Вы тут

​Як засцерагчыся ў сезон пад'ёму захваральнасці на рэспіраторныя інфекцыі?


У цяперашні час назіраецца павышэнне захваральнасці на ВРВІ. Ва ўсім свеце працягвае цыркуляваць COVІD-19, рост колькасці новых выпадкаў ёсць і ў нашай краіне. Разам з тым захваральнасць на ВРВІ пакуль знаходзіцца на неэпідэмічным узроўні. Спецыялісты расказалі, як вядзецца вакцынацыя ад грыпу і чаму ў гэтым сезоне вялікі попыт на прышчэпкі, як абараніць сябе ад ВРВІ і каранавіруса, якія прадукты ўмацоўваюць імунітэт і чым рацыён здаровага чалавека адрозніваецца ад рацыёна таго, хто хварэе, ці ёсць розніца, якую маску насіць, і ці трэба прымаць супрацьвірусныя прэпараты


— Цяпер мы адзначаем рост вострых рэспіраторных інфекцый, як і звычайна ў гэты час. Асноўную долю сярод захварэлых складаюць дзеці — 54 %, — адзначае начальнік аддзела гігіены, эпідэміялогіі і прафілактыкі Міністэрства аховы здароўя Іна Карабан. — Ад грыпу вакцыянавана 35,3 % насельніцтва. Сёлета мы назіраем дастаткова інтэнсіўныя тэмпы вакцынацыі — многія імкнуцца прышчапіцца як мага хутчэй. Вялікі попыт на платныя вакцыны, яны хутка скончыліся, нягледзячы на тое што былі завезеныя ў павялічаных аб'ёмах.

Спецыяліст расказала, што найперш вакцынуюцца пацыенты з груп рызыкі. Гэта дзеці з шасці месяцаў да трох гадоў, дзеці з трох гадоў і дарослыя з хранічнымі захворваннямі, асобы старэйшыя за 65 гадоў, медыцынскія работнікі, дзеці і дарослыя ва ўстановах з кругласутачным знаходжаннем, работнікі арганізацый, якія забяспечваюць жыццядзейнасць дзяржавы. Прышчэпка неабходная для работнікаў адукацыі, гандлю, транспарту, грамадскага харчавання, камунальнай сферы.

Усяго запланавана прышчапіць ад грыпу каля 40 % насельніцтва, прычым не менш за 75 % тых, хто знаходзіцца ў групах рызыкі. І апошняга паказчыка ўжо ўдалося дасягнуць.

— З груп рызыкі мы прышчапілі 75 %. Адзначу актыўнасць саміх медработнікаў — вакцыянавана 86 %, а таксама больш за 80 % дзяцей у дзіцячых дамах, школах-інтэрнатах. Асноўны этап вакцынацыі ў групах рызыкі завяршаецца ў пачатку лістапада. Магчымасць прышчапіцца за ўласныя сродкі яшчэ захоўваецца, — дадала загадчык аддзялення імунапрафілактыкі Рэспубліканскага цэнтра гігіены, эпідэміялогіі і грамадскага здароўя Вераніка Высоцкая.

Што дапаможа пазбегнуць ВРВІ і COVІD-19

ВРВІ — гэта вялікая група захворванняў, для якіх характэрны агульны шлях перадачы — паветрана-кропельны. Аб'ядноўвае іх і падабенства клінічных праяў. Узбуджальнікаў гэтых хвароб мноства — вядома больш за 200 вірусаў. Гэта як класічныя вірусы грыпу, парагрыпу, адэнавірусы, рынавірусы, так і нядаўна адкрытыя пнеўмавірусы і каранавірус.

— Каб развілося захворванне, патрэбны тры складнікі — узбуджальнік, успрымальны арганізм і шлях перадачы. Мы можам уздзейнічаць толькі на два апошнія, — адзначае загадчык лабараторыі грыпу і грыпападобных інфекцый РНПЦ эпідэміялогіі і мікрабіялогіі Наталля Шмялёва.

Найперш неабходна захоўваць сацыяльную дыстанцыю ў 1-1,5 метра. Прытрымлівацца прынцыпаў сацыяльнага дыстанцыявання, гэта значыць скараціць свае кантакты і змяніць мадэль паводзінаў — на 75 % зменшыць кантактаванне па-за межамі дома і на 25 % — на рабоце. Усё гэта будзе садзейнічаць зніжэнню захваральнасці на ВРВІ, грып і каранавірусную інфекцыю.

— Асобы з бессімптомным цячэннем і ў інкубацыйным перыядзе хваробы могуць знаходзіцца побач з намі, бо лічаць сябе здаровымі. Таму вельмі важнае выкарыстанне масак. Мы яшчэ непрацяглы час жывём з COVІD-19, але папярэдні вопыт інфекцыйных хвароб сведчыць пра тое, што наяўнасць масак скарачае імавернасць інфікавання да 1,5 %, — падкрэсліла Вераніка Высоцкая.

Спецыяліст нагадала і пра гігіену — не варта забываць пра мыццё рук з мылам, калі ж гэта немагчыма, апрацоўваць іх антысептыкам. Дзецям і дарослым, якія пакутуюць на хранічныя хваробы, патрэбны больш жорсткі варыянт сацыяльнага дыстанцыявання і максімальнае абмежаванне кантактаў.

— Мы ў сваю чаргу прапрацоўваем кожны ачаг каранавіруснай інфекцыі, і наша работа накіравана на тое, каб перарваць яе распаўсюджванне, — запэўніла Вераніка Высоцкая.

Каб рацыён не шкодзіў, а дапамагаў імунітэту

— Мы павінны памятаць, што нельга ўвесці адзін кампанент у рацыён і спадзявацца, што гэта нейкім чынам дазволіць нам не заразіцца. Наша харчаванне павінна быць комплекснае і рацыянальнае, — нагадала загадчык аддзела грамадскага здароўя і сацыяльна-гігіенічнага маніторынгу Рэспубліканскага цэнтра гігіены, эпідэміялогіі і грамадскага здароўя Настасся Косава.

Наш рацыён павінен утрымліваць дастатковую колькасць асноўных нутрыентаў — бялкі, тлушчы, вугляводы, мікра- і макраэлементы, вітаміны. Штодзень мы мусім ужываць шэсць відаў прадуктаў. Гэта зерневыя (крупы і макарона), гародніна, малочнакіслыя прадукты, мяса (а таксама птушка і рыба), тлушчы і вада.

У перыяд пад'ёму захваральнасці ні ў якім разе нельга недаацэньваць гародніну і садавіну, якія з'яўляюцца крыніцай вітамінаў, мікра- і макраэлементаў, складаных вугляводаў — клятчаткі. Асабліва карысныя жоўты перац, спаржа, вішня, каперсы, якія багатыя на гліцын. А ён даказаў сваю актыўнасць у дачыненні да вірусаў. Не трэба забываць пра цыбулю і часнок, а таксама імбір — аналаг нашага часнаку, гэта прыродныя імунамадулятары. Яшчэ адзін прыродны стымулятар імуннай сістэмы — куркума, дакладней, куркумін, які там утрымліваецца. Лімон, чорныя парэчкі, шыпшына, журавіны, квашаная капуста, балгарскі перац у вялікай колькасці ўтрымліваюць вітамін С.

Малочнакіслыя прадукты важныя для падтрымання і аднаўлення біяфлоры нашага кішэчніка. Мяса, птушка і рыба з'яўляюцца крыніцай бялку, які ўдзельнічае ў сінтэзе імунных бялкоў. Неабходныя і тлушчы, хоць многія цяпер імкнуцца скараціць іх ужыванне. У рацыёне павінны быць і вада, а таксама морсы і іншыя напоі, якія ўтрымліваюць вітаміны. А вось прадукты, не ўласцівыя для нашага рацыёну, у перыяд павышэння захваральнасці лепш не ўжываць, каб дадаткова не напружваць арганізм.

Калі вы пачынаеце хварэць, рацыён павінен быць максімальна паўнацэнны. Бялкі, тлушчы і вугляводы ў дастатковай колькасці, максімум гародніны і садавіны, кісламалочныя прадукты, а таксама варта дадаць вітамінныя комплексы.

Калі вы хварэеце, рацыён павінен быць максімальна беражлівы, бо ўсе сілы арганізм аддае на работу імуннай сістэмы. Ежа павінна быць прыгатаваная адпаведным чынам, у прыватнасці, на пары, а яе прыёмы павінны быць частыя. Важна выключыць алкаголь, каўбасныя вырабы і ўсё тое, што ўтрымлівае вялікую колькасць спецый. А вось ужыванне вадкасці трэба павялічыць, гэта не толькі вада, але і свежыя сокі, морсы, гарбата з ліпай, мёдам, шалфеем, шыпшынай, багатымі на вітамін С.

Калі вы ідзяце на папраўку, неабходна падтрымаць кішэчнік пасля ўжывання супрацьвірусных і антыбактэрыяльных прэпаратаў. І тут на дапамогу прыйдуць кісламалочныя прадукты. Можна дадаваць гародніну і садавіну, тлустыя віды рыбы, яйкі.

— У перыяд пад'ёму захваральнасці важна адмовіцца ад дыет і пастарацца зрабіць свой рацыён разнастайным і збалансаваным, — рэзюмавала Настасся Косава.

Ці прымаць супрацьвірусныя прэпараты?

— Супрацьвірусных прэпаратаў не так і шмат, бо іх складана вырабіць. У прыватнасці, два выкарыстоўваюцца пры грыпе. Эфектыўнасць астатніх пакуль не даказана. Таму лепш не прымаць гэтыя прэпараты без прызначэння ўрача, — кажа Іна Карабан.

Які тып масак больш надзейны?

— Любая маска — тканевая, марлевая, медыцынская — абараняе ад пранікнення віруса. Важна, ці правільна мы яе надзяваем, носім і знімаем. Калі мы пастаянна яе тузаем, не мыючы рукі, дакранаемся да твару, які сэнс насіць маску? — кажа Іна Карабан. — Падчас першай хвалі маскі насілі больш людзей. Цяпер раніцай у цалкам запоўненай маршрутцы добра калі два-тры чалавекі ў масцы. Гэта выклікае здзіўленне. Я разумею, што ўсе мы стаміліся, але гэта наша здароўе. Калі мы пра сябе не паклапоцімся, дык хто тады зробіць гэта за нас? Многія думаюць: ну захварэю — і вылечуся. А калі не вылечыцеся і загінеце? Такое пагарджанне мне незразумелае. Калі мы будзем усе разам выконваць тыя меры, якія прапаноўваюць спецыялісты, значнага распаўсюджвання каранавіруснай інфекцыі не будзе.

У асенні перыяд наш стол багаты на агародніну і садавіну, таму лепш аддаваць перавагу натуральным утрымальнікам вітамінаў. Вітамінныя комплексы будуць дарэчы вясной, калі прыродны рэсурс вычарпаны. Пры гэтым перад ужываннем такіх комплексаў лепш параіцца з урачом.

Іна Карабан адзначыла, што аналіз паказаў: большасць захварэлых кантактавала з людзьмі без масак.

— Пытаеш, ці былі ў масках тыя, з кім вы кантактавалі. І 90 % людзей кажа, што не. Калі мы не будзем карыстацца мерамі прафілактыкі — простымі і недарагімі, то нельга разлічваць не заразіцца, — падкрэсліла спецыяліст.

Алена КРАВЕЦ

Загаловак у газеце: COVІD-19, грып і іншыя ВРВІ

Выбар рэдакцыі

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.

Грамадства

Усходні гараскоп на наступны тыдзень

Усходні гараскоп на наступны тыдзень

КАЗЯРОГ. Буйныя крэдыты зараз лепш не браць. Паспрабуйце прывесці думкі і пачуцці ў парадак. І перастаньце гібець, зазірніце ў сябе, ураўнаважце эмацыянальны стан. Зараз самы час для наладжвання згубленых сувязяў, якія спатрэбяцца ў найбліжэйшай будучыні. Не забывайце пра родных і блізкіх.

Спорт

Сяргей Кавальчук: У спорце вышэйшых дасягненняў адна мэта — быць лепшымі

Сяргей Кавальчук: У спорце вышэйшых дасягненняў адна мэта — быць лепшымі

Міністр спорту і турызму пра жыццё беларускага спорту. Шчыра і аб’ектыўна.