii старшыня Пастаяннай камiсii Савета Рэспублiкi па адукацыi, навуцы, культуры i сацыяльным развiццi Вiктар Лiсковiч адзначыў: важна зрабiць усё магчымае, каб матэрыяльны дастатак у дадзенай катэгорыi людзей не пагаршаўся. У падтрымцы шматдзетных сем'яў значную ролю адыгрывае сямейны капiтал. Iм скарысталiся амаль 90 тысяч сем'яў. У асноўным выдаткi iдуць на паляпшэнне жыллёвых умоў. Па словах сенатара, дзеянне мацярынскага капiталу працягнута яшчэ на пяць гадоў.
Вiктар Лiсковiч таксама звярнуў увагу на змяненнi ў страхавым стажы для шматдзетных мацi. З 1 студзеня 2021 года пры нараджэннi чацвёртага дзiцяцi страхавы стаж, неабходны для фармiравання працоўнай пенсii, зменшыцца з 17,5 года да дзесяцi. Для шматдзетных мацi ў працоўны стаж будзе залiчвацца 12 гадоў замест дзесяцi. Можна будзе зрабiць пералiк стажу для тых, хто ўжо выйшаў на пенсiю.
Падчас урачыстасцi прагучала прапанова разгледзець у парламенце стварэнне ў краiне i такога свята, як Дзень бацькi. На думку сенатара, гэта iдэя добрая, але не сённяшняга дня.
— Нам не столькi варта рабiць Дзень бацькi, як больш намаганняў прыкладаць для ўмацавання статуса сям'i. Не дзялiць на бацьку i мацi, а аб'ядноўваць iх сямейнымi традыцыямi. Вось i ордэн Мацi даецца не толькi за нараджэнне дзяцей, але i за тое, як гэтыя дзецi выхоўваюцца. А гэта ўжо залежыць ад абодвух бацькоў, — падкрэслiў парламентарый.
Маргарыта УШКЕВIЧ, фота аўтара
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
