Вы тут

На Магілёўшчыне зарэгiстравана болей чым 400 фермераў


У Магiлёўскай вобласцi шмат сапраўдных працаўнiкоў сяла. Тут зарэгiстравана болей чым 400 фермераў, ва ўласнасцi якiх знаходзiцца парадку 48 тысяч гектараў зямлi. У сярэднiм на адну сялянскую (фермерскую) гаспадарку ў Прыдняпроўскiм краi прыходзiцца 125 гектараў. I гэта, дарэчы, самы высокi вынiк па краіне.


— Найбольшае развiццё фермерства атрымала ў Магiлёўскiм, Бабруйскiм i Шклоўскiм раёнах, дзе iснуюць адпаведна 94, 53 i 42 дзеючыя гаспадаркi, — адзначае начальнiк аддзела прагназавання, аналiтычнай работы i аплаты працы Камiтэта па сельскай гаспадарцы i харчаваннi Магiлёўскага аблвыканкама Наталля Халаiмава. — На працягу апошнiх гадоў фермерскiя гаспадаркi па тэмпах росту вытворчасцi сельскагаспадарчай прадукцыi значна апярэджвалi сельскагаспадарчыя арганiзацыi. Асноўным напрамкам сельскагаспадарчай дзейнасцi фермераў з'яўляецца раслiнаводства. Адметна, што, займаючы ўсяго 3,8 % ад агульнай пасяўной плошчы сельскагаспадарчых культур вобласцi, фермерскiя гаспадаркi вырабляюць болей чым 10 % ад агульнаабласнога аб'ёму бульбы, каля 8 % гароднiны, парадку 6 % збожжа i 5 % цукровых буракоў.

У вобласцi ёсць гаспадаркi, якiя працуюць на вельмi высокiм узроўнi з выкарыстаннем навуковых падыходаў i лiчбавых тэхналогiй. Адна з такiх — сялянская гаспадарка «Дыяна», якая ўтварылася ў Шклоўскiм раёне ў 1991 годзе. Яе заснавальнiк Уладзiмiр Малiноўскi пачынаў з апрацоўкi 50 гектараў у чыстым полi. Зараз памеры ўгоддзяў пашырылiся амаль да 3,1 тысячы гектараў. Вырошчваюць бульбу i збожжавыя. Пры гэтым ураджайнасць другога беларускага хлеба дасягае болей чым 400 ц/га. Бульбу адсюль з задавальненнем бяруць у Расii, Казахстане i iншых краiнах.

На працягу свайго iснавання «Дыяна» захоўвае статус элiтнай гаспадаркi па вытворчасцi насення бульбы, збожжавых, рапсу, грэчкi. Пасеў i апрацоўка насення вядзецца па тэхналогii дакладнага земляробства. Для гэтага энерганасычаная тэхнiка аснашчана сiстэмамi беспiлотнага кiравання, што дазваляе забяспечыць дакладнасць праходу трактара з адхiленнямi да 2,5 сантыметраў у рэжыме аўтапiлота.

Сваю лепту ў фермерскi рух на Магiлёўшчыне ўносiць сялянская гаспадарка «Новы быт». Ёй кiруе Аляксандр Канавалаў, якi пасля армii працягнуў справу бацькi.

Зараз у яго карыстаннi амаль паўтары тысячы гектараў сельгасугоддзяў, на якiх расце бульба, збожжа, рапс, грэчка, лён. Тры гады таму фермер гаспадарчым спосабам пабудаваў малочнатаварную ферму на 100 галоў i закупiў увесь неабходны набор тэхнiкi. А яшчэ адкрыў сталовую для рабочых i непадалёк ад адмiнiстрацыйнага будынка гаспадаркi зрабiў дзiцячую пляцоўку. Аляксандр Канавалаў актыўна ўдзельнiчае ў добраўпарадкаваннi населеных пунктаў сельсавета, займаецца падсыпкай, а зiмой i расчысткай дарог, дапамагае адзiнокiм пажылым людзям з пасевам i ўборкай ураджаю, абкосам падворкаў. Для захавання i абслугоўвання тэхнiкi ён пабудаваў гаражы i цёплыя рамонтныя майстэрнi, навес i перавалачны зернясклад. Акрамя гэтага, укладае грошы ў будаўнiцтва i рамонт жылля для сваiх рабочых, падвозiць дзяцей у школу. Менавiта дзякуючы такiм самаадданым грамадзянам сёння i жывуць нашы малыя населеныя пункты.

Нэлі ЗІГУЛЯ

Фота БЕЛТА

Загаловак у газеце: Дзякуючы iм жыве вёска

Выбар рэдакцыі

Грамадства

Фарбы вайны. Пяць карцін мастакоў-відавочцаў

Фарбы вайны. Пяць карцін мастакоў-відавочцаў

Вайна — адна з тых тэм, якія нікога не пакідаюць абыякавымі. 

Грамадства

7 вершаў, напісаных на франтах Вялікай Айчыннай

7 вершаў, напісаных на франтах Вялікай Айчыннай

«І на кожным кургане, быццам яблыню, песню сваю пасаджу»