Вы тут

Лукашэнка: Царква — апора, адзін са стрыжняў дзяржавы


Прэзідэнт Беларусі Аляксандр Лукашэнка сустрэўся з мітрапалітам Мінскім і Заслаўскім Веніамінам і старшынёй Савета Рэспублікі Наталляй Качанавай.


«Мы заўсёды будзем прыхільнікамі міжканфесійнага міру»

Па словах Прэзідэнта, абмеркаваць праблемы ў дзяржаве з Патрыяршым Экзархам усяе Беларусі мітрапалітам Мінскім і Заслаўскім Веніямінам планавалі падчас нядаўнага адкрыцця храма ў Мінскім раёне. Ён падкрэсліў, што для краіны шмат значыць канфесійны мір, які ўдалося сфарміраваць за чвэрць стагоддзя.

«Я ганаруся, што гэта адбылося ў гады, калі мне прыйшлося служыць нашай Айчыне. Я вельмі гэта цаню і гэта глыбока асабістае. Вы павінны разумець, што той міжканфесійны мір, які ў нас склаўся, мы нікому не аддамо і заўсёды будзем прыхільнікамі міжканфесійнага міру», — сказаў Прэзідэнт.

Ён адзначыў, што праваслаўная царква з-за сваёй велізарнай значнасці ў краіне з’яўлялася заўсёды апорай міра. Пры гэтым у дзяржаве, па словах Аляксандра Лукашэнкі, вялікая колькасць іншых канфесій і абшчын (рымска-каталіцкая і грэка-каталіцкая царква, пратэстантскія рэлігійныя арганізацыі, стараабрадцы, іўдзейскія арганізацыі, мусульманскія, будысцкія і іншыя), але ўдалося захаваць раўнавагу і баланс.

«Пры ўсіх падзеях, што адбываліся і адбываюцца асабліва ў Мінску, нам удаецца гэты міжканфесійны мір захаваць. Канечне, не без памылак з боку ўладаў, не без памылак з боку нашых канфесій. Хачу, каб вы мяне разумелі і іншыя таксама: калі хоць адна арганізацыя ў Беларусі, будзь тое грамадская ці рэлігійная будзе мэтанакіравана на разбурэнне дзяржавы, вы мяне зразумейце, я як кіраўнік дзяржавы па Канстытуцыі абавязаны абараняць гэту дзяржаву, буду вымушаны рэагаваць, — заявіў Прэзідэнт. — Прыклад таму, настаяцель каталіцкай царквы, які сёння я не ведаю, дзе знаходзіцца. Але ездзіць у Польшчу і атрымліваць кансультацыі, як разбураць нашу краіну, нікому не будзе дазволена».

Аляксандр Лукашэнка дадаў: валодае інфармацыяй, што Веніяміна як кіраўніка Беларускай праваслаўная царквы годна прыняла рэлігійная супольнасць.

«Я яшчэ раз падкрэсліваю важную ролю праваслаўнай царквы і ваша прызначэнне, якое ўспрынята ў грамадстве вельмі станоўча», — канстатаваў Прэзідэнт.

Як ён адзначыў, улады супрацоўнічаюць не толькі з прадстаўнікамі праваслаўнай канфесіі.

«Пры маёй падтрымцы і мячэць пабудавана на пэўных умовах. І мусульмане ніколі нам не стваралі праблем. Ніколі. Я часта кажу, што мусульмане заўсёды 100 працэнтаў на ўсіх выбарах падтрымлівалі ўладу і мяне як Прэзідэнта. Мы ніколі не дазволім заяўляць, як прэзідэнт Францыі пачаў, пра свабоду слова і рэлігійныя пачуцці. Бачыце, у яго свабода слова. Ды не чапай ты прарока. Што дасць табе ў краіне крытыка мусульман?» — акцэнтаваў увагу Лукашэнка і прапанаваў выступіць пасрэднікам паміж Макронам і французскімі мусульманамі.

Па яго словах, ён мае добрыя адносіны з мусульманамі на працягу двух дзясяцігоддзяў і катэгарычна непрымальна ўмешвацца ў пачуцці вернікаў, асабліва мусульман.

«Мы ж ведаем, якія яны запальчывыя, рэактыўныя бываюць, калі іх абражаюць. Ці Макрон не ведае гэта? Ведае. Я гэты прыклад прывожу таму, што мы ніколі сабе не дазволім кідаць каменне ў нейкага верніка. Мая пазіцыя заўсёды была — кожны чалавек павінен знайсці сваю дарогу да храма. Хоча ў касцёл — ідзі маліся. Хочаш у нашу царкву — ідзі маліся. Хочаш у мячэць — калі ласка, ідзі туды. Калі перавагу нашы людзі аддаюць праваслаўю, з гэтым трэба лічыцца. Трэба ўсім абшчынам з гэтым лічыцца», — сказаў Алякандр Лукашэнка.

Прэзідэнт лічыць, што неабходна рыхтаваць сваіх каталіцкіх святароў

Па яго словах, пандэмія каранавіруса значна паўплывала і на царкву — прыходы крыху абяднелі.

«Менш людзей прыходзіць, спрабуюць людзі неяк сябе абараніць, але мы ніколі не зачынялі храмы і зачыняць не будзем. Таму што любая бяда — ідзі і маліся, каб Гасподзь дапамог. Так мы заўсёды казалі. Што значыць зачыніць храм у бяду — ды мы ў вайну храм не зачынялі, таму мы ніколі гэтага рабіць не будзем. Гэта справа кожнага чалавека», — дадаў Прэзідэнт.

Таму ён даручыў падтрымаць царкву і разгледзець гэтае пытанне ва ўрадзе. Яшчэ адна праблема, на яго думку, — недахоп святароў.

«З-за мяжы, з чужых нам краін праваслаўная царква не вязе святароў, як гэта адбываецца ў некаторых канфесіях. Я папе Рымскаму і мінуламу, і цяперашняму абазначыў гэту тэму. Слухайце, як мы можам прымаць сёння святароў (хай не крыўдзяцца на мяне) з Польшчы, калі польская дзяржава, чыста каталіцкая, заняла такую пазіцыю ў адносінах да Беларусі. Гэта ненармальна», — падкрэсліў кіраўнік краіны і заявіў, што даўно ставіў перад папам Рымскім пытанне пра неабходнасць рыхтаваць сваіх каталіцкіх святароў.

Яшчэ адна ідэя, якую чуў ад вернікаў Аляксандр Лукашэнка, — вярнуць праваслаўную адукацыю ў Жыровічы.

«Жыровічы, яны створаны па духу для падрыхтоўкі святароў. Трэба вывучыць разам з царквой гэту праблему і паглядзець. Таму што перанесці адукацыю зусім проста. Прыняў рашэнне — і перанёс. Але там павінна быць адпаведная база. Трэба паглядзець, што там зроблена і што яшчэ неабходна зрабіць, каб задаволіць патрэбы новага прытока святароў», — падкрэсліў Прэзідэнт і дадаў, што ён гатовы дапамагчы з гэтым.

Ён дадаў: ведае праблему, калі прыходы застаюцца без настаяцеляў, бо не могуць утрымліваць святара. Несці службу прыходзяць з іншых храмаў.

«Значыць мы павінны дапамагчы. Святар ніколі не быў абузай для дзяржавы. Ён заўсёды сваю ролю адыграе, калі ён сапраўдны, і адпрацуе. Нам трэба падумаць, калі сапраўды маленькая вёсачка, які сэнс нам трымаць святара. Хай у яго будзе прыход шырэй у межах сельсавета. Трэба паглядзець па гэтых структурах. І мы тут, уладыка, гатовы падключыцца, і дэфіцыт святароў за пяцігодку трэба ліквідаваць», — заклікаў Прэзідэнт.

«Я не супраць, каб папа Рымскі, не кажучы пра нашага патрыярха, і мусульманскія святары прыязджалі да нас»

Ён пракаментаваў чуткі пра візіт у Беларусь папы Рымскага.

«Папа Рымскі — кіраўнік дзяржавы і царквы. Таму запрашэнне, калі пойдзе з Беларусі, павінна быць запрашэннем кіраўніка дзяржавы і праваслаўнай царквы, з якой у каталікоў ёсць маса праблем. Ведаеце, я не хачу апынуцца між молатам і кавадлам і стварыць нейкія нязручнасці. Калі мы з гэтым папам Рымскім размаўлялі, ён гэта разумее», — падзяліўся Аляксандр Лукашэнка.

Ён назваў інсінуацыямі размовы, быццам папа Рымскі прыедзе інкогніта. Падстаўляць яго, калі дзяржава запрашае, а галоўная канфесія і патрыярх не згодны — на гэта ўлады не пойдуць.

«Мы раскольнікамі не былі і не будзем. Я не супраць, каб папа Рымскі, не кажучы пра нашага патрыярха, і мусульманскія святары прыязджалі да нас. Ніхто не супраць, але на гэта павінна быць агульная згода, — заявіў Лукашэнка. — Таму не трэба весці наконт гэтага незразумелыя размовы і ў палітычнай гульні разыгрываць гэтую карту. Гэта непрымальна».

«Царква — апора, адзін са стрыжняў дзяржавы»

Прэзідэнт назваў царкву, асабліва праваслаўную — асноўнай скрэпай нашай дзяржавы.

«Як можа быць царква аддзелена ад дзяржавы? Чытай па-за дзяржавай быць. Не можа яна быць. Гэта апора, адзін са стрыжняў дзяржавы, калі хочаце адзін з ідэалагічных стрыжняў. Пакуль мы не выпрацавалі з сваёй ідэалогіі нейкую цэласную нацыянальную ідэю (сёння больш патрыятызм выступае на першае месца), царква з’яўлялася і будзе з’яўляцца духоўнай, ідэалагічнай, калі хочаце, асновай нашай дзяржавы», — сказаў кіраўнік краіны.

Прэзідэнт падзяліўся, што «не можа існаваць у прасторы, дзе няма іншага пункту гледжання», але катэгарычна супраць парушэння законаў.

«Пратэстоўцы кажуць, што яны мірныя, ходзяць, нічога не парушаюць. Ну як не парушаеце? Вы выходзіце на незаконныя, а сёння нават не нямірныя ўжо акцыі. Вы парушаеце грамадскі парадак, кідаецеся на міліцыю. Там букет парушэнняў, якія ж тут могуць быць патуранні, калі вы парушаеце закон? Калі хочаце падыскутаваць студэнты ў ВНУ, сабраліся падыскутавалі. Але ж я ведаю, адкуль ногі растуць», — выказаўся Прэзідэнт наконт пытання пра розныя меркаванні.


Праваслаўная царква ўносіць свае прапановы па змяненню Кастытуцыі

Як паведаміў Патрыяршы Экзарх усяе Беларусі мітрапаліт Мiнскі і Заслаўскі Веніямін, было прапанавана ўсім епархіям, сінадальным аддзелам выказаць свае заўвагі ў новую Канстытуцыю.

«Зараз гэтыя прапановы апрацоўваюцца ў і бліжэйшы час мы накіруем іх у адпаведныя заканадаўчыя структуры, каб там іх разгледзелі. У прыватнасці, яны тычацца пытанняў, звязаных з сям’ёй, захаваннем сямейных каштоўнасцяў, адукацыі, каб яна яднала ў сабе і выхаванне патрыятычных пачуццяў, маральнасці. Таксама прапануем унесці прапановы, што тычацца сферы культуры», — сказаў мітрапаліт.

Па словах мітрапаліта, святары павінны памятаць, што царква — месца сустрэчы вернікаў розных палітычных поглядаў і важна, каб словы святароў не аказвалі раздзяляльнага ўздзеяння.

Марыя ДАДАЛКА

Фота: БЕЛТА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Гэты тыдзень вельмі ўдалы ў плане кар'еры і любові. Могуць паступіць прыемныя дзелавыя прапановы. Калі вы сканцэнтраваныя і ўважлівыя, то забяспечаны поспех, прычым такі, на які нават не разлічвалі. Цяпер час выканання жадання, вырашэння праблемы, якая хвалюе даўно. Да канца тыдня прыйдзе адчуванне радасці, спакою і гармоніі.

Грамадства

Як нармалізаваць артэрыяльны ціск?

Як нармалізаваць артэрыяльны ціск?

Сёння ў кожнага пятага дарослага чалавека ў свеце дыягнастуецца павышаны крывяны ціск.