Вы тут

Што будзем насiць, калi выпадзе снег?


Зiма 2020/2021 працягвае настальгiраваць па 70-х гадах мiнулага стагоддзя. Вядучыя дызайнерскiя дамы прапануюць насiць джынсы-клёш, спаднiцы з какеткай, дублёнкi i грубыя чаравiкi. Таксама мадэльераў, вiдавочна, натхняюць стылiстыка фiльма «Матрыца» i творчая перапрацоўка стыляў «готыка» i «панк».


А што канкрэтна?

З улiкам вышэйсказанага цалкам чакана, што гэтай зiмой нам прапануюць апранацца ў чорную скуру. Дакладней, у экаскуру, бо натуральнае скураное адзенне — гэта дорага i не «эка-фрэндлi». Ухваляюцца курткi, спаднiцы, сукенкi, штаны i нават кашулi з экаскуры. Уласна кажучы, колеры скуранога адзення могуць быць любыя, але найбольш актуальны — менавiта чорны. Калi гэта зусiм не спалучаецца з вашым бачаннем прыгажосцi, дадайце ў гардэроб хоць бы адну такую рэч. Прасцей за ўсё — спаднiцу або штаны: з iмi можна скласцi вобразы i для офiса, i для выхаду ў свет.

Экаскуру мадэльеры спалучаюць i з iншымi матэрыяламi: напрыклад, актуальныя будуць джэмперы i спаднiцы са скуранымi ўстаўкамi. Але гэта, як той казаў, на аматара.

Калi вы плануеце правесцi гэтую зiму не вылазячы з-пад коўдры, то вам пашанцавала: вы будзеце самыя стыльныя. У сезоне 2020/2021 на грэбнi моднай хвалi будуць дутыя пухавiкi-аверсайз без лiшняга дэкору, падобныя на коўдры. А таксама сцёганыя рэчы — спаднiцы, сукенкi i камiзэлькi. Падыдуць яны далёка не ўсiм, бо дадаюць аб'ём, так што прымярайце i ацэньвайце сябе ў люстэрку крытычна.

«Бабулiна» мода будзе актуальная як нiколi — мяккiя i ўтульныя махеравыя свiтары стануць трэндам гэтай зiмы. Прычым любыя: з круглым або V-падобным выразам, з высокай гарлавiнай а-ля вадалазка. Такi свiтар у гэтым сезоне будзе актуальна надзяваць на кашулю.

Зiмовую шэрасць мадэльеры не першы сезон спрабуюць «размаляваць» яркiмi фарбамi (у свежых зiмовых калекцыях можна сустрэць ярка-жоўты, фiялетавы, лiловы, ружовы, колер марской хвалi, зялёны, аранжавы i колер перцу чылi). На нашых прасторах, аднак, гэты трэнд не прыжываецца. Ну што ж, тады для вас — «новы чорны» гэтай зiмы: карычневы ва ўсiх адценнях. Яшчэ актуальныя цёмна-бардовы i крэмавы.

Звяры ў гэтым сезоне зноў у бяспецы: штучнае футра па-ранейшаму ў модзе, натуральнае — i ў гэтым сезоне маветон. Гэта могуць быць футэркi або вопратка са штучнага футра, футровыя курткi i нават абутак з футровым аздабленнем. Галоўнае правiла: сучаснае экафутра не павiнна быць «родам» з вашага дзяцiнства цi iмiтаваць дваровага ката пасля дажджу. У iдэале яно наогул не павiнна iмiтаваць нiякага звера, нават пясца або шанхайскага барса. У гэтым сезоне выбiраем яркiя колеры i футэркi з прынтамi — геаметрычным i нават кветкавым. Зрэшты, прынты «зебра» i «леапард», што перавандравалi ў гэтую зiму з мiнулай, таксама зробяць футравую рэч яшчэ актуальнай.

У модзе рэчы з вялiкiмi плячыма, а таксама прасторныя рукавы («лiхтарыкi» i нават «лiхтары»). З гэтым трэндам трэба абыходзiцца асцярожна, бо такiя рукавы дадаюць аб'ём у верхняй частцы цела. Можа быць, каб зрабiць вобраз актуальным, дастаткова будзе акцэнтаваць плечы паланцiнам або шалiкам. З аб'ёмнымi плячыма ў новых калекцыях можна знайсцi джэмперы i пiнжакi ў мужчынскiм стылi. Апошнiя вось ужо некалькi сезонаў не выходзяць з моды. У трэндзе застаюцца мадэлi «аверсайз» i сiлуэты, звужаныя ў талii. Лайфхак: зрабiць прамы пiнжак прыталеным дапаможа ўмерана шырокi рэмень. Рамянi цяпер надзяваюць на пiнжакi, i за гэта нiхто не кiне ў вас камень.

Устойлiвае развiццё

Што датычыцца абутку, у надыходзячым зiмовым сезоне галоўны элемент дэкору абутку, прадэманстраваны на подыумах, — ланцугi. Напрыклад, боты ад Michael Kors, дэкарыраваныя буйным вертыкальна размешчаным ланцугом, афарбаваным у залаты колер. Праўда, трэнд на ланцугi ў якасцi ўпрыгожвання абутку, верагодна, дойдзе да нас пазней — можа быць, у канцы зiмы. Як i нечаканы прынт «зебра» у якасцi ўпрыгожвання чаравiкоў i ботаў. Гэтай зiмой (як i мiнулай) у трэндзе абутак з анiмалiстычнымi прынтамi, але на подыумах «зебра» пацяснiла традыцыйных «змяю» i «кракадзiла». Яшчэ адзiн трэнд — абутак у клетку. Да калготак у клетку мы ўжо прывыклi, многiя моднiцы нават паспрабавалi ўпiсаць iх у свае вобразы. А вось моду на батыльёны, боцiкi i чаравiкi ў клетку нам яшчэ трэба прыняць. Ну або так i не прыняць.

Калi спусцiцца з подыумаў на грэшную зямлю, то найбольш актуальныя будуць боты да калена на абцасе з шырокiм прысабраным галянiшчам. Мабыць, гэта самы жаноцкi варыянт з тых, што прапануе модная зiма. Па-ранейшаму актуальныя батфорты — на плоскiм хаду цi на невялiкай танкетцы. Наогул, у гэтым халодным сезоне, як i ў мiнулым, заканадаўцы свету моды рэкамендуюць адмовiцца ад высокiх абцасаў на карысць практычнасцi i ўстойлiвасцi. I гэта правiльна. Чаравiкi са шнуроўкай у стылi «кэжуал», «боха», «мiлiтары» або «гранж» перавандравалi з мiнулай зiмы ў цяперашнюю. Шнуроўка апрыёры «робiць» практычна любыя чаравiкi актуальнымi. У гэтым сезоне яна можа знаходзiцца як наперадзе, так i збоку, i нават ззаду.

Селi на галаву

Памятаеце, як мама загадвала вам у падлеткавым узросце: «Абавязкова надзень шапку!» Гэтай зiмой да голасу матчынага патрабавання далучаюцца вядучыя дызайнеры свету. Правiльная шапка — не проста «грэлка» для галавы, гэта аксесуар, якi робiць амаль кожны вобраз актуальным.

Асаблiва калi гаворка iдзе аб капелюшы. У гэтым халодным сезоне капелюшы актуальныя як нiколi. Зразумела, што гэты раскошны аксесуар падыходзiць далёка не кожнай. Але калi ў вас атрымаецца падабраць падыходзячы капялюш адпаведна сваім густу i знешнасці, гэтай зiмой вы будзеце лавiць зачараваныя позiркi. Фаварыт дызайнераў — капялюш Fedora. Ну, а адважным моднiцам можна параiць шыракаполы капялюш. Ён можа быць фетравы або з шарсцяной тканiны — такiя галаўныя ўборы прадставiў дом «Шанэль» пры дэманстрацыi калекцыi Ready-To-Wear. Колер выбiраем як класiчны чорны, бэжавы або шэры, так i з яркай палiтры.

Яшчэ адзiн модны галаўны ўбор гэтага зiмовага сезона — панамы з фетру, воўны або скуры. Такiя панамы i капелюшы клош у розных варыянтах можна было ўбачыць на паказе Christian Dior. Насiць iх мадэльеры Dior прапануюць насунуўшы на вочы, у тандэме з доўгiмi палiто. Зрэшты, дэмакратычная панама будзе выдатна спалучацца, напрыклад, i з моднымi сёлетняй зiмой дублёнкамi.

Вязаныя шапкi ў гэтым сезоне жывейшыя за ўсiх жывых. Сярод фаварытаў будучай зiмы — гарэзлiвыя шапкi з пампонамi i мадэлi буйной вязкi. Вязаныя шапкi гэтым разам носiм з адваротам, як у дзяцiнстве.

Антытрэнды зiмы

А цяпер пагаворым аб тым, што насiць НЕ трэба.

  • Перадусiм гэта вопратка з рэменем-гумкай. Напэўна, яна знойдзецца ў шафе ў вельмi многiх дам. Цёпла, зручна i... «эфект вусеня» вам забяспечаны. Не i яшчэ раз не! Выбiраем прамы крой або «аверсайз». А падкрэслiць талiю, калi ўжо вельмi хочацца, можна з дапамогай шырокага рэменя.
  • Футровыя кiшэнi на вопратцы, як i футровая аблямоўка на рукавах, i футравыя «званочкi», што матляюцца на «завязках» ад капюшона, — усё гэта неактуальна. Асаблiва калi вы даўно ўжо выйшлi з узросту малодшай школы.
  • Кароткiя вязаныя сукенкi ў абцяжку. Вязаныя сукенкi якраз актуальныя, але абцягваць формы яны не павiнны, якiя б прыгожыя тыя нi былi. Будзем больш сцiплыя i ўспомнiм, што ў жанчыне павiнна быць загадка. Выбiраем сукенкi «аверсайз». Сiлуэт можа быць прамы або трохi звужаны ў талii, а даўжыня — да калена або нiжэй калена.
  • «Дуцiкi». Дутыя боты — яшчэ адна любiмая нашымi жанчынамi штучка. Зручна, цёпла, але ў такiх ботах ногi здаюцца непрапарцыянальна вялiкiмi. Не хочаце быць падобнай на хобiта — пакiньце гэты абутак для загарадных прагулак i паездак у вёску. Дарэчы, вышэйсказанае можна аднесцi i да угаў.
  • Боты на шпiльцы. Калi абцас, то ўстойлiвы i масiўны. А лепш — плоская падэшва. Зiма ўсё ж такi, слiзка!
  • Шапка i шалiк з аднаго камплекта. Сумна i неактуальна. Паэксперыментуйце з фактурамi i адценнямi. I не падбiрайце сумку да абутку i абутак да сумкi — гэтай бабулiнай парады прытрымлiвацца не варта.

Аляксандра АНЦЭЛЕВIЧ

Загаловак у газеце: Снежная каралева

Выбар рэдакцыі

Здароўе

Чаму беларусы не спяшаюцца прышчапляцца?

Чаму беларусы не спяшаюцца прышчапляцца?

Праз які час праводзіць рэвакцынацыю ад COVІD-19 і ці патрэбна яна ўвогуле?

Грамадства

Як абараніцца ад махляроў у сферы сучасных тэхналогій

Як абараніцца ад махляроў у сферы сучасных тэхналогій

Фішынг, вішынг — два кіты кіберзлачыннасці

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.