Вы тут

Як студэнты ў Гродне дапамагаюць змагацца з каранавірусам


У сувязі з пагаршэннем эпідэміялагічнай сітуацыі ў Гродне з 14 лістапада ўведзены абавязковы масачны рэжым. Аб гэтым у эфіры тэлеканала «Гродна Плюс» паведаміла намеснік галоўнага ўрача Гродзенскага занальнага цэнтра гігіены і эпідэміялогіі Ірына Тупік. Індывідуальныя сродкі аховы абавязковыя не толькі для работнікаў, якія кантактуюць з людзьмі, але для ўсіх наведвальнікаў грамадскіх месцаў і транспарту. За невыкананне спагнанне будзе з кіраўнікоў аб'ектаў.


Для будучых урачоў — шасцікурснікаў лячэбнага факультэта Гродзенскага дзяржаўнага медыцынскага ўніверсітэта — такія меры перасцярогі не здаюцца жорсткімі. Ад распаўсюджвання інфекцыі трэба засцерагацца ўсімі спосабамі.

Арцём Сергель.

Арцём Сергель, які працуе медбратам у аддзяленні гемадыялізу ў Гродзенскай універсітэцкай клініцы, тлумачыць: людзі з хранічнымі хваробамі — першыя ў групе рызыкі. Таму ў аддзяленні была падрыхтавана асобная палата з некалькімі апаратамі для гемадыялізу. Калі чалавек з ныркавай недастатковасцю захварэў на каранавірус, яго шпіталізуюць у «ковіднае» аддзяленне.

— Зараз многія аддзяленні перапрафіляваныя на работу с «ковід»-пацыентамі. У вызначаны тэрмін такія хворыя праходзяць сваю працэдуру ў нашым аддзяленні. Мы апранаем спецыяльны касцюм і працуем па сваім кірунку. Напрыклад, мая змена доўжыцца сем гадзін, — расказвае Арцём.

У Веранікі Манюк змена доўгая і складаная — цэлыя суткі ў аддзяленні рэанімацыі Гродзенскай гарадской бальніцы медыцынскай рэабілітацыі. Прызнаецца, што сама шукала такую работу, бо ў будучым гэты кірунак бачыць сваім профільным.

Работы хапае, кажа дзяўчына, рэанімацыя (а гэта 12 ложкаў) запоўнена, некаторыя хворыя падключаны да апаратаў ШВЛ. Ім — асаблівая ўвага. Трэба сачыць за параметрамі, пры неабходнасці карэктаваць ці клікаць урача. Усім пацыентам робяць аналіз на сатурацыю — колькасць кіслароду ў крыві.

Уся рэанімацыя лічыцца «бруднай» зонай. Адпаведна, і ўваход у яе асобны: праз шлюз з кварцавымі лямпамі медыкі ідуць у «брудную» зону на змену, якая доўжыцца суткі. Разам з Веранікай працуюць яшчэ пяць студэнтаў-шасцікурснікаў, без пяці хвілін урачы. І гэта добрая дапамога для бальніцы.

Вераніка Манюк.

— Напачатку бацькі былі ў шоку, што я там засталася працаваць, мама прасіла звольніцца. Але ў нас вельмі добры калектыў, і мы, студэнты, набіраемся вопыту. Праз некоторы час бацькі нават пачалі ганарыцца, што я не пакінула ў такой сітуацыі сваё аддзяленне, — канстатуе Вераніка.

Яна, між іншым, адна з тых, хто гатовы пасля размеркавання ехаць працаваць у раён. Медыкі там заўсёды запатрабаваныя.

У тым, што масачны рэжым абавязковы, будучы ўрач Ілья Сергель можа запэўніць каго заўгодна. Ён працуе фельчарам 2-й падстанцыі хуткай дапамогі і ўсе 12 гадзін свайго дзяжурства ў раз'ездах. Як і патрэбна, брыгада Ільі выязджае ў спецыяльным адзенні.

Арцём Аганесян

— Кожнае дзяжурства я кантактую з «ковід»-пацыентамі. Выклікаюць з сімптомамі, якія характэрныя для гэтага захворвання:  кашаль, задышка, высокая тэмпература, — падрабязна пералічвае Ілья. — Першай справай робім сатурацыю — норма ад 95 да 100 %. Калі 93 %, мы слухаем хрыпы, тэлефануем старшаму доктару, каб накіраваць у стацыянар. Калі паказана шпіталізацыя, вязём адразу на КТ; калі на здымку «матавое шкло» — прымета «ковіднай» пнеўманіі — тады ставяць дыягназ і вязуць у аддзяленне.

Андрэй Болтач, дэкан лячэбнага факультэта Гродзенскага дзяржаўнага медыцынскага ўніверсітэта:

—- У ВНУ створана сем валанцерскіх атрадаў ва ўсіх паліклініках Гродна. Іх задача — работа ў кол-цэнтры, абзвон кантактаў першага ўзроўню, пацыентаў з «ковідам» аб выніках аналізу, разнос рэцэптаў па дамах. Плюс работа памочнікамі ўрача на прыёмах. Такіх валанцёраў у нас больш за 70 чалавек. Яшчэ амаль 150 студэнтаў працаўладкаваны фельчарамі і медсёстрамі. Зараз патрэба ў дапамозе вырасла. У кожнай паліклініцы яшчэ працаўладкавана па два чалавекі і дзесяць студэнтаў — у першай паліклініцы. Плюс у нас у рэзерве 100 чалавек, якія хочуць уладкавацца. Калі будзе неабходна, зможам узмацніць нашы медыцынскія ўстановы. Студэнты падрыхтаваны для работы з «ковіднымі» хворымі. На базе ўніверсітэта імітуем сітуацыю шлюза, каб навучыць усіх карыстацца сродкамі індывідуальнай аховы.

Маргарыта УШКЕВІЧ

Загаловак у газеце: Пасля заняткаў — на дзяжурствы

Выбар рэдакцыі

Грамадства

Беларуская Амазонка​. Ці стане Палессе аб'ектам сусветнай спадчыны?

Беларуская Амазонка​. Ці стане Палессе аб'ектам сусветнай спадчыны?

Адзін з найбуйнейшых рэгіёнаў, які захаваўся ў некранутым стане і які за разнастайнасць азёр, рэк і балот празвалі Еўрапейскай Амазонкай (ці морам Герадота), усё яшчэ застаецца невядомым шырокаму колу турыстаў

Грамадства

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Дружалюбнасць да сем'яў і моладзі — важны крытэрый сацыяльна арыентаванай дзяржавы. Круглы стол

Нацыянальным брэндам Беларусі па праве лічыцца сацыяльная падтрымка сем'яў дзяржавай, і таму напярэдадні Міжнароднага дня сям'і прадстаўнік

Калейдаскоп

Хутка выпускны! Што выбраць, каб выглядаць годна на галоўным школьным свяце?

Хутка выпускны! Што выбраць, каб выглядаць годна на галоўным школьным свяце?

Пачнём, зразумела, з дзяўчынак, бо менавіта іх мамы ўжо цяпер ламаюць галаву над выпускным уборам дачок.