Вы тут

Будуючы — расцём, альбо Ёсць традыцыя добрая


Шэраг новых аб’ектаў здадзены ў строй у Беларусі ў восеньскую пару. Найбольш знакавыя падзеі — гэта ўключэнне турбагенератара першага энергаблока атамнай электрастанцыі ў адзіную энергасістэму Беларусі, а таксама пуск шэрагу станцый трэцяй лініі Мінскага метрапалітэна


Аляксандр Лукашэнка наведвае Беларускую АЭС

Хто будуе — той дбае пра будучыню. Праўда, у народзе ёсць таксама іншая показка: хто будуе, той бядуе… Але ж, пэўна, яна склалася ў даўнюю пару, можа й пасляваенную, ці яшчэ раней, калі продкі нашыя, можа й пагарэльцы, усе сілы й здароўе ўкладвалі, каб мець хоць які дах над галавою. Цяпер жа — зусім іншы час на Бацькаўшчыне. Мы не бядуючы будуем, а з упэўненасцю ў дні заўтрашнім. І ўсе нашыя новабудоўлі, што па добрай традыцыі ўступілі ў строй да Кастрычніцкіх святаў, — таму сведчаннем. Як адзначыў Прэзідэнт Аляксандр Лукашэнка, наведваючы 7 лістапада Беларускую АЭС у Астраўцы, у Беларусі штогод адкрываюць важныя, прарыўныя аб’екты, якія спрыяюць якаснаму росту айчыннай эканомікі ды павышэнню ўзроўню жыцця людзей. Хоць шматгадовая традыцыя дарыць знакавыя падарункі жыхарам Беларусі мае яшчэ й савецкія карані, але ж яна жывая й цяпер дзякуючы мэтанакіраванай падтрымцы Кіраўніка дзяржавы.

І ў гэтую восень — вельмі добры “ўраджай” новых аб’ектаў. Тэлежурналісты рабілі з іх святочныя рэпартажы — ёсць у сацсетках, і калегі з БелТА падрыхтавалі цікавую падборку “Новыя аб’екты восені-2020 у фотаздымках”. Сярод іх, вядома ж, — Беларуская атамная электрастанцыя, а таксама трэцяя лінія Мінскага метро ад станцыі “Кавальская Слабада” да “Юбілейнай плошчы”. Згадаем яшчэ Экалагічны рынак у Валер’янаве пад Мінскам, вытворчасць халоднакатанага ліста на заводзе ў Мёрах (на заводзе будзе працаваць каля 650 чалавек), радыелагічны корпус у Мінскім гарадскім клінічным анкадыспансэры, Цэнтр электронна-прамянёвых тэхналогій у НАН Беларусі, мост цераз Дзвіну пасля рэканструкцыі ў Полацку. Трохі меншыя па капіталаўкладаннях, але ж таксама важныя: трэці дзіцячы дом сямейнага тыпу ў Маларыцкім раёне, дзіцячы сад з сэнсарным пакоем і арт-студыяй у Смалявічах, дзіцячы сад на 190 месцаў у Мінску (мікрараён Брылевічы), пажарнае дэпо ў Петрыкаве. І яшчэ — новыя дамы, басейны, месцы адпачынку з’явіліся па ўсёй краіне.

Вядома ж, найбольш грамадскае ўвагі скіравана й сёння на БелАЭС. Як адзначаў гендырэктар дзяржкарпарацыі “Росатом” Аляксей Ліхачоў, паступленне першых “атамных” кілават-гадзін электраэнергіі ў адзіную энергасістэму Беларусі — гэта з’ява гістарычная. Бо яна знамянуе пачатак атамнай эры. А такое стала магчымым для Беларусі дзякуючы доўгай і прадуктыўнай супрацы беларускіх і расійскіх спецыялістаў. Дарэчы, Аляксей Ліхачоў звярнуў увагу: да ўводу блока ў прамысловую эксплуатацыю давядзецца выканаць яшчэ шмат работы. І далейшае развіццё падзей — у некаторы момант не справіліся з узрастаючай напругай трансфарматары, турбіну давялося спыніць — тое пацвердзілі. Што ж: рабочы момант, як кажуць у такіх выпадках. І ўсё ж можна смела казаць пра поспех праекта Беларускай АЭС. Гэта, нагадаем, першая атамная станцыя пакалення ІІІ+, створаная па расійскіх тэхналогіях за межамі Расіі. Для Беларусі ж гэта, як заявіў Аляксандр Лукашэнка, выступаючы перад працоўным калектывам і будаўнікамі БелАЭС, новы крок у будучыню, да забеспячэння энергетычнай бяспекі: “Наша краіна сёння становіцца ядзернай дзяржавай, гэта велізарны поспех, гэта вянок, калі хочаце, можа быць, этап суверэнітэту й незалежнасці нашай краіны. Ён сведчыць аб тым, што ў нас ёсць мазгі, людзі кемлівыя, і ёсць надзейныя сябры, якія дапамаглі стварыць гэты ўнікальны аб’ект, які будзе служыць нам вельмі доўга. Мы, людзі старэйшыя, сыдзем з гэтага жыцця, а такі аб’ект будзе прыносіць карысць людзям”.

Прэзідэнт падкрэсліў, што “на першым энергаблоку будзе вырабляццца каля 20 % ад агульнай патрэбы краіны ў электрычнасці. Столькі ж нам дасць праца другога блока. Далей — больш (і я ўжо адкрыта сказаў, што такое больш). (Перад тым Аляксандр Лукашэнка выказаўся так: “Я так ужо не жартам, а паўжартам кажу пра тое, што калі навучыліся, то трэба й другую станцыю пабудаваць. Да таго часу мы ўбачым, наколькі эфектыўная цяперашняя станцыя, наколькі яна бяспечная і не будзе выклікаць столькі нараканняў не толькі ў нашых суседзяў, але і ў тых асобных, хто сумняецца ў нашай краіне.” — Аўт.) Запуск станцыі паслужыць імпульсам для прыцягнення ў краіну самых перадавых тэхналогій, і не толькі ў энергетыку, але і ў развіццё электратранспарту, стварэнне новых электраёмістых вытворчасцяў, інавацыйных напрамкаў у навуцы й адукацыі”. Вельмі важна, лічыць Прэзідэнт, што дзякуючы цеснаму ўзаемадзеянню з карпарацыяй “Росатом” у часе будаўніцтва БелАЭС у Беларусі з’явілася айчынная школа атамшчыкаў — спецыялістаў, якія асвоілі асноўныя тэхналагічныя аперацыі: “Мы павінны былі навучыцца гэта рабіць. Гэта самыя сучасныя тэхналогіі, “касмічныя” тэхналогіі, — і мы гэтаму навучыліся”. Лістападаўскі дзень, упэўнены Прэзідэнт, назаўжды ўвойдзе ў гісторыю: бо з яго пачынаецца новая старонка летапісу Беларусі: сучаснай, інтэлектуальнай, высокатэхналагічнай — такой, як мы ўсе разам яе будуем.

Адкрылася новая станцыя метро “Кавальская Слабада”

Яшчэ вельмі важна, звярнуў увагу Аляксандр Лукашэнка, што беларуская дзяржава стварыла ўсе неабходныя ўмовы для працы й камфортнага побыту тых, хто будзе працаваць на АЭС: “Астравец пераўтварыўся ў сучасны й зручны горад, новы горад атамшчыкаў. Пабудаваны новыя жылыя дамы і ўся неабходная сацыяльная інфраструктура. На такія мэты мы выдаткавалі больш за адзін мільярд рублёў”. Па словах Кіраўніка дзяржавы, Астравец павінен стаць прыкладам для далейшага развіцця раённых цэнтраў: “Па гэтым узоры мы будзем развіваць іншыя паўтары сотні райцэнтраў. Яны дагледжаныя, прыгожыя, але ў нечым ужо састарэлыя. Мы нічога не будзем разбураць, а створым там сацыяльную, вытворчую інфраструктуру — як у Астраўцы”.

Іван Ждановіч

Фота БЕЛТА

Нумар у фармаце PDF

Выбар рэдакцыі

Эканоміка

За якія парушэнні могуць прыпыніць работу магазінаў?

За якія парушэнні могуць прыпыніць работу магазінаў?

МАРГ час ад часу прыпыняе работу магазінаў.